Ipadto Kadi ti Biblia ti Masanguanan?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

1. Espesipiko kadi dagiti padto iti Biblia?

Ti laeng Mannakabalin-amin a Dios ti makakita iti amin a mapasamak iti masanguanan. (Amos 3:7) Kas pagarigan, nabayagen nga impadtona ti idadateng ti Mesias, wenno Kristo. Agtaud ti Mesias iti kaputotan ti matalek a lalaki a ni Abraham. Agturayto ken ipaayna ti perpekto a biag kadagiti natulnog a tattao ket awanton ti agsakit. (Genesis 22:18; Isaias 53:4, 5) Naipadto a mayanak ti Mesias iti Betlehem.​—Basaem ti Mikias 5:2.

Ni Jesus ti nagbalin a Mesias. Nasurok a 700 a tawen sakbayna, impadto ti Biblia a maysa a birhen ti mangipasngay iti Mesias. Naipadto met a maum-umsi, itedna ti biagna agpaay iti basbasol ti adu, ken maitabon a kadua dagiti nabaknang. (Isaias 7:14; 53:3, 9, 12) Nasurok a 500 a tawen sakbayna, kuna met ti Biblia a sumrekto ti Mesias iti Jerusalem a nakasakay iti asno ken maliputan babaen ti 30 a kapisi a pirak. Natungpal amin dagitoy a detalye.​—Basaem ti Zacarias 9:9; 11:12.

2. Ipadto kadi ti Dios dagiti eksakto a petsa?

Nasurok a 500 a tawen sakbayna, impadto ti Biblia ti eksakto a tawen a panagparang ti Mesias. Lumabas ti simboliko a 7 a lawas sa sumaruno ti 62 a lawas, nga agdagup iti 69 a lawas. Ti tunggal “lawas” katupagna ti pito a tawen. No kasta, 483 a tawen ti katupag ti naipadto a 69 a lawas. Kaano a nangrugi dayta? Sigun iti Biblia, nangrugi dayta idi dimteng iti Jerusalem ni Nehemias nga adipen ti Dios ket inrugina a bangonen manen ti siudad. Ipamatmat ti pakasaritaan ti Persia a napasamak dayta idi 455 B.C.E. (Nehemias 2:1-5) Eksakto a nabautisaran ni Jesus kas Mesias 483 a tawen kalpasanna, idi tawen 29 C.E.​—Basaem ti Daniel 9:25.

3. Matungtungpal kadi itan dagiti padto ti Biblia?

Impadto ni Jesus dagiti kangrunaan a pasamak iti kaaldawantayo. Dinakamatna met ti naimbag a damag ti Pagarian ti Dios a mangbang-arto iti amin a tattao a mangay-ayat iti Dios. Pagpatinggaen ti Pagarian ti intero a dakes a kagimongan a pagbibiagantayo.​—Basaem ti Mateo 24:14, 21, 22.

Detalyado nga iladawan dagiti padto ti Biblia no ania ti mapasamak iti maudi a paset ti agdama a kagimongan. Nupay narang-ay ti panawen a pagbibiagantayo, imbaga ti Biblia a dagiti tattao dadaelenda ti daga. Kumaro ti rigat gapu kadagiti gubat, kinakirang ti taraon, ginggined, ken sakit. (Lucas 21:11; Apocalipsis 11:18) Bumaba ti moralidad dagiti tattao. Bayat dagitoy narigat a tiempo, ikaskasaba dagiti pasurot ni Jesus ti naimbag a damag ti Pagarian ti Dios iti amin a nasion.​—Basaem ti Mateo 24:3, 7, 8; 2 Timoteo 3:1-5.

4. Anianto ti masakbayan ti sangatauan?

Adda naimbag a bambanag nga insagana ti Mannakabalin-amin a Dios agpaay kadagiti matalek a tattao. Manipud langit, ti Mesias a ni Jesu-Kristo agraman dagiti napili a kakaduana iturayandanto ti daga. Isuda ti mangbukel iti gobierno ti Pagarian, nga agturayto iti sangaribu a tawen. Mapagungarto dagiti natay ken mabalin a mairamanda kadagiti maikari nga agbiag nga agnanayon. Paimbagen met ti Pagarian ti amin a sibibiag nga addaan iti sakit. Awanton ti sakit ken ipapatay.​—Basaem ti Apocalipsis 5:10; 20:6, 12; 21:4, 5.

Para iti kanayonan nga impormasion, kitaem ti panid 23-25 ken 197-201 iti libro a Ania a Talaga ti Isursuro ti Biblia? makita iti daytoy a panid.