Sagrapenyo Dagiti Bendision nga Iyeg ti Ari nga Idaldalan ti Espiritu ti Dios!
“Agtaengto kenkuana ti espiritu ni Jehova.”—ISA. 11:2.
1. Ania ti inyebkas ti dadduma a pakaseknanda maipapan kadagiti parikut ti lubong?
“ITI lubong a nariribuk iti politika, kagimongan ken aglawlaw, makapagbayag pay ngata ti sangatauan iti sumaruno a 100 a tawen?” Dayta ti insaludsod ti astropisiko a ni Stephen Hawking idi 2006. Kuna ti maysa nga artikulo iti magasin a New Statesman: “Ditay naikkat ti kinapanglaw ken ditay met naipasdek ti sangalubongan a talna. Ti ketdi kasunganina ti napasamak. Saan a gapu ta awan ti inaramidtayo. Pinadastayo ti amin a kita ti gobierno, manipud iti komunismo agingga iti kapitalismo; ti Liga de Naciones ken ti adu a nuklear nga igam a panglapped iti gubat. Nakidangadangtayon iti nakaad-adu a gubat tapno maipakita a kabaelantayo a pasardengen ti gubat.”
2. Iti din agbayag, kasano nga usaren ni Jehova ti kalinteganna a mangituray iti daga?
2 Dagita a komento ket saan a pakasdaawan dagiti adipen ni Jehova. Ibaga kadatayo ti Biblia a saan a naparsua ti tao a mangituray iti bagina. (Jer. 10:23) Ni Jehova laeng ti maikari a Soberano. Gapuna, Isu ti addaan iti kalintegan a mangipasdek kadagiti pagalagadan, mangilawlawag iti panggep ti biag a masapul a suroten, ken mangigiya kadatayo iti dayta a panggep. Kanayonanna, iti din agbayag, usarenna ti autoridadna a mamagpatingga iti napaay a panangituray ti tao iti bagina. Dadaelennanto met amin dagidiay nangilaksid iti kalinteganna a mangituray ta gapu kadakuada, nagtalinaed dagiti tattao nga adipen ti basol, kinaimperpekto, ken ti “dios daytoy a sistema ti bambanag,” ni Satanas a Diablo.—2 Cor. 4:4.
3. Ania ti impadto ni Isaias maipapan iti Mesias?
3 Iti Paraiso a baro a lubong, ipakitanto ni Jehova ti naayat a panangiturayna iti sangatauan babaen ti Mesianiko a Pagarian. (Dan. 7:13, 14) Impadto ni Isaias maipapan iti Ari dayta a Pagarian: “Addanto rummuar a saringit manipud iti pungdol ni Jesse; ket manipud kadagiti ramutna nabunganto ti maysa a tarubong. Ket agtaengto kenkuana ti espiritu ni Jehova, ti espiritu ti kinasirib ken ti pannakaawat, ti espiritu ti pammatigmaan ken ti kinamannakabalin, ti espiritu ti pannakaammo ken ti panagbuteng ken Jehova.” (Isa. 11:1, 2) Kadagiti ania a pamay-an a ti nasantuan nga espiritu ti Dios pinagbalinna ti “saringit manipud iti pungdol ni Jesse”—ni Jesu-Kristo—a kualipikado a mangituray iti sangatauan? Ania dagiti bendision nga itden ti panangiturayna? Ken ania ti masapul nga aramidentayo tapno masagraptayo dagita a bendision?
Pinagbalin ti Dios a Kualipikado nga Agturay
4-6. Ania a nagpateg a pannakaammo ti tumulong ken Jesus nga agserbi kas masirib ken naasi nga Ari, Nangato a Padi, ken Ukom?
4 Kayat ni Jehova nga agbalin a perpekto dagiti iturayanna a tattao iti sidong ti panangiwanwan ti pudpudno a masirib ken naasi nga Ari, Nangato a Padi, ken Ukom. Dayta ti makagapu a ni Jesu-Kristo ti pinili ti Dios, a babaen ti nasantuan nga espiritu nagbalin a kualipikado kadagiti nakapatpateg nga annongen. Usigenyo ti sumagmamano a makagapu no apay a naan-anay a maitungpalto ni Jesus ti inted-Dios nga annongenna.
