Ti Akem ti Nasantuan nga Espiritu iti Pannakatungpal ti Panggep ni Jehova

“Ti saok a rummuar manipud iti ngiwatko . . . sigurado nga agballiginto iti banag a nangibaonak iti dayta.”​—ISA. 55:11.

1. Iyilustraryo ti nagdumaan ti plano ken panggep.

ILADAWANYO ti dua a lallaki nga agsagsagana nga agbiahe. Ti maysa adda inkeddengna a detalyado a pagdalanan nga agturong iti destinasionna. Ti maikadua a lalaki sipapanunot iti destinasionna ngem adu ti ammona a mabalinna a pagdalanan. Nakasagana nga agdalan iti sabali a ruta no kasapulan. Dagita a nagdumaan ti pamay-an dagitoy a dua a lallaki iyilustrarda ti nagdumaan ti plano ken panggep. Ti plano ket mabalin a mayarig iti panangikeddeng iti detalyado a ruta, idinto a ti panggep mabalin a ramanenna ti panagbalin a sipapanunot iti kalat ngem awan ti naikeddeng nga espesipiko a pamay-an a pananggun-od iti dayta.

2, 3. (a) Ania ti ramanen ti panggep ni Jehova, ken kasano a tinamingna ti kasasaad a timmaud idi nagbasol da Adan ken Eva? (b) Apay a masapul a sipapanunottayo iti pamay-an ti panangitungpal ni Jehova iti panggepna?

² Saan nga itungpal ni Jehova ti pagayatanna babaen ti espesipiko a plano no di ket babaen ti pamay-an a mabalin a baliwan tapno maibanag ti panggepna. (Efe. 3:11) Dayta a panggep ramanenna ti orihinal a pagayatanna agpaay iti sangatauan ken iti daga​—ti panagbalin daytoy a globo a maysa a paraiso ken pagtaengan dagiti perpekto a tattao iti agnanayon a talna ken ragsak. (Gen. 1:28) Idi nagbasol da Adan ken Eva, tinaming ni Jehova ti kasasaad ken nangaramid kadagiti urnos tapno sigurado a maitungpal ti panggepna. (Basaen ti Genesis 3:15.) Inkeddeng ni Jehova a ti simboliko a babai a kukuana ket mangipasngay iti ‘bin-i,’ wenno Anak a Lalaki, a mangdadaelto iti kangrunaan a kabusor a ni Satanas ken mangikkat kadagiti epekto ti dakes nga aramidna.​—Heb. 2:14; 1 Juan 3:8.

³ Awan ti pannakabalin idiay langit ken ditoy daga a makalapped iti pannakatungpal ti nayebkas a panggep ti Dios. (Isa. 46:9-11) Apay a maikunatayo ti kasta? Gapu ta karaman iti dayta ti nasantuan nga espiritu ni Jehova. Dayta a nakabilbileg a puersa patalgedanna a “sigurado nga agballiginto” ti panggep ti Dios. (Isa. 55:10, 11) Masapul a sipapanunottayo no kasano nga itungpal ti Dios ti panggepna ken agtignaytayo maitunos iti dayta. Ti namnamatayo nga agbiag iti masanguanan ket agpannuray iti pannakatungpal dayta. Kanayonanna, makapabileg iti pammati ti pannakakita no kasano nga us-usaren ni Jehova ti nasantuan nga espirituna. Usigentayo ngarud ti akem ti espiritu​—iti napalabas, iti agdama, ken iti masanguanan​—iti pannakatungpal ti panggep ni Jehova.

Ti Akem ti Nasantuan nga Espiritu iti Napalabas

4. Kasano nga in-inut nga impalgak ni Jehova ti panggepna?

⁴ Idi nagkauna a tiempo, in-inut nga impalgak ni Jehova ti panggepna. Idi damo, maysa a “sagrado a palimed” ti kinasiasino ti naikari a Bin-i. (1 Cor. 2:7) Kalpasan laeng ti agarup 2,000 a tawen a dinakamat manen ni Jehova dayta a bin-i. (Basaen ti Genesis 12:7; 22:15-18.) Ni Jehova ket nangted ken Abraham iti kari a nalawlawa ti saklawenna. Dagiti sasao a “babaen ti bin-im” nalawag nga ipamatmatna a ti Bin-i ket umay kas maysa a tao nga agtaud ken Abraham. Sigurado nga interesado unay nga agpalpaliiw ni Satanas bayat a matungtungpal dayta a detalye. Awan duadua a kayat ti Kabusor a madadael ti kaputotan ni Abraham tapno saan a matungpal ti panggep ti Dios. Ngem imposible a mapasamak dayta gapu ta agtigtignay ti di makita nga espiritu ti Dios. Kadagiti ania a pamay-an?

