Determinado nga Agserbi ken Jehova!

“DIKA mapan mangaskasaba!” “Dimo aw-awisen ditoy dagiti kapammatiam!” Kakastoy ti mangmangngeg dagiti adu a Kristiano a babbai kadagiti bumusbusor nga assawada. Ngem no agserserbi dagitoy a lallaki iti armada, maipasango dagiti assawada kadagiti naisangsangayan a karit iti pammatida. (Isaias 2:4; Juan 17:16) Ngarud, kasano a makapagtalinaed dagiti kasta a Kristiano nga assawa a babbai a napigsa iti naespirituan ken aktibo iti panagserbi iti Pagarian?

Ti kinasungdo ken Jehova a Dios a nabuyogan iti determinasion ti tumultulong kadakuada nga aganus. “Ti panagkunak, ti nakatulong kaniak isu ti di maisin a determinasionko,” inlawlawag ni Yvonne, asawa ti maysa a soldado. “Ammok nga adda dagiti pamay-an a mapagballigiak ti ibubusor ni lakayko.” Wen, talaga nga adda.

Insalaysay ti maysa pay a Kristiano a babai, nga asawa ti maysa nga opisial ti armada, no kasano a ti natibker a takderna pinagbalinna pay ketdi a nalaklaka ti biag para ken lakayna. “Ammona ti eskediulko, kasta met ti eskediulna, ket apresiaren dayta dagidiay adda iti militar,” inlawlawagna. Nupay kasta, saan a nalaka ti panagtultuloyna nga agserbi ken Jehova.

Panangparmek iti Panagmaymaysa

Masansan a maipasango dagiti assawa dagiti soldado iti karit ti yaakar kalpasan ti sumagmamano laeng nga aldaw nga abiso no masapul a kumuyogda iti assawada iti destinoda nga adayo iti pagtaengan. Kalpasanna, iti kaaddana iti baro a lugar, nalaka laeng a marikna ti maysa nga isu ket agmaymaysa. Ngem di kasapulan a kasta. Adda bentaha dagidiay agserserbi ken Jehova. Ania dayta? Sigun ken Kristiano nga apostol Pedro, isu ti “intero a timpuyog dagiti kakabsat.” Riniwriw itan ti bilangda, agtigtignay dagiti Saksi ni Jehova iti 231 a pagilian kas maysa a dakkel a Kristiano a pamilia, maysa a “panagkakabsat.” Masarakanyo ida iti gistay uray sadinoman.​—1 Pedro 2:17, footnote.

Ni Susan, a kellaat a pinanawanna ti lugar a pagtataenganda, kimmuyog nga agnaed iti air force base a nakaidestinuan ni lakayna. Kabarbarona pay laeng iti pammati ken parparitan ti di mamati a lakayna a makiraman iti Nakristianuan a ministerio, kinunana: “Napanak a dagus kadagiti lokal a panaggigimong, ket nakalangen ken nakasaritak sadiay dagiti sumagmamano a kakabsat a babbai. Sipupudno a maikunak a daytoy a pannakitimpuyog ti nangpabileg kaniak.”

No dadduma ti panagmaymaysa ti pakaigapuan ti panagladingit. Agpapan pay, makaliwliwa ti naimbag a damag. Ni Glenys, maysa a kabsat a babai a taga Inglaterra a kimmuyog ken lakayna idi a naidestino idiay ballasiw taaw, kinunana: “Idi talaga a malmaldayak, a di ninamnama, sinuratannak ti maysa a tao a naam-ammok adu a tawenen ti napalabas idi addaak a mismo iti armada ket kinunana nga isu ket nabiit pay a nabautisaran kas maysa kadagiti Saksi ni Jehova. Dayta ti nangpabileg kaniak iti tumutop a tiempo.”

Nasarakan ni Jane, a kadua ni lakayna a napan idiay Kenya, a nagpateg dagiti Nakristianuan a panaggigimong, uray no maang-angay dagitoy kadagiti pagsasao a dina maawatan. “Ammok a kayat ni Jehova nga addaak ditoy,” inlawlawagna. “Addaak iti denna dagiti naespirituan a kakabsatko, ken isuda ti nangpabpabileg kaniak iti naespirituan. Inabrasadak, ket nariknak a kaslakam maysa a pamilia.”