5 Naan-anay ti pannakaammo ni Jesus maipapan iti Dios. Awanen ti sabali pay a kabayagan a makaam-ammo iti Ama, nalabit iti binilbilion a tawen, no di laeng ti bugbugtong nga Anak. Bayat kadagidi a tiempo, naaddaan ni Jesus iti naan-anay a pannakaammo maipapan ken Jehova, isu a nadeskribir kas “ladawan [a mismo] ti di makita a Dios.” (Col. 1:15) Kinuna ni Jesus: “Ti nakakita kaniak nakitana met ti Ama.”—Juan 14:9.
6 Ni Jesus ti sumaruno ken Jehova nga addaan iti naan-anay a pannakaammo maipapan iti amin a parsua, a pakairamanan ti sangatauan. Kuna ti Colosas 1:16, 17: “Babaen kenkuana [ti Anak ti Dios], amin a sabsabali pay a bambanag naparsuada iti langlangit ken iti rabaw ti daga, ti bambanag a makita ken ti bambanag a di makita . . . Kasta met, isu addan kasakbayan ti amin a sabsabali pay a bambanag ket babaen kenkuana napaadda ti amin a sabsabali pay a bambanag.” Panunotenyo laengen dayta! Kas “nasigo a managobra” ti Dios, nakiraman ni Jesus iti dadduma pay nga aspeto ti panamarsua. Gapuna, ammona ti tunggal detalye ti intero nga uniberso, a pakairamanan ti nakaskasdaaw nga utek ti tao. Wen, talaga a ni Kristo ti personipikasion ti sirib!—Prov. 8:12, 22, 30, 31.
7, 8. Kasano a ti espiritu ti Dios tinulonganna ni Jesus iti ministeriona?
7 Napulotan ni Jesus iti nasantuan nga espiritu ti Dios. “Ti espiritu ni Jehova adda kaniak,” kinuna ni Jesus, “agsipud ta pinulotannak a mangideklara ti naimbag a damag kadagiti napanglaw, imbaonnak tapno ikasaba ti pannakaluk-at kadagiti kautibo ken ti pannakaisubli ti panagkita kadagiti bulsek, tapno dagidiay nailupitlupit papanenna buyogen ti panangluk-at, tapno ikasaba ti naparaburan a tawen ni Jehova.” (Luc. 4:18, 19) Agparang nga idi nabautisaran ni Jesus, impalagip kenkuana ti nasantuan nga espiritu dagiti nasursurona sakbay a nagbalin a tao, agraman ti kayat ti Dios nga itungpalna bayat ti ministeriona ditoy daga kas Mesias.—Basaen ti Isaias 42:1; Lucas 3:21, 22; Juan 12:50.
8 Gapu ta tinulongan ti nasantuan nga espiritu ken perpekto ti bagi ken isip ni Jesus, isu ti katan-okan a tao a nagbiag ditoy daga ken isu pay ti naindaklan a Mannursuro. Kinapudnona, ‘nagsiddaaw dagiti dimngeg kenkuana iti wagas ti panangisurona.’ (Mat. 7:28) Ammona ti kangrunaan a makagapu kadagiti parikut ti sangatauan—ti basol, kinaimperpekto, ken ti kinaawan ti pannakaammo maipapan iti Dios. Kasta met, gapu ta mabasana ti puso dagiti tattao, ammona no kasano ti rebbeng a panangtratona kadakuada.—Mat. 9:4; Juan 1:47.
