Itultuloyyo a Pabilgen ti Kongregasion
“Itultuloyyo a liwliwaen ti maysa ken maysa ken pabilgen ti maysa ken maysa.”—1 TES. 5:11.
1. Ania dagiti bendision nga itden ti panagbalin a kameng ti kongregasion Kristiano, ngem ania dagiti karit a pakaipaspasanguantayo?
PUDNO a dakkel a bendision ti panagbalin a kameng ti kongregasion Kristiano. Addaanka iti nasayaat a relasion ken Jehova. Ti panagpaiwanwanmo iti Saona ilikliknaka kadagiti dakes a bunga ti saan a nakristianuan a panagbiag. Addaanka iti adu a pudno a gagayyem a maseknan iti pagimbagam. Wen, adu dagiti bendision a matagiragsakmo. Ngem kaaduan a Kristiano ti marigrigatan a mangsango iti nagduduma a problema. Dadduma kadakuada ti mabalin nga agkasapulan iti tulong tapno matarusanda ti naun-uneg a bambanag iti Sao ti Dios. Dadduma ti masakit wenno malmaldaangan, wenno agsagsagaba kadagiti dakes a bunga dagiti di umiso a desisionda. Ken agbibiagtayo amin iti dakes a lubong.
2. Ania ti rumbeng nga aramidentayo no agsagsagaba ti kakabsattayo, ken apay?
2 Ditay kayat a makita nga agsagsagaba wenno marigrigatan dagiti padatayo a Kristiano. Inyarig ni apostol Pablo ti kongregasion iti maysa a bagi ken kinunana a “no ti maysa a kameng agsagaba, amin dagiti dadduma a kameng agsagabada a mairaman iti dayta.” (1 Cor. 12:12, 26) Kadagiti kasta a kasasaad, ikagumaantayo koma a tulongan dagiti kakabsattayo. Adu dagiti pagarigan iti Biblia a nagtitinnulong dagiti kameng ti kongregasion tapno mapagballigianda dagiti karit. Bayat nga usigentayo dagita a pagarigan, panunotem no kasano a makatulongka iti pamay-an nga umasping kadagita. Kasano a makatulongka iti espiritualidad ti kabsatmo tapno bumileg ti kongregasion ni Jehova?
“Isu Inkuyogda”
3, 4. Iti ania a pamay-an a da Aquila ken Priscila tinulonganda ni Apolos?
3 Naregta idin nga ebanghelisador ni Apolos idi nagnaed idiay Efeso. “Yantangay nasged iti espiritu,” kuna ti salaysay ti Aramid, “insasao ken insursurona a siuumiso ti bambanag maipapan ken Jesus, ngem ti laeng pammautisar ni Juan ti ammona.” Saan nga ammo ni Apolos ti bautismo “iti nagan ti Ama ken ti Anak ken ti nasantuan nga espiritu.” Nalabit a mangipasimudaag dayta a naammuanna ti kinapudno manipud kadagiti adalan ni Juan a Mammautisar wenno kadagiti pasurot ni Jesus sakbay ti Pentecostes 33 K.P. Nupay naregta ni Apolos, adda dagiti napateg a banag a dina ammo. Kasano a nakatulong kenkuana ti pannakitimpuyogna kadagiti kapammatianna?—Ara. 1:4, 5; 18:25; Mat. 28:19.
4 Ti Kristiano nga agassawa a da Aquila ken Priscila nangngegda ni Apolos a situtured a mangaskasaba iti sinagoga. Gapuna, inkuyogda ket adu pay ti insuroda kenkuana. (Basaen ti Aramid 18:24-26.) Nagsayaat dayta nga inaramidda. Ken sigurado a nataktika ti pannakisarita da Aquila ken Priscila. Impariknada ken Apolos a saan a panangbabalaw dayta no di ket kayatda la a tulongan gapu ta bassit laeng ti ammona maipapan iti pakasaritaan ti nagkauna a kongregasion Kristiano. Awan duadua a nagyaman ni Apolos kadagiti baro a kakaduana gapu ta inranudda kenkuana dagita a napateg a detalye. Gapu kadagita nga impormasion, nagdakkel ti naitulong ni Apolos kadagiti kakabsat idiay Acaya ken nakaipaay iti nabileg a panangsaksi.—Ara. 18:27, 28.
5. Ania a naayat a tulong ti ipapaay ti rinibu nga agibumbunannag iti Pagarian, ken ania ti resultana?
5 Adu iti kongregasion Kristiano ita ti agyaman kadagiti timmulong kadakuada a mangtarus iti Biblia. Nabukel ti adu a napaut a panaggagayyem iti nagbaetan ti mangyad-adal ken mayad-adalan. Kaaduanna, ti panangtulong kadagiti tattao a mangtarus iti kinapudno kalikagumanna ti regular a panangyadal kadakuada iti sumagmamano a bulan. Ngem sidadaan nga agsakripisio dagiti agibumbunannag iti Pagarian gapu ta bigbigenda a nairaman iti dayta ti biag. (Juan 17:3) Ket anian a ragsaktayo no makitatayo a matarusan dagiti tattao ti kinapudno, agbiagda maitunos iti dayta, ken usarenda ti biagda a mangaramid iti pagayatan ni Jehova!