Ni Jane ket maysa laeng kadagiti adu nga adda kadagitoy a kasasaad a nakatakuat nga adda gayam dagiti naespirituan a kakabagianna a dina man la ammo!​—Marcos 10:29, 30.

Natibker iti Sango ti Ibubusor

“Dikay pagarupen nga immayak mangikabil ti talna iti daga,” kinuna ni Jesus. “Immayak a mangikabil, saan a ti talna, no di ket ti maysa a kampilan.” (Mateo 10:34) Ania ti kayatna a sawen? Uray iti uneg ti pamilia, a mainanama nga adda talna, mabalin a mapasamak ti “kellaat a panangibasibas iti kampilan,” kinuna ni A. T. Robertson iti Word Pictures in the New Testament. “Pudno unay,” kinuna ni Jesus, “dagiti kabusor ti maysa a tao isudanto dagiti tattao iti bukodna a sangakabbalayan.” (Mateo 10:36) Pudno la unay dagitoy a sasao no ti maysa nga asawa ket bumusbusor iti kinapudno!

Idi rinugian ni Diane ti makipagadal ti Biblia kadagiti Saksi ni Jehova, saan a naay-ayo ni lakayna, a maysa nga opisial ti air force. Ania ti epekto daytoy iti relasionda? “Kas man la maysa daydi a bloke ti yelo nga adda iti nagbaetanmi,” inlawlawag ni Diane. “Naragsak ti panagtiponmi. Kellaat nga addakam laengen iti maymaysa a sangakabbalayan.” Ngarud, kasano a napagballigianna daytoy? “Nakatulong unay kaniak ti natibker a pammati ken determinasion, agraman ti tulong nga aggapu ken Jehova ken iti espirituna.” Impapuso ni Diane ti ulidan ni mammadto Daniel a nailanad iti Biblia.

Idi adda a nakayawan idiay Babilonia ken naidasaran kadagiti taraon a di maawat ti maysa nga adipen ti Dios, ‘inkeddeng [ni Daniel] iti pusona a di patulawan kadagiti agkakaimas a taraon ti ari.” Wen, natibker ti pangngeddeng ni Daniel. Inkeddengna iti pusona a di patulawan kadagiti kasta a taraon. Anian a kinatibker ti impakitana idi nga “intultuloyna nga indawat iti pangulo dagiti eunuko ti saanna koma a pannakatulaw”! Ti resulta? Binendisionan ni Jehova ti di maisin a takderna.​—Daniel 1:8, 9, 17.

Kasta met itatta, mabalin nga ibilin ti maysa a bumusbusor nga asawa a lalaki ken ni baketna nga isardengna ti tumabuno kadagiti gimong ti kongregasion. Aniat’ rumbeng nga aramiden ti asawa a babai? Naipasango ni Jane iti kastoy a situasion. Inlawlawagna: “Pulos a diak simmuko iti sidong ti panangpilit. Ammok a diak mabalin ti makikompromiso. Masapul nga ipakitak no kasano kapateg kaniak dagiti gimong.” Binendisionan ni Jehova ti determinasionna bayat nga intultuloyna ti nakigimong.

“Pinadasnak a lapdan ni lakayko a mapan makigimong, ngem saan a nagbayag dayta,” kuna ni Glenys. “Napanak latta. No sumangpetak idiay balay, kabilennak no kua, ket no dadduma saannak a pagunian.” Ngem inan-anusanna dayta, a masansan ti panagkarkararagna. Kasta met, kanayon a makipagkararag kenkuana ti dua kadagiti panglakayen ti kongregasion, a nangpabileg iti kasta unay kenkuana nga agtultuloy a tumabuno.​—Santiago 5:13-15; 1 Pedro 2:23.