9. Kasano a bumileg ti panagtalekyo ken Jesus kas Agturay babaen ti panangutobyo iti panagbiagna ditoy daga?
9 Nagbiag ni Jesus kas tao. Ti panagbiagna kas tao ken ti nasinged a pannakilangenna kadagiti imperpekto a tattao ket dakkel ti naitulongna ken Jesus tapno agbalin a kualipikado kas Ari. Insurat ni apostol Pablo: “[Ni Jesus] rebbengenna ti agbalin a kas iti ‘kakabsatna’ iti amin a bambanag, tapno isu agbalin a naasi ken matalek a nangato a padi iti bambanag maipapan iti Dios, tapno mangidaton iti pangikappia a sakripisio maipaay iti basbasol dagiti tattao. Gapu ta isu nagsagaba idi masubsubok, kabaelanna ti bumadang kadagidiay masubsubok.” (Heb. 2:17, 18) Gapu ta ‘nasubok’ ni Jesus, ammona ti rikna dagidiay agpaspasar iti suot. Nalawag a naiparangarang ti asi ni Jesus bayat ti ministeriona ditoy daga. Nalaka nga asitgan dagiti masakit, baldado, mairurrurumen, ken uray dagiti ubbing. (Mar. 5:22-24, 38-42; 10:14-16) Immasideg met kenkuana dagiti naemma ken agtarigagay a makasursuro maipapan iti Dios. Ngem dagidiay natangsit, arogante, ken ‘awanan panagayat iti Dios’ inlaksid, ginura, ken binusorda ni Jesus.—Juan 5:40-42; 11:47-53.
10. Ania ti kangrunaan a pamay-an a pinaneknekan ni Jesus ti panagayatna kadatayo?
10 Inted ni Jesus ti biagna agpaay kadatayo. Nalabit a ti kangrunaan a pammaneknek a ni Jesus ti kualipikado nga Agturay ket ti kinatulokna a matay agpaay kadatayo. (Basaen ti Salmo 40:6-10.) Kinuna ni Kristo: “Awan asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.” (Juan 15:13) Wen, inted ni Jesus ti mismo a biagna agpaay iti sangatauan. Maisupadi dayta kadagiti imperpekto nga agtuturay a masansan a nanam-ay ti panagbiagda gapu kadagiti maalada kadagiti iturayanda.—Mat. 20:28.
Naautorisaran a Mangyaplikar iti Subbot
11. Apay a naan-anay a makapagtalektayo ken Jesus kas Mannubbottayo?
11 Kas Nangato a Padi, anian a maitutop a ni Jesus ti mangidaulo a mangyaplikar kadagiti gunggona nga itden ti daton a subbot! Kinapudnona, bayat ti ministerio ni Jesus ditoy daga, nangted kadagiti panirpatan no ania ti aramidenna kas Mannubbot bayat ti Sangaribu a Tawen a Panagturayna, a matagiragsaktayo no agtalinaedtayo a matalek. Pinaimbagna dagiti masakit ken baldado, pinagungarna dagiti natay, pinakanna ti adu a tattao, ken kinontrolna pay ti puersa ti nakaparsuaan. (Mat. 8:26; 14:14-21; Luc. 7:14, 15) Kanayonanna, inaramidna dagita saan a tapno ipasindayagna ti autoridad ken pannakabalinna no di ket tapno ipakitana ti asi ken ayatna. Idi nagpakaasi kenkuana ti maysa nga agkukutel a paimbagenna, kinuna ni Jesus: “Kayatko.” (Mar. 1:40, 41) Ipakitananto ti kasta met laeng nga asi iti intero a lubong bayat ti Milenio a Panagturayna.
12. Kasano a matungpalto ti Isaias 11:9?
12 Ni Kristo ken ti kakaduana nga agturay itultuloydanto ti trabaho a panangisuro maipapan iti Dios nga inrugina agarup 2,000 a tawen ti napalabasen. Iti kasta, matungpalton dagiti sasao iti Isaias 11:9: “Ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” Sigurado a karaman iti dayta a panangisuro dagiti instruksion no kasano nga aywanan ti daga ken ti nagadu a parsua, kas iti naibilin idi ken Adan nga aramidenna. Iti ngudo ti 1,000 a tawen, matungpalton ti orihinal a panggep ti Dios a nailanad iti Genesis 1:28, ken naan-anayton a mayaplikar ti daton a subbot.