“Naimbag ti Damagna”
6, 7. (a) Apay a ni Timoteo ti pinili ni Pablo a kaduana iti panagmisionero? (b) Natulongan ni Timoteo a mangaramid iti ania a panagrang-ay?
6 Idi binisita da apostol Pablo ken Silas ti Listra bayat ti maikadua a panagmisioneroda, naam-ammoda ti agtutubo nga agnagan iti Timoteo, a nalabit dandani wenno nasurok la bassit a 20 ti tawenna. “Naimbag ti damagna kadagiti kakabsat idiay Listra ken Iconio.” Dedikado a Kristiano ni Eunice a nanangna ken ni Loida nga apongna, ngem saan a manamati ni tatangna. (2 Tim. 1:5) Nalabit a naam-ammo ni Pablo daytoy a pamilia idi damo a binisitana ti lugarda sumagmamano a tawen sakbayna. Ngem ita, interesado ti apostol ken ni Timoteo gapu ta mapagwadan daytoy nga agtutubo. Gapuna, iti pammalubos ti bagi dagiti panglakayen, nagbalin ni Timoteo a katulongan ni Pablo iti panagmisionerona.—Basaen ti Aramid 16:1-3.
7 Adu ti nasursuro ni Timoteo iti laklakay a kaduana. Dakkel ti rimmang-ayanna nga uray la a sikokompiansa nga imbaon ni Pablo a mangsarungkar kadagiti kongregasion ken agserbi kas pannakabagi ti apostol. Iti uneg ti 15 a tawen wenno nasursurok pay a pannakikadua ni Timoteo ken ni Pablo, daytoy awan kapadasanna ken nalabit managbabain nga agtutubo ket nagbalin a mapagwadan a manangaywan idi agangay.—Fil. 2:19-22; 1 Tim. 1:3.
8, 9. Ania ti mabalin nga aramiden dagiti kameng ti kongregasion tapno maparegtada dagiti agtutubo? Mangted iti pagarigan.
8 Dakkel ti potensial ti adu ita nga agtutubo iti kongregasion Kristiano. No dagiti mapagwadan nga adipen ni Jehova paregtaen ken aywananda dagitoy nga agtutubo, agreggetda a rumagpat ken umawat iti dakdakkel a responsabilidad iti ili ni Jehova. Agpaliiwkayo iti kongregasionyo! Adda kadi dagiti agtutubo a sidadaan nga agpausar, kas ken Timoteo? Buyogen ti tulong ken pammaregtayo, mabalin nga agbalindanto a payunir, Bethelite, misionero, wenno agdaldaliasat a manangaywan. Ania ti maaramidanyo tapno matulonganyo ida a rumagpat kadagiti kasta a kalat?
9 Ni Martin, a 20 a tawenen a Bethelite, maragsakan a manglagip iti pannakaseknan nga impakita kenkuana ti manangaywan iti sirkito 30 a tawenen ti napalabas bayat a nagkaduada a nangasaba. Sigagagar nga inestoria dayta a manangaywan ti panagserbina idiay Bethel idi agtutubo pay. Pinaregtana ni Martin a mangusig no posible met nga agpausar iti organisasion ni Jehova iti kasta a pamay-an. Ibilang ni Martin a dayta a nakalalagip a panagsaritada ket dakkel ti epektona kadagiti inaramidna a desision idi agangay. Nalabit nga addanto nasayaat nga ibungana ti pannakisaritam kadagiti agtutubo maipapan kadagiti teokratiko a kalat.
“Agsaokayo iti Makaliwliwa Kadagiti Malmaldaangan a Kararua”
10. Ania ti narikna ni Epafrodito, ken apay?
10 Napaut ken makabannog ti dinaliasat ni Epafrodito manipud Filipos nga agturong idiay Roma tapno bisitaenna ni apostol Pablo, a naibalud gapu iti pammatina. Isu ket nagserbi kas pannakabagi dagiti taga-Filipos. Saanna laeng nga impan dagiti sagutda para iti apostol no di ket planona ti agtalinaed sadiay tapno tulonganna ni Pablo bayat ti narigat a kasasaadna. Ngem bayat ti kaaddana idiay Roma, nagsakit ni Epafrodito ‘agingga a gistay natay.’ Gapu ta impagarupna a napaay ti panggepna, naldaangan ni Epafrodito.—Fil. 2:25-27.
11. (a) Apay a ditay masdaaw no makarikna iti leddaang ti dadduma iti kongregasion? (b) Ania ti insingasing ni Pablo mainaig iti kasasaad ni Epafrodito?
11 Malmaldaangan dagiti tattao ita gapu iti nagduduma a parikut. Sigun iti estadistika ti World Health Organization, 1 iti tunggal 5 a tao ti nalabit nga agsagaba iti depresion iti unos ti panagbiagda. Makapasar met iti kasta ti ili ni Jehova. Dagiti parikut nga itden ti panangipaay iti kasapulan ti pamilia, panagsakit, pannakapaay, wenno dadduma pay ket mabalin a pakaigapuan ti panagleddaang. Ania ti maitulong dagiti taga-Filipos ken ni Epafrodito? Insurat ni Pablo: “Ipaayanyo iti nakayugalian a panangabrasa iti Apo buyogen ti isuamin a rag-o; ket itultuloyyo nga ibilang a maipatpateg dagiti kasta a kita ti tattao, agsipud ta maigapu iti trabaho ti Apo isu nganngani natay, nga isarsarangna ti kararuana iti peggad, tapno naan-anay a masandianna ti kaawanyo ditoy a mangipaay iti pribado a panagserbi kaniak.”—Fil. 2:29, 30.
12. Ania ti mabalin a makaliwliwa kadagiti malmaldaangan?
12 Masapul met a paregtaentayo dagiti kakabsat a maup-upay wenno malmaldaangan. Sigurado nga adda dagiti positibo a bambanag a maibagatayo maipapan iti panagserbida ken Jehova. Nalabit a dakkel ti binalbaliwanda tapno agbalinda a Kristiano wenno agserbida kas payunir. Apresiarentayo dagita a panagreggetda, ken ipasiguradotayo nga ipatpateg ni Jehova dagita. No ti panaglakay wenno panagsakit ti mangkissay iti sigud a maar-aramidan ti dadduma a matalek, maikarida latta iti naan-anay a panagraemtayo gapu iti adun a tawen a panagserbida. Aniaman kadagita, balakadan ni Jehova ti amin a matalek kenkuana: “Agsaokayo iti makaliwliwa kadagiti malmaldaangan a kararua, saranayenyo dagiti nakapuy, maaddaankayo iti mabayag a panagitured iti isuamin.”—1 Tes. 5:14.
“Siaasi a Pakawanenyo ken Liwliwaenyo”
13, 14. (a) Ania a serioso nga addang ti inaramid ti kongregasion ti Corinto, ken apay? (b) Ania ti epekto dayta a panangilaksid?
13 Idi umuna a siglo iti kongregasion ti Corinto, adda maysa a lalaki nga agtultuloy a makiab-abig. Gapu iti konduktana, nagpeggad ti kinasin-aw ti kongregasion ken naklaat uray dagiti saan a manamati. Gapuna, maiparbeng laeng nga imbilin ni Pablo a mailaksid dayta a lalaki iti kongregasion.—1 Cor. 5:1, 7, 11-13.
14 Adda nasayaat nga epekto dayta a disiplina. Nasalakniban ti kongregasion manipud iti makadadael nga impluensia, ken namagpanunot iti nakabasol tapno sipapasnek nga agbabawi. Gapu ta nangipakita dayta a lalaki kadagiti aramid a mangpaneknek nga isu ket agbabbabawi, impasimudaag ni Pablo iti maikadua a suratna iti kongregasion ti Corinto a masapul nga isublida ti lalaki. Ngem saan la a dayta ti masapul nga aramidenda. Imbilinna pay iti kongregasion a ‘siaasi a pakawanen ken liwliwaenda ti agbabbabawi a nakabasol, tapno uray kaskasano saan nga alimonen ti nalabes unay a panaglidayna.’—Basaen ti 2 Corinto 2:5-8.
15. Ania ti rumbeng a panangmatmattayo kadagidiay nakabasol ngem nagbabawi ken naisubli iti kongregasion?
15 Ania ti maadaltayo iti dayta a salaysay? Maladingitantayo no mailaksid ti maysa. Mabalin a maumsi ti nagan ti Dios ken maibabain ti kongregasion gapu kadakuada. Nalabit a nakabasolda pay ketdi kadatayo a mismo. Kaskasdi, dagiti panglakayen a nadutokan a mangusig iti kaso tamingenda dayta maitunos iti panangiwanwan ni Jehova. No makitada a maikari a maisubli iti kongregasion ti agbabbabawi a nakabasol, pammaneknek dayta nga isu ket pinakawanen ni Jehova. (Mat. 18:17-20) Saan kadi a rumbeng laeng a tuladentayo ni Jehova? Kinapudnona, ti panagbalin a naulpit ken saan a manangpakawan ket maibilang nga ibubusor iti Dios. Tapno makatulongtayo iti talna ken panagkaykaysa ti kongregasion ken magun-odtayo ti anamong ni Jehova, saan kadi a nasken a ‘patalgedantayo ti ayattayo’ kadagiti nakabasol a sipapasnek nga agbabbabawi ken naisubli?—Mat. 6:14, 15; Luc. 15:7.