No dadduma mabalin a sugsogan dagiti superior ti asawa a lalaki nga upayenna ni baketna a mangikaskasaba iti naimbag a damag. Nasarakan ni Diane a masapul nga ilawlawagna ken ni lakayna dagiti bambanag a rumbeng nga ipangpangrunana. “Nakasaganaak,” kinunana, “a mangsango iti pagbanagan ti panagtultuloyko a mangasaba.” Anian a maipada daytoy iti takder dagiti apostol! (Aramid 4:29, 31) Nupay kasta, isu ket naannad unay iti panangasabana. Kinunana: “Masansan nga awisek dagiti gagayyemko nga agkape ket tukonak ti tunggal maysa iti libro a Kinapudno.”​—Mateo 10:16; 24:14.

Panagpasakop nga Awan ti Pannakikompromiso

Nupay madukotanda gapu iti saanda a panagkinnaawatan kadagiti assawada, sikikita dagiti Kristiano nga assawa a babbai iti masanguanan ken agtalekda ken Jehova. Daytoy ti tumultulong kadakuada a mangsalimetmet iti natimbeng a panangmatmat. Ar-aramidenda ti amin a kabaelanda a mangsuportar kadagiti assawada ngem saanda nga ikomkompromiso ti pammatida. Iti panangaramidda iti dayta, sursurotenda ti naipaltiing a pammagbaga ni Pedro: “Dakayo nga assawa a babbai, agpasakopkayo kadagiti bukodyo nga assawa.” (1 Pedro 3:1) Iti The Amplified New Testament, kastoy ti pannakaiyebkas daytoy a balakad ti apostol: “Agpasakopkayo a kas nababbaba ken agpannuray kadakuada, ken makibagaykayo kadakuada.” Imutektekanyo no kasano a sinurot ni Jane daytoy a pammagbaga. “Kinuna ni lakayko nga aniaman ti kayatko nga aramiden saan koma nga isu ti agbalin a lapped iti karerana,” inlawlawagna. “Isu nga inkagumaak ti nangsapul kadagiti pamay-an tapno matulongak.”

Immannugot dagiti dadduma a Kristiano nga assawa a babbai a dumar-ay kadagiti sosial a panagtitipon a nakaawisan ti assawada. Ngem determinadoda latta a di mangikompromiso iti pammatida. Kinasarita ni Jane ni lakayna maipapan iti daytoy. Siaayat nga inlawlawagna a kayatna ti dumar-ay ngem dina kayat a ti kaaddana sadiay ti agbalin a pakaigapuan ti pannakaibabain ni lakayna. “Ammok a no dadduma mainanama a tumakder dagiti amin nga adda sadiay ken makipaset iti panagitag-ay (toast). Naadalko a ni laeng Jehova ti rumbeng a pangidatonan iti kinasungdo, ket ti panagitag-ay ket saan laeng a basta panangipakita iti panagraem. Nabigbig ni lakayko no kasano nga agbalin a nakababain ti situasion, isut’ gapuna a kinunana laengen: ‘Saankan nga umay!’ Nagtungpalak.”

Iti sabali a bangir, kimmuyog ni Glenys ken ni lakayna iti kasta nga okasion, ngem sisisiput kadagiti opisial nga adda iti kabesera ti lamisaan. Idi makitana ida nga agsagsagana nga agitag-ay, siaannad a pimmanaw a nagturong iti kasilias! Wen, nakibagay dagitoy a babbai ngem pulos a saanda a nakikompromiso.

“Magun-odan Ida nga Awan ti Sao”

“No mapasayaatko ti kababalinko kas asawa a babai, makitanto ni lakayko a ti kinapudno ket talaga a balbaliwannak,” kinuna ni Yvonne. Isut’ gapuna nga inulit-ulitna a binasa ti kapitulo iti libro a Biag ti Pamiliayo a napauluan “Ti Asawa a Babai nga Inay-ayat Unay.”a “Inusigko a naimbag ti material iti sidong ti subtitulo a ‘Dagiti Managsangit, Dagiti Managreklamo’! Ngem nasarakak a bayat nga ikagkagumaanak ti makisarita ken ni lakayko, kumarkaro ketdi dagiti bambanag.” Kamaudiananna, nupay kasta, isut’ nagballigi a timmulong ken ni lakayna nga agserbi ken Jehova. Kasano? Babaen ti panangiyaplikarna iti prinsipio a naipaay idiay 1 Pedro 3:1, a dagiti assawa a lallaki mabalin a “magun-odan ida nga awan ti sao.”