Naautorisaran a Mangukom
13. Kasano nga impakita ni Jesus ti panagayatna iti kinalinteg?
13 Ni Kristo ti “Maysa nga inkeddeng ti Dios nga agbalin nga ukom dagiti sibibiag ken dagiti natay.” (Ara. 10:42) Anian a makaliwliwa a maammuan nga awan ti kinadakes ken Jesus, a ti kinalinteg ken kinamatalek ket arigna naibarikes kadagiti lomona! (Isa. 11:5) Kagurana ti kinaagum, kinamanaginsisingpet, ken amin a kinadakes, ken kinondenarna dagidiay saan a maseknan kadagiti agsagsagaba. (Mat. 23:1-8, 25-28; Mar. 3:5) Kanayonanna, saan a naallilaw ni Jesus kadagiti makinruar a langa “ta isu ammona no ania ti adda iti tao.”—Juan 2:25.
14. Iti ania a pamay-an nga ipakpakita ita ni Jesus ti panagayatna iti kinalinteg ken kinahustisia, ken ania ti nasken nga isaludsodtayo iti bagitayo?
14 Agtultuloy nga ipakpakita ni Jesus ti panagayatna iti kinalinteg ken kinahustisia babaen ti panangiwanwanna iti kadakkelan pay laeng a trabaho a panangasaba ken panangisuro iti pakasaritaan ti lubong. Awan ti tao, natauan a gobierno, ken dakes nga espiritu a makalapped iti pannakairingpas daytoy a trabaho agingga a saan nga ibaga ti Dios a nalpasen. Gapuna, naan-anay a makapagtalektayo nga inton malpas ti Armagedon, agari ti kinahustisia ti Dios. (Basaen ti Isaias 11:4; Mateo 16:27.) Isaludsodyo iti bagiyo: ‘Iparparangarangko kadi ti kababalin ni Jesus kadagiti tattao iti ministeriok? Ar-aramidek kadi ti amin a kabaelak nga agserbi ken Jehova uray no limitado ti maaramidak gapu iti salun-at wenno kasasaadko?’
15. Ania ti makatulong kadatayo a mangaramid iti amin a kabaelantayo nga agserbi iti Dios?
15 Makapagserbitayo iti Dios iti amin a kararua no sipapanunottayo a ti panangasaba ket trabaho ti Dios. Imbilinna dayta; iwanwanwanna babaen ti Anakna; ken pabpabilgenna dagiti makiramraman iti dayta babaen iti nasantuan nga espiritu. Ipatpategyo kadi ti pribilehioyo nga agserbi kas katrabahuan ti Dios a kadua ti Anakna nga idaldalan ti espiritu? Ni laeng Jehova ti makabael a mangtignay iti nasurok a pito a milion a tattao, a kaaduan kadakuada ket maibilang nga “awan adalna” ken ordinario, a mangiranranud iti mensahe ti Pagarian kadagiti tattao iti 236 a dagdaga.—Ara. 4:13.
Bendisionanyo ti Bagiyo Babaen ken Kristo!
16. Ania ti ipasimudaag ti Genesis 22:18 maipapan iti bendision ti Dios?
16 Ni Jehova kinunana ken Abraham: “Babaen ti bin-im pudno unay a dagiti amin a nasion iti daga bendisionandanto ti bagbagida maigapu iti kinapudno nga immimdengka iti timekko.” (Gen. 22:18) Ipasimudaag dayta a dagiti mangipatpateg iti panagserbida iti Dios ket makapagtalekda a masagrapdanto dagiti bendision nga ipaay ti Mesianiko a Bin-i. Ken sireregta nga agserserbida ita bayat a sipapanunotda kadagita a bendision.
17, 18. Ania a kari ni Jehova ti mabasatayo iti Deuteronomio 28:2, ken ania ti kaipapanan dayta kadatayo?