5, 6. Kasano nga inusar ni Jehova ti espirituna a nangsalaknib kadagiti indibidual manipud kadagiti kaputotan a pagtaudan ti Bin-i?

⁵ Inusar ni Jehova ti espirituna tapno masalakniban dagiti indibidual manipud kadagiti kaputotan a pagtaudan ti Bin-i. Kinuna ni Jehova ken ni Abram (Abraham): “Maysaak a kalasag maipaay kenka.” (Gen. 15:1) Sigurado a matungpal dayta a kari. Kas pagarigan, usigenyo ti napasamak idi agarup 1919 K.K.P. idi temporario a nagnaed da Abraham ken Sara idiay Gerar. Gapu ta dina ammo nga agassawa da Sara ken Abraham, ti ari ti Gerar a ni Abimelec innalana ni Sara tapno agbalin nga asawana. Ni Satanas kadi ti nangimaniobra iti bambanag tapno saanto a maipasngay ni Sara ti bin-i ni Abraham? Saan nga ibaga ti Biblia. Ngem ibagana a bimmallaet ni Jehova. Babaen ti tagtagainep, pinakdaaranna ni Abimelec a saanna a sagiden ni Sara.​—Gen. 20:1-18.

⁶ Saan laeng nga iti dayta a pasamak a sinalakniban ida ni Jehova. Namin-adu nga inispalna ni Abraham ken dagiti kameng ti pamiliana. (Gen. 12:14-20; 14:13-20; 26:26-29) No maipapan ken ni Abraham ken kadagiti kaputotanna, naikuna ngarud ti salmista: “[Ni Jehova] saanna nga impalubos a sauren ida ti asinoman a tao, no di ket maipagapu kadakuada nangtubngar iti ar-ari, a kunkunana: ‘Saanyo a sagiden dagidiay pinulotak, ket kadagiti mammadtok dikay agaramid iti aniaman a dakes.’”​—Sal. 105:14, 15.

7. Kadagiti ania a pamay-an a sinalakniban ni Jehova ti nasion ti Israel?

⁷ Babaen ti espiritu ni Jehova, sinalaknibanna ti nagkauna a nasion ti Israel a pagtaudan ti naikari a Bin-i. Babaen ti espirituna, inted ni Jehova iti Israel ti Lintegna, a nangtaginayon iti pudno a panagdayaw ken nangsalaknib kadagiti Judio manipud iti pannakadangranda iti naespirituan, moral, ken pisikal. (Ex. 31:18; 2 Cor. 3:3) Idi panawen dagiti Ukom, babaen ti espirituna nga inikkan ni Jehova iti pannakabalin ti sumagmamano a lallaki a mangispal iti Israel manipud kadagiti kabusorna. (Uk. 3:9, 10) Kabayatan dagiti siglo sakbay ti pannakaipasngay ni Jesus, ti kangrunaan a paset ti bin-i ni Abraham, sigurado nga adda paset ti nasantuan nga espiritu iti pannakasalaknib ti Jerusalem, Betlehem, ken ti templo​—a karaman amin iti pannakatungpal dagiti padto maipapan ken Jesus.

8. Ania ti mangipakita a ti nasantuan nga espiritu ket direkta a nagtignay iti biag ken ministerio ti Anak ti Dios?

⁸ Ti nasantuan nga espiritu ket direkta a nagtignay iti biag ken ministerio ni Jesus. Intungpal ti nasantuan nga espiritu ti maysa a banag a saan pay a napasamak idi wenno agingga ita​—ti panagsikog ti imperpekto a birhen a ni Maria ken panangipasngay iti perpekto nga Anak, a saan a nakatawid iti dusa nga ipapatay. (Luc. 1:26-31, 34, 35) Idi agangay, dayta nga espiritu sinalaknibanna ti maladaga idi a ni Jesus manipud iti nasapa nga ipapatay. (Mat. 2:7, 8, 12, 13) Idi agarup 30 ti tawen ni Jesus, isu ket pinulotan ti Dios iti nasantuan nga espiritu, a nadutokan a mangasaba ken agtawid iti trono ni David. (Luc. 1:32, 33; 4:16-21) Babaen ti nasantuan nga espiritu, nagaramid ni Jesus kadagiti milagro, a pakairamanan ti panangpaimbag kadagiti masakit, panangpakan kadagiti bunggoy, ken panangpagungar kadagiti natay. Dagita a milagro ket panirpatan kadagiti bendision a manamnamatayo nga iyegto ti turay ni Jesus kas ari.