Ti wagas a panangasikaso dagiti Kristiano a babbai iti pamiliada dakkel ti maitulongna iti pannakaitandudo ti Kinakristiano kadagiti dadduma. “Inkagumaanak a pagbalinen ti kinapudno a makaay-ayo,” kuna ni Diane. “No mapanak makigimong, marikna ni lakayko nga isu ket maiputputong, isut’ gapuna a bilinek dagiti annakmi a saysayaatenda ti kababalinda no sumangpetkami idiay balay. Inkagumaanak met a pakitaan ni lakayko iti naipangruna nga atension no kasta a sumangpetkami.” Nagin-inut a nagbalbaliw ti kababalin ni lakayna bayat ti panangipangagna iti naayat a pannakaseknan ti pamiliana.

Makatulong met dagiti pada nga adipen ni Jehova. Kinuna ni Jane a kaay-ayo ni lakayna ti makikadua kadagiti Saksi a misionero a naam-ammona idiay Kenya. “Nakigayyemda kenkuana ket pagsasaritaanda no kua ti maipapan iti football, ken managpasangbayda unay. Namin-adu nga inawisdakami dagiti misionero iti pagtaenganda tapno aglalanglangkami.” Idi kamaudiananna, inlawlawag ni lakayna: “Naiduman ti panangmatmatko iti pammati ni Jane. Nasaririt unay dagiti gagayyemna, a kabaelanda ti makisarita maipapan iti nadumaduma a topiko.” Kasta met, nagbalbaliw ti panangmatmat ti lakay ni Diane iti kinapudno. Idi nadadaelan ti kotsena, isut’ tinulongan ti maysa nga agtutubo a Saksi. “Talaga a nasdaawak iti dayta,” kinunana.

Siempre, saan nga amin nga assawa ket maallukoy iti kinapudno. Kasano ngaruden? Mangipapaay ni Jehova iti pannaranay tapno makapagibtur dagiti matalek nga agserserbi kenkuana. (1 Corinto 10:13) Usigenyo ti pammaregta ni Glenys kadagidiay adda iti kasasaad a kas kenkuana: “Pulos a dikay pagduaduaan a ni Jehova ti Namunganay iti panagasawa ket kayatna nga agtalinaed dagiti agassawa. Isu nga uray no ania ti aramiden ti asawa a lalaki wenno ibubusor nga awatenyo manipud kadagiti sabsabali, pulos a dinakay baybay-an ni Jehova a kumapuy.” Nupay saan pay nga agdaydayaw ti lakayna ken ni Jehova, simmayaaten ti pannakilangenna kenkuana ken ti panangmatmatna iti kinapudno.

‘Agmula iti Lua; Agapit iti Rag-o’

Wen, determinado dagitoy a Kristiano a babbai nga agserbi ken Jehova. No addakayo iti umasping a kasasaad, kasta met koma ti determinasionyo. Laglagipenyo ti pammaregta nga: “Agbutengka ken Jehova a Diosmo. Agserbikanto kenkuana, ket kumpetka kenkuana.”​—Deuteronomio 10:20.

“Ti mapan ket agsangsangit, nga agawit iti bin-i nga imulana, awan duadua nga agawidto a siraragsak, nga ikuyogna dagiti binettekna,” kuna ti salmista. (Salmo 126:6) “Adu a lua ti agarubos bayat nga ikagumaam nga ipakita iti asawam ti kinapudno, siuulimek man wenno sipipigsa,” binigbig ti maysa a Saksi. “Ngem iti kamaudiananna agsangitkanto iti rag-o agsipud ta uray no dina awaten ti kinapudno, bendisionan ni Jehova ti panagreggetmo.”

Pudno a makomendaran dagiti amin a simamatalek nga agserserbi ken Jehova iti laksid ti ibubusor iti pagtaengan. Maikarida iti pannaranay ken ayat. Sapay koma ta salimetmetanda ti di maisin a takderda, a determinadoda nga agserbi ken Jehova!

[Footnote]

[Ladawan iti panid 28]

Ti panagadal a buyogen ti panagkararag pabilgenna ti determinasion ti maysa a Kristiano