“Adu ti Usarna Kaniak”
16. Apay a napaay ni Pablo iti inaramid ni Marcos?
16 Ipakita ti maysa pay a pagarigan iti Biblia a ditay koma agimula iti sakit ti nakem no adda mangpaay kadatayo. Kas pagarigan, kasta unay ti pannakapaay ni apostol Pablo gapu iti inaramid ni Juan Marcos. Apay? Iti umuna a panagmisionero da Pablo ken Bernabe, kimmuyog kadakuada ni Marcos tapno tulonganna ida. Ngem bayat ti panagdaliasatda ken iti di nadakamat a rason, pinanawan ida ni Juan Marcos ken nagawid. Napalalo ti pannakapaay ni Pablo iti dayta. Gapuna, idi implanoda ti maikadua a panagdaliasatda, nagsupiatanda ken Bernabe no ikuyogda manen ni Marcos wenno saan. Gapu iti napasamak iti umuna a panagdaliasatda, saanen a kayat ni Pablo nga ikuyogda ni Marcos.—Basaen ti Aramid 13:1-5, 13; 15:37, 38.
17, 18. Ania ti mangipakita a narisut ti parikut iti nagbaetan da Pablo ken Marcos, ken ania ti maadaltayo iti dayta?
17 Saan nga impalubos ni Marcos nga isu ket maupay gapu iti panagkedked ni Pablo a mangikuyog kenkuana, yantangay intuloyna ti nagmisionero iti sabali a teritoria a kadua ni Bernabe. (Ara. 15:39) Ipakita ti insurat ni Pablo maipapan kenkuana sumagmamano a tawen kalpasanna nga isu ket nagtultuloy a matalek ken mapagpiaran. Bayat ti pannakaibalud ni Pablo idiay Roma, sinuratanna ni Timoteo tapno ayabanna. Iti dayta met la a surat ni Pablo, kinunana: “Alaem ni Marcos ket ikuyogmo, ta adu ti usarna kaniak maipaay iti panagserbi.” (2 Tim. 4:11) Wen, matmatan ni Pablo a nagmataenganen ni Marcos.
18 Adda maadaltayo iti daytoy a salaysay. Napatanor ni Marcos dagiti galad ti maysa a nasayaat a misionero. Saan a naitibkol iti panagkedked ni Pablo idi damo. Agpadada a nataengan iti naespirituan, ket saanda nga impalubos nga agtultuloy ti sakit ti nakemda. Iti kasumbangirna, binigbig ni Pablo idi agangay a ni Marcos ket maysa a napateg a katulongan. Gapuna, no marisut dagiti kakabsat ti dida pagkikinnaawatan, maiparbeng laeng a lipatenda daytan ken itultuloyda a tulongan ti sabsabali a rumang-ay iti naespirituan. Ti panangbigbig iti nasayaat a galad ti dadduma pabilgenna ti kongregasion.
Sika ken ti Kongregasion
19. Ania ti maitulong ti tunggal Kristiano kadagiti kakongregasionna?
19 Iti daytoy “napeggad a tiempo a narigat a pakilangenan,” kasapulam ti tulong dagiti kakabsatmo iti kongregasion ken kasapulanda met ti tulongmo. (2 Tim. 3:1) Adda dagiti gundaway a saan nga ammo ti maysa a Kristiano no kasanona a tamingen a sibaballigi dagiti kasasaad a pakaipaspasanguanna, ngem ammo dayta ni Jehova. Ken kabaelanna nga usaren ti nagduduma a kameng ti kongregasion—a pakairamanam—tapno tulongan ti sabsabali a mangsurot iti umiso a dana. (Isa. 30:20, 21; 32:1, 2) Ipapusotay koma ngarud ti balakad ni apostol Pablo! Itultuloyyo a “liwliwaen ti maysa ken maysa ken pabilgen ti maysa ken maysa, a kas iti pudno nga ar-aramidenyo.”—1 Tes. 5:11.
Ania ti Sungbatyo?
• Apay a kasapulan iti kongregasion Kristiano ti panangpabileg iti sabsabali?
• Mabalinyo a tulongan ti sabsabali a mangsaranget kadagiti ania a karit?
• Apay a kasapulantayo ti tulong dagiti kakongregasiontayo?
[Ladawan iti panid 11]
Adda maitulongtayo iti padatayo a Kristiano a maipaspasango iti maysa a karit
[Ladawan iti panid 12]
Adu ita nga agtutubo iti kongregasion Kristiano ti addaan iti dakkel a potensial