17 Kinuna ti Dios iti bin-i ni Abraham, ti nasion ti Israel: “Umayto kenka dagitoy amin a bendision [a nadakamat iti Linteg ti tulag] ket kamakamendaka, agsipud ta umim-imdengka iti timek ni Jehova a Diosmo.” (Deut. 28:2) Agaplikar met dagita a sasao kadagiti adipen ti Dios ita. No kayatyo a bendisionannakayo ni Jehova, itultuloyyo ti ‘umimdeng’ iti timekna. Iti kasta, ‘umayto kadakayo dagiti bendisionna ket kamakamendakayo.’ Ngem ania ti ramanen ti ‘panagimdeng’?
18 Ti panagimdeng ramanenna ti panangipapuso iti nailanad iti Sao ti Dios ken ti ipapaayna a naespirituan a taraon. (Mat. 24:45) Ramanen pay dayta ti panagtulnog iti Dios ken iti Anakna. Kinuna ni Jesus: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.” (Mat. 7:21) Ken ti panagimdeng iti Dios kaipapananna ti situtulok a panagpasakup iti urnos nga impasdekna, ti kongregasion Kristiano nga addaan kadagiti nadutokan a panglakayen, dagiti “sagut a tattao.”—Efe. 4:8.
19. Kasano a magun-odantayo ti bendision?
19 Karaman kadagiti “sagut a tattao” ket dagiti kameng ti Bagi a Manarawidwid, nga agserserbi kas pannakabagi ti intero a kongregasion Kristiano. (Ara. 15:2, 6) Kinapudnona, ti kababalin nga ipakpakitatayo kadagiti naespirituan a kakabsat ni Kristo ti maysa kadagiti pakaibatayan ti pannakaukomtayo inton umay ti dakkel a rigat. (Mat. 25:34-40) Gapuna, ti maysa a pamay-an a magun-odtayo ti bendision ket babaen ti nasungdo a panangsuportatayo kadagiti pinulotan ti Dios.
20. (a) Ania ti maysa a napateg a responsabilidad dagiti “sagut a tattao”? (b) Kasanotayo a maipakita nga ap-apresiarentayo dagitoy a kakabsat?
20 Karaman met kadagiti “sagut a tattao” dagiti kameng ti Komite ti Sanga, agdaldaliasat a manangaywan, ken papanglakayen ti kongregasion—aminda ket dinutokan ti nasantuan nga espiritu. (Ara. 20:28) Ti kangrunaan a responsabilidad dagitoy a kakabsat ket ti panangpabileg iti ili ti Dios ‘agingga a makagteng ti amin iti panagmaymaysa iti pammati ken iti umiso a pannakaammo iti Anak ti Dios, iti maysa a nataenganen a tao, iti rukod ti kinatayag ti kinanaan-anay ti Kristo.’ (Efe. 4:13) Pudno, imperpektoda a kas kadatayo. Ngem mabendisionantayo no apresiaren ken ipangagtayo ti naayat a panangipastorda.—Heb. 13:7, 17.
21. Apay a nakapatpateg nga agtulnogtayo itan iti Anak ti Dios?
21 Iti mabiiten, dadaelento ni Kristo ti dakes a sistema ni Satanas. Inton dumteng dayta, nakadepende ken Jesus ti biagtayo gapu ta isu ti inautorisaran ti Dios a mangidalan iti naipadto a “dakkel a bunggoy” nga agturong kadagiti “ubbog ti dandanum ti biag.” (Apoc. 7:9, 16, 17) Gapuna, aramidentayo ti amin a kabaelantayo a situtulok nga agpasakup ken mangipateg iti Ari nga idaldalan ti espiritu ni Jehova.
Ania ti Naadalyo Manipud iti . . .
• Aramid 10:42?
[Ladawan iti panid 17]
Naiparangarang ti asi ni Jesus idi pinagungarna ti balasitang ni Jairo
[Dagiti Ladawan iti panid 18]
Iwanwanwan ni Jesu-Kristo ti kadakkelan a trabaho a panangasaba iti pakasaritaan ti tao