Ti Kinamanangngaasi Ep-epenna ti Saem
IDIAY Netherlands, dua a Saksi a da George ken Manon ti immasideg iti naalipunget a baket nga agