Panangdaer iti Panangliput ti Asawa

ADUN a tawen nga agpaypayunir da Margarita ken ti asawana a ni Raúl.a Ngem di nagbayag kalpasan a naipasngay ti inauna nga anakda, nangrugi ni Raúl a sumiasi ken Jehova. Idi agangay, nagbalin nga imoral ti panagbiagna ket nailaksid iti kongregasion. “Idi napasamak dayta,” kuna ni Margarita, “panagriknak ket matayakon. Nadudog ti pusok ket diak ammo ti aramidek.”

Nagtalek ken impateg ni Jane ti asawana. Ngem di nagbayag kalpasan ti kasarda, isu ket liniputan ni lakayna iti sabali a pamay-an. Nangrugin a dangran ni lakayna. “Idi damo a dinanognak,” kuna ni Jane, “naklaat ken nabainanak. Iti uneg ti adu a tawen, namin-ano a naulit dayta ngem kanayon a dumawat iti pammakawan. Pinanunotko nga obligasionko kas Kristiano a kanayon a pakawanek ken lipatekon ti napasamak. Impagarupko pay a saan a panangipakita iti kinasungdo iti asawak no iyebkasko ti parikutmi iti asinoman​—uray kadagiti panglakayen. Pinanunotko a masapul nga adda aramidek tapno ayatennak ni lakayko. Idi pinanawannakami iti anakko, panagriknak ket napaayak, nga adda pay koma naaramidak wenno naibagak a nangtaginayon iti panagasawami.”

Kas kada Margarita ken Jane, mabalin nga agpaspasarka iti emosional ken pinansial a pakarigatan ken naapektaran ti espiritualidadmo gapu iti panangliput kenka ni lakaymo. Wenno maysaka nga asawa a lalaki nga agpaspasanaang ti pusona ken marigrigatan gapu iti panangliput kenka ni baketmo. Di mailibak nga agbibiagtayon iti “napeggad a tiempo a narigat a pakilangenan,” kas impadto ti Biblia. Ipamatmat dayta a padto a bayat dagiti “maudi nga aldaw,” agpeggad dagiti pamilia ket adu kadagita ti naan-anay a bumaaw ti panagayatda. Dadduma ti pammarang laeng ti panagserbida iti Dios. (2 Tim. 3:1-5) Maipaspasango met kadagita dagiti pudno a Kristiano. Gapuna, ania ti makatulong kenka tapno mapagballigiam ti pannakaliputmo?

Tuladem ti Panangmatmat ni Jehova

Mabalin nga iti damo, marigatanka a mangakseptar a saktannaka ti maysa nga ipatpategmo. Mabalin a pabasolem pay ti bagim iti dakes nga inaramidna.

Ngem laglagipem nga uray ti perpekto a tao a ni Jesus ket liniputan ti maysa a nagtalkan ken impatpategna. Pinili ni Jesus dagiti kasisingedan a kakaduana kalpasan ti adu a karkararag. Maibilang ngarud a mapagtalkan nga adipen ni Jehova ti 12 nga apostol. Gapuna, sigurado a naldaangan unay ni Jesus idi “nagbalin a traidor” ni Judas. (Luc. 6:12-16) Ngem ni Jehova dina impabasol ken Jesus ti inaramid ni Judas.

Pudno, awan ita ti perpekto a panagasawa. Agpada nga agkamali dagiti agassawa. Maitutop ti insurat ti napaltiingan a salmista: “No dagiti biddut koma ti siputam, O Jah, O Jehova, siasino ti makapagtakder?” (Sal. 130:3) Kas panangtulad ken Jehova, ikagumaan koma dagiti agassawa a palabsen ti pagkapuyan ti tunggal maysa.​—1 Ped. 4:8.

Ngem “tunggal maysa kadatayo makikuentanto iti Dios maipaay iti bagina.” (Roma 14:12) No nayugali ti maysa a pagsasawan wenno kabilenna ti asawana, isu ti manungsungbat ken Jehova. Kondenaren ti Dios ti kinaranggas ken makapasakit a sasao isu nga awan ti aniaman a nainkalintegan a rason a tratuen a siuulpit ken awanan panagraem ti maysa nga asawa. (Sal. 11:5; Efe. 5:33; Col. 3:6-8) Kinapudnona, no maulit-ulit nga agpungtot ken saan a sipapasnek nga agbabawi ken agbalbaliw ti maysa a Kristiano, masapul a mailaksid iti kongregasion. (Gal. 5:19-21; 2 Juan 9, 10) Saan koma a marikna ti maysa a kasla makabasol no ibagana kadagiti panglakayen ti di umiso a kondukta ti asawana. Kinapudnona, kaasian ni Jehova dagiti biktima ti kasta a pannakamaltrato.

No makikamalala ti maysa, isu ket agbasbasol saan laeng nga iti asawana no di ket ken Jehova. (Mat. 19:4-9; Heb. 13:4) No ti saan a nakabasol nga asawa ikagkagumaanna nga annuroten dagiti prinsipio ti Biblia, awan ti rason a panunotenna nga adda nagkuranganna isu a liniputan ti asawana.

Laglagipem nga ammo ni Jehova ti riknam. Kinapudnona, inladawanna ti bagina kas asawa ti nasion ti Israel, ken naglaon ti Saona iti adu a makatukay iti rikna a sasao a mangyebkas iti ladingitna gapu iti naespirituan a pannakikamalala dayta a nasion. (Isa. 54:5, 6; Jer. 3:1, 6-10) Manamnamam a pagaammo ni Jehova dagiti luluam no liniputannaka ti asawam. (Mal. 2:13, 14) Ammona a kasapulam ti liwliwa ken pammabileg.

No Kasano a Mangliwliwa ni Jehova

Ti maysa a pamay-an a mangliwliwa ni Jehova ket babaen ti kongregasion Kristiano. Napadasan dayta ni Jane. “Nairana nga idi nagbisita ti manangaywan iti sirkito, napalalo ti leddaangko,” kunana. “Maawatanna dayta a sasaadek gapu iti plano ni lakayko a mangidiborsio kaniak. Siaanus nga inlawlawagna kaniak dagiti teksto a kas iti 1 Corinto 7:15. Dagiti teksto ken dagiti makaliwliwa a sasaona ti nangikkat iti pannakariknak nga adda nagkurangak ken nangted kaniak iti talna ti panunot.”b

Ni Margarita, a nadakamat itay, nariknana met a mangipapaay ni Jehova iti praktikal a tulong babaen ti kongregasion Kristiano. “Idi nabatad nga awan panagbabawi ni lakayko,” kuna ni Margarita, “immakarkami kadagiti annakko iti sabali a siudad. Nakasarakkami sadiay iti abanganmi nga apartment a dua ti kuartona. Kabigatanna, nalapunosak iti liday bayat nga ik-ikkatek dagiti linaon ti bagmi. Pagammuan ta adda nagtuktok. Pagarupko no ‘tay makinkukua iti apartment nga agnanaed iti abaymi. Nasdaawak idi nakitak a ti gayam kabsat a nangyadal ken nanangko ken timmulong iti pamiliami a makaammo iti kinapudno. Dina ninamnama a makitanak ta ti rantana ket umayna iyadalan ti makinkukua iti apartment. Napalalo a pannakabang-arko ket diak nateppelan ti riknak. Inyestoriak ti kasasaadko isu a nagsinnangitkami. Dagus a nangaramid iti urnos tapno makatabunokami iti gimong iti dayta nga aldaw. Inabrasadakami dagiti kakabsat, ken nangaramid dagiti panglakayen kadagiti urnos a tumulong a mangipaay iti naespirituan a kasapulanmi nga agiina.”

No Kasano a Makatulong ti Sabsabali

Amin a kameng ti kongregasion ket makaipaay iti praktikal a tulong iti nagduduma a pamay-an. Kas pagarigan, masapul idi nga agbirok ni Margarita iti panggedan. Adda pamilia iti kongregasionda a nagboluntario a mangaywan kadagiti annakna kalpasan ti klaseda no kasapulan.

“Ti apresiarek unay,” kuna ni Margarita, “ket no adda kakabsat a mangkuyog kadakami nga agiina a mangasaba.” Kadagiti kasta a pamay-an, tumultulong dagiti kakabsat a ‘mangawit kadagiti pakadagsenan ti maysa ken maysa’ ket iti kasta, tungtungpalenda “ti linteg ti Kristo.”​—Gal. 6:2.

Dagidiay agsagsagaba gapu iti basol ti sabsabali pudno nga apresiarenda dagiti kasta a praktikal a tulong. Ni Monique, a pinanawan ni lakayna, masapul nga ibaklayna ti $15,000 nga utang daytoy ken ti panangpadakkel iti uppat nga annakda. Kinunana: “Nakaas-asi dagiti kakabsat. No awan ti tulongda, diak ammo no nabaelak amin dagita. Pudno nga impaayannak ni Jehova kadagiti kasayaatan a kakabsat, a nagsakripisio para kadagiti annakko. Naragsakanak a nakakita iti naespirituan a panagrang-ay dagiti annakko gapu kadagita a tulong. No kasapulak ti balakad, ipaay dayta dagiti panglakayen. No kasapulak ti kasarita, nakasaganada nga umimdeng.”​—Mar. 10:29, 30.

Siempre, ammo ti naayat a gayyem no kaano a saanna a rumbeng a dakamaten ti naladingit a kapadasan ti maysa. (Ecl. 3:7) “Kaaduanna,” kuna ni Margarita, “kaay-ayok ti makiinnestoria kadagiti kakabsat iti baro a kongregasionmi maipapan iti trabaho a panangasaba, iyad-adalanmi iti Biblia, ken annakmi​—uray ania a topiko malaksid kadagiti problemak. Apresiarek ta saanda nga ipalpalagip ti napalabasko ken tultulongandak a mangabaruanan.”

Liklikan ti Agibales

Mabalin nga ammom a saan a sika ti mapabasol iti inaramid ti asawam. Ngem no dadduma, agsakit ti nakemmo yantangay agsagsagabaka gapu iti basolna. No baybay-am a kumaro dayta, mabalin a pakapuyenna ti determinasionmo nga agtalinaed a matalek ken Jehova. Kas pagarigan, mabalin a masulisogka nga agbirok kadagiti pamay-an a makabaleska.

No madlawmo a mangrugrugikan a makarikna iti kasta, nasayaat nga utobem ti kapadasan dagiti matalek a lallaki a da Josue ken Caleb. Inrisgoda ti biagda tapno agespiada iti Naikari a Daga. Kurang ti pammati ti dadduma nga espia ken insungsongda dagiti tattao nga agsukir ken Jehova. Dadduma nga Israelita ti nanggandat a mangubor kada Josue ken Caleb idi pinadas dagitoy nga idagadag iti nasion nga agtalinaedda a matalek. (Num. 13:25–14:10) Gapu iti inaramid dagiti Israelita, nairaman da Josue ken Caleb a nagallaalla iti let-ang iti 40 a tawen, uray no awan ti basolda.

Nupay nalabit a naupay da Josue ken Caleb, saan a nagsakit ti nakemda uray no dagiti padada nga Israelita ti nakabasol. Impamaysada ketdi ti panagserbida ken Jehova. Kalpasan ti 40 a tawen iti let-ang, nagunggonaanda yantangay kaduada dagiti Levita a nakalasat iti dayta a henerasion ken nakastrekda iti Naikari a Daga.​—Num. 14:28-30; Jos. 14:6-12.

Nalabit a nabayagen nga agsagsagabaka gapu iti panangliput ti asawam. Mabalin a nagsinakayon, ngem nalabit nga agsagsagabaka pay laeng iti emosional ken pinansial a pakarigatan. Imbes a paupayka kadagita a parikut, laglagipem nga ammo ni Jehova ti kasayaatan a panangtaming kadagidiay mangigaggagara a manglabsing kadagiti pagalagadanna, kas ipakita ti napasamak kadagiti awanan pammati nga Israelita iti let-ang.​—Heb. 10:30, 31; 13:4.

Makapagballigika!

Imbes nga ipalubosmo a pakapuyennaka dagiti negatibo a kapanunotan, punuem ti isipmo kadagiti kapanunotan ni Jehova. “Nakatulong kaniak nga agballigi ti panagdengngeg kadagiti nairekord nga audio Ti Pagwanawanan ken Agriingkayo!” kuna ni Jane. “Nakapabileg met unay kaniak dagiti gimong. Ti aktibo a pannakipaset kadagiti gimong ti timmulong kaniak a manglipat kadagiti parikutko. Nakatulong pay ti pannakiramanko a mangasaba. Napabilegko ti pammatik babaen ti panangtulongko iti sabsabali a maaddaan iti pammati ken Jehova. Ken naipamaysak ti panunotko kadagiti napatpateg a bambanag gapu iti panangtulongko kadagiti iyad-adalak iti Biblia.”

Ni Monique, a nadakamat itay, kunana: “Nakapagibturak gapu iti regular a pannakigimongko ken pannakiramanko a mangasaba agingga a kabaelak. Ad-adda a simmingedkami kas pamilia ken iti kongregasion. Gapu iti napasarak, nabigbigko dagiti pagkapuyak. Naipasangoak iti pannubok ngem tinulongannak ni Jehova nga agballigi.”

Mapagballigiam met dagiti umasping a pakasuotan. Iti laksid ti saem nga itden ti panangliput, ikagumaam a tungpalen ti balakad ni Pablo: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.”​—Gal. 6:9.

[Footnotes]

[Ladawan iti panid 31]

Dagiti naliputan nga asawa apresiarenda dagidiay tumulong kadakuada iti ministerio