9, 10. (a) Kasano a nagtignay ti nasantuan nga espiritu kadagiti adalan ni Jesus idi umuna a siglo? (b) Ania a baro a banag maipapan iti pannakatungpal ti panggep ni Jehova ti naipalgak idi umuna a siglo K.P.?

⁹ Sipud idi Pentecostes 33 K.P., inusar ni Jehova ti espirituna a mangpulot kadagiti segundario a paset ti bin-i ni Abraham, nga adu kadakuada ti saan a kaputotan ni Abraham. (Roma 8:15-17; Gal. 3:29) Agtigtignay ti nasantuan nga espiritu kadagiti adalan ni Jesus idi umuna a siglo, tapno maitungpalda a sireregta ti panangasaba ken makaaramidda kadagiti milagro. (Ara. 1:8; 2:1-4; 1 Cor. 12:7-11) Babaen kadagiti namilagruan a sagut, naipalgak ti maysa a baro a banag maipapan iti pannakatungpal ti panggep ni Jehova. Saanen nga usaren ni Jehova dagiti urnos ti panagdayaw idi nagkauna a tiempo a naisentro iti templo ti Jerusalem. Imbaw-ingna ti anamongna iti kabbuangay a kongregasion Kristiano. Sipud idi, us-usarenen ni Jehova ti napulotan a kongregasion a mangitungpal iti panggepna.

¹⁰ Mangsalaknib, mangted iti pannakabalin, mangpulot​—dagitoy ti sumagmamano a pamay-an nga inusar ni Jehova ti nasantuan nga espirituna idi umuna a tiempo tapno agtultuloy a maitungpal ti panggepna. Ngem komusta met iti kaaldawantayo? Kasano nga us-usaren ita ni Jehova ti espirituna nga agpaay iti panggepna? Masapul nga ammuentayo ta kayattayo ti agtignay maitunos iti espiritu. Usigentayo ngarud ti uppat a pamay-an nga us-usaren ni Jehova ti espirituna iti agdama.

Ti Akem ti Nasantuan nga Espiritu iti Agdama

11. Ania ti mangipakita a ti nasantuan nga espiritu ti tumulong kadagiti adipen ti Dios nga agbalin a nadalus, ken kasanoyo a maipakita nga agpapaiwanwankayo iti dayta?

¹¹ Umuna, ti nasantuan nga espiritu tulonganna dagiti adipen ti Dios nga agbalin a nadalus. Masapul a nadalus iti moral dagidiay addaan iti paset iti panggep ni Jehova. (Basaen ti 1 Corinto 6:9-11.) Dadduma a nagbalin a pudno a Kristiano ti sigud a makiramraman kadagiti imoral nga aramid a kas iti pannakiabig, pannakikamalala, ken homoseksualidad. Mabalin a nairamut dagiti tarigagay a mangituggod iti maysa nga agbasol. (Sant. 1:14, 15) Kaskasdi, ‘naugasanen’ dagita nga indibidual, a mangipamatmat a nagbalbaliwdan tapno maay-ayoda ti Dios. Ania ti nakatulong iti maysa a managayat iti Dios tapno masarangetna ti tarigagay nga agaramid iti dakes? “Ti espiritu ti Diostayo,” kuna ti 1 Corinto 6:11. Babaen ti panagtalinaedyo a nadalus iti moral, ipakpakitayo a ti espiritu ti kangrunaan a pagpapaiwanwananyo.

12. (a) Sigun iti sirmata ni Ezequiel, kasano nga iturturong ni Jehova ti organisasionna? (b) Kasano a maipakitayo a makituntunoskayo iti espiritu?

¹² Maikadua, us-usaren ni Jehova ti espirituna a mangiturong iti organisasionna iti direksion a kayatna. Iti sirmata ni Ezequiel, ti nailangitan a paset ti organisasion ni Jehova ket nailadawan kas nailangitan a karuahe a di mapengdan ti iyaabantena tapno matungpal ti panggep ni Jehova. Ania ti mangiturturong iti dayta a karuahe? Ti nasantuan nga espiritu. (Ezeq. 1:20, 21) Laglagipentayo a buklen ti dua a paset ti organisasion ni Jehova, ti nailangitan ken ti naindagaan. No ti nailangitan a paset ket iturturong ti nasantuan nga espiritu, sigurado a kasta met ti naindagaan a paset. Babaen ti panagbalinyo a natulnog ken nasungdo iti panangiturong ti naindagaan a paset ti organisasion ti Dios, ipakpakitayo a makidangdanggaykayo iti panagtignay ti nailangitan a karuahe ni Jehova ken makituntunoskayo iti nasantuan nga espirituna.​—Heb. 13:17.

