Saludsod Dagiti Agbasbasa . . .
Makapataudto Pay Ngata ti Daga iti Umdas a Kasapulan a Mangtaginayon iti Biag?
▪ Kabaelan unay ti napintas a planetatayo a Daga a taginayonen ti biag. Kaskasdi, gapu iti dumakdakkel a populasion ken iti nagbiit a pannakaibus ti aglaplapusanan a gameng ti daga, mabalin a mapanunotmo: ‘Mapasamakto kadi ti pagdandanagantayo? Kanayonto kadi nga adda umdas a taraon ken dagiti gameng ti nakaparsuaan?’
Iti panangutobtayo iti dayta a saludsod, manamnamatayo ti kari ti Dios iti sangatauan nasurok nga 4,000 a tawen ti napalabasen: “Iti amin nga al-aldaw a panagtultuloy ti daga, ti panagimula iti bin-i ken panagani, ken ti lamiis ken pudot, ken ti kalgaw ken kalam-ekna, ken ti aldaw ken rabii, saanto a pulos agsarday.” (Genesis 8:22) Gapuna, no kasano nga ammotayo nga inaldaw nga agsilnag ti init, makapagtalektayo met a saanto nga agsardeng ti daga a mangpataud iti kasapulan tapno mataginayon ti biag.
Iti 2004 a report a napauluan “Mataraonannatayo Kadi ti Daga?” kinuna ni Alex Kirby, maysa a reporter mainaig iti aglawlaw: “Umdas ti patpatauden ti lubong a taraon para iti isuamin. Ngem masansan a di umiso ti pakaipapaayan ti taraon, wenno nakanginngina dayta, wenno saan a mabalin nga ipempen iti mabayag a panawen. Isu a ti panangsigurado nga adda umdas a taraon para iti amin ket ad-adda a mainaig iti wagas ti panangituray ngem iti siensia.” No umiso ti pannakaaywan ti daga ken nainsiriban ti pannakausar dagiti gamengna, awan koma ti pagdanagan iti kinakirang ti taraon. Kas pagarigan, idi panawen ti nagkauna nga Israel, nangted ti Dios iti nalawag nga instruksion maipapan iti umiso a pannakausar ti daga. Sigun iti nailanad iti Levitico 25:4, imbaga ti Dios kadagiti Israelita: “Iti maikapito a tawen rebbeng nga adda maaramid a sabbath ti naan-anay a panaginana maipaay iti daga . . . Ti talonmo dika mulaan iti bin-i.” Nupay saanda a talonen ti daga iti kada maikapito a tawen, inkari ti Dios a siguraduenna nga agrag-onto dagiti tattao iti aglaplapusanan a naimbag a bambanag ket didanto pakadanagan nga agkurangto ti kasapulanda.—Levitico 26:3-5.
Nupay adda dagidiay sipapasnek nga agregregget a mangpasayaat iti nadadael a daga ken kadagiti gamengna, adu ti madanagan a nagbassit ken naladawen dagita a panagregget. Ti kakaisuna a solusion ket masarakan iti Apocalipsis 11:18. Kunaen dayta a bersikulo a ni Jehova “dadaelennanto dagidiay mangdaddadael iti daga.” Saan laeng a pagpatinggaen ni Jehova ti di umiso a panangimanehar iti daga ken kadagiti gamengna no di ket ipasiguradona pay nga aglaplapusananto ti patauden ti daga para kadagiti agindeg iti dayta. Mapukawto ti siasinoman a sipapakinakem a mangilaksid iti panggep ti Dios ken ti aniaman nga inaagum a panangabuso iti daga. Iti sabali a bangir, dagiti sisusungdo a mangsuportar iti turay ni Jehova sagrapendanto ti kaitungpalan ti Salmo 72:16: “Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”
Gapu iti agnanayon nga ayat ken sirib ni Jehova, pinanggepna nga agbiag ti sangatauan iti maysa a paraiso a daga ken aywananda dayta kas pagtaenganda. (Genesis 1:28) Iti sidong ti turayna, masursuronto ti natulnog a sangatauan no kasano ti nainsiriban a panangusar kadagiti aglaplapusanan a gameng ti nakaparsuaan tapno saan a maibus dagita. Anian a yamantayo iti kasta a naayat a Manangipaay a sidadaan a mangpennek iti tarigagay ti isuamin a nabiag!—Salmo 145:16.
[Blurb iti panid 22]
“Ti panangsigurado nga adda umdas a taraon para iti amin ket ad-adda a mainaig iti wagas ti panangituray ngem iti siensia”