Salsaludsod Dagiti Agbasbasa
Apay a nakapungtot ni Moises kadagiti annak ni Aaron a da Eleazar ken Itamar kalpasan ti ipapatay dagiti kakabsatda a da Nadab ken Abihu, ken kasano a bimmaaw ti pungtotna?—Lev. 10:16-20.
Kalpasan unay a naisaad ti kinapadi maipaay iti panagserbi iti tabernakulo, pinapatay ni Jehova ti dua nga annak ni Aaron a da Nadab ken Abihu gapu ta nagidatonda iti di mayalubog nga apuy iti sanguanan ni Jehova. (Lev. 10:1, 2) Imbilin ni Moises kadagiti sibibiag nga annak ni Aaron a saanda a pagladingitan ti ipapatay dagiti kakabsatda. Di nagbayag kalpasanna, nakapungtot ni Moises kada Eleazar ken Itamar gapu ta saanda a kinnan ti kalding a daton gapu iti basol. (Lev. 9:3) Apay a kasta ti reaksion ni Moises?
Dagiti linteg nga inted ni Jehova ken ni Moises espesipiko a dakamatenna a ti padi a mangidatag iti daton gapu iti basol masapul a mangan iti daton iti paraangan ti tolda ti gimong. Ti panangaramidna iti dayta kaipapananna a sungsungbatanna ti basol dagidiay nagidaton. Ngem saan a mabalin a kanen ti daton no ti dadduma a dara dayta ket naipan iti Nasantuan a Disso, ti umuna a benneg ti santuario. Imbes ketdi, masapul a mapuoran dayta.—Lev. 6:24-26, 30.
Agparang a kalpasan dayta a nakalkaldaang a pasamak, sinigurado ni Moises a maannurot ti amin nga imbilin ni Jehova. Idi naammuan ni Moises a napuoranen ti kalding a daton gapu iti basol, sipupungtot a sinaludsodna kada Eleazar ken Itamar no apay a dida kinnan dayta kas naibilin, idinto ta ti dara dayta ket saan a naidatag iti sanguanan ni Jehova iti Nasantuan a Disso.—Lev. 10:17, 18.
Sinungbatan ni Aaron ti saludsod ni Moises yantangay agparang nga inanamonganna ti inaramid da Eleazar ken Itamar. Gapu iti pannakapapatay ti dua nga annakna, mabalin a pinanunot ni Aaron nga awan kadakuada ti maikari a mangan iti naidaton iti dayta nga aldaw. Nalabit impapanna a di anamongan ni Jehova ti pannanganda iti dayta, nupay saanda a direkta a karaman iti basol a naaramidan da Nadab ken Abihu.—Lev. 10:19.
Mabalin a ti kangrunaan nga inrason ni Aaron ket rumbeng a nagan-annad koma dagiti miembro ti pamiliana bayat ti damo a panagannongda kas papadi, uray iti kabassitan a detalye tapno maparagsakda ni Jehova. Ngem tinabbaawan da Nadab ken Abihu ti nagan ni Jehova isu a gimmil-ayab ti unget ti Dios kadakuada. Gapuna, impapan ni Aaron a dagiti miembro ti napadian a pamilia a nakaaramid iti basol ket rumbeng a dida mangan iti nasantuan a daton.
Agparang nga inakseptar ni Moises ti sungbat ti kabsatna ta kunaen ti salaysay: “Idi nangngeg dayta ni Moises, ngarud nakapnek dayta kadagiti matana.” (Lev. 10:20) Agparang nga inakseptar met ni Jehova ti sungbat ni Aaron.