13, 14. (a) Siasino dagiti mangbukel iti “daytoy a kaputotan” a dinakamat ni Jesus? (b) Mangted iti pagarigan a mangipakita a tumultulong ti nasantuan nga espiritu tapno matarusantayo ti kinapudno iti Biblia. (Kitaen ti kahon a “Makidangdanggaykayo Kadi iti Rumanraniag a Lawag?”)

¹³ Maikatlo, us-usaren ni Jehova ti nasantuan nga espiritu tapno tulongannatayo a mangtarus kadagiti kinapudno iti Biblia. (Prov. 4:18) Daytoy a magasin ket nabayagen nga us-usaren ti “matalek ken masirib nga adipen” kas ti kangrunaan a kalasugan nga in-inut a mangilawlawag kadagiti kinapudno iti Biblia. (Mat. 24:45) Kas pagarigan, usigentayo ti pannakaawattayo no siasino ti mangbukel iti “daytoy a kaputotan” a dinakamat ni Jesus. (Basaen ti Mateo 24:32-34.) Ania a kaputotan ti tuktukoyen ni Jesus? Ti artikulo a “Ti Kaadda ni Kristo​—Ania ti Kaipapananna Kenka?” ilawlawagna a saan a dagiti nadangkes a tattao ti tuktukoyen ni Jesus no di ket dagiti adalanna, a dandani idin a mapulotan iti nasantuan nga espiritu.a Dagiti napulotan a pasurot ni Jesus​—idi umuna a siglo ken iti kaaldawantayo​—isuda dagidiay makakita saan laeng nga iti tanda no di ket matarusanda ti kaipapanan dayta, a ni Jesus ket “asidegen kadagiti ruangan.”

¹⁴ Ania ti ipakitana kadatayo daytoy a pannakailawlawag? Nupay ditay ammo ti eksakto a kapaut “daytoy a kaputotan,” nasayaat a silalagiptayo iti sumagmamano a banag maipapan iti sao a “kaputotan”: Masansan a tukoyenna dagiti tattao a nagduduma ti edadda a nagbiag wenno sibibiag iti maymaysa a periodo; saan met a napaut unay; ken adda patinggana. (Ex. 1:6) Kasanotayo ngarud a tarusan ti kinuna ni Jesus maipapan iti “daytoy a kaputotan”? Agparang a tuktukoyenna dagiti napulotan a nakaimatang iti panangrugi ti pannakatungpal ti tanda idi 1914 ken dagiti nakainnabutda a napulotan a makaimatangto iti panangrugi ti dakkel a rigat. Adda rugi dayta a kaputotan ken sigurado nga adda met pagpatinggaanna. Ti pannakatungpal ti nagduduma a paset ti tanda ket nalawag nga ipasimudaagna nga asidegen ti dakkel a rigat. Babaen ti panangtaginayon iti pannakariknayo iti kinaganat ti panawen ken panagtultuloyyo nga agbantay, ipakpakitayo a makidangdanggaykayo iti lumawlawag a pannakaawat iti kinapudno ken agpapaidalankayo iti nasantuan nga espiritu.​—Mar. 13:37.

15. Ania ti mangipakita a ti nasantuan nga espiritu ti mangpabpabileg kadatayo a mangiwaragawag iti naimbag a damag?

¹⁵ Maikapat, ti nasantuan nga espiritu pabilgennatayo a mangiwaragawag iti naimbag a damag. (Ara. 1:8) Adda pay kadi sabali a namagbalin a posible iti pannakaikasaba ti naimbag a damag iti intero a daga? Panunotenyo daytoy: Nalabit a gapu iti napalalo a kinamanagbabain wenno panagamak, maysakayo kadagidiay nangikuna, ‘Diak kabaelan ti mangasaba iti binalaybalay!’ Ngem ita, sireregta a makiramramankayon iti dayta a trabaho.b Adu a matalek a Saksi ni Jehova ti agtultuloy a mangaskasaba iti laksid ti ibubusor wenno pannakaidadanes. Ti laeng espiritu ti Dios ti makatulong kadatayo a mangsaranget kadagiti makapaupay a parikut ken mangaramid iti bambanag a ditay kabaelan iti bukodtayo a pigsa. (Mik. 3:8; Mat. 17:20) Babaen ti naan-anay a pannakiraman iti trabaho a panangasaba, ipakpakitatayo a makituntunostayo iti dayta nga espiritu.

Ti Akem ti Nasantuan nga Espiritu iti Masanguanan

16. Apay a makapagtalektayo a salakniban ni Jehova ti ilina bayat ti dakkel a rigat?

¹⁶ Iti masanguanan, usaren ni Jehova ti nasantuan nga espirituna iti naisangsangayan a pamay-an tapno maitungpalna ti panggepna. Usigentayo nga umuna no kasano nga usarenna dayta a mangsalaknib. Kas naadaltayon, inusar ni Jehova ti espirituna iti napalabas tapno salaknibanna dagiti indibidual agraman ti Israel kas maysa a nasion. Gapuna, adda rasontayo a mamati nga usarenna dayta a nabileg nga espiritu a mangsalaknib iti ilina bayat ti umad-adani a dakkel a rigat. Saantayo a masapul a pugtuan no kasanonto ti eksakto a panangaywan kadatayo ni Jehova. Imbes ketdi, makapagtalektayo iti masanguanan gapu ta ammotayo a saan a baybay-an ni Jehova dagiti agayat kenkuana ken tulongan ida ti nasantuan nga espirituna.​—2 Cron. 16:9; Sal. 139:7-12.

17. Kasano nga usaren ni Jehova ti nasantuan nga espirituna inton baro a lubong?

¹⁷ Kasano nga usaren ni Jehova ti nasantuan nga espirituna iti umad-adani a baro a lubong? Dayta nga espiritu ti puersa nga adda iti likudan ti pannakaaramid dagiti baro a lukot a maluktanto iti dayta a tiempo. (Apoc. 20:12) Anianto ti linaon dagita? Nalawag a dagiti detalyado a kalikaguman kadatayo ni Jehova bayat ti sangaribu a tawen. Segseggaanyo kadi nga adalen ti linaon dagita a lukot? Magagarantayo a mangur-uray iti dayta a baro a lubong. Nalablabes ngem iti namnamaentayo ti kita ti panagbiag iti dayta a naparaburan a tiempo inton usaren ni Jehova ti nasantuan nga espirituna a mangitungpal iti panggepna iti daga ken iti sangatauan.

18. Ania ti natibker a determinasionyo?

¹⁸ Ditay pulos liplipatan a sigurado nga agballigi ti in-inut a pannakatungpal ti panggep ni Jehova gapu ta us-usarenna ti nasantuan nga espirituna​—ti kabilgan a puersa iti uniberso. Karamankayo iti dayta a panggep. Sapay koma ngarud ta determinado nga ipakaasiyo ti espiritu ni Jehova ken agpaidalankayo iti dayta. (Luc. 11:13) Iti kasta, maaddaankayo iti namnama nga agbiag nga agnanayon iti Paraiso a daga kas pinanggep ni Jehova agpaay kadagiti tattao.

[Footnotes]

Malagipyo Kadi?

• Kadagiti ania a pamay-an nga inusar ni Jehova ti nasantuan nga espirituna idi nagkauna a tiempo tapno agtultuloy a matungpal ti panggepna?

• Kasano nga us-usaren ni Jehova ti espirituna iti agdama?

• Kasano nga usaren ni Jehova ti espirituna iti masanguanan tapno maitungpalna ti panggepna?

[Kahon iti panid 10]

Makidangdanggaykayo Kadi iti Rumanraniag a Lawag?

Agtultuloy nga ipapaay ni Jehova ti lawag iti ilina. Ania ti sumagmamano a lawag a naipablaak iti Ti Pagwanawanan?

▪ Ti pangngarig ni Jesus maipapan iti lebadura itampokna ti ania a positibo a leksion mainaig iti naespirituan a panagrang-ay? (Mat. 13:33)​—Hulio 15, 2008, panid 19-20.

▪ Kaano nga agpatingga ti nailangitan nga awis kadagiti Kristiano?​—Mayo 1, 2007, panid 30-31.

▪ Ania ti kayat a sawen ti panagdayaw ken Jehova “buyogen ti espiritu”? (Juan 4:24)​—Hulio 15, 2002, panid 15.

▪ Iti ania a paraangan nga agserserbi ti dakkel a bunggoy? (Apoc. 7:15)​—Mayo 1, 2002, panid 30-31.

▪ Kaano a mapasamak ti panaglalasin dagiti karnero ken kalding? (Mat. 25:31-33)​—Oktubre 15, 1995, panid 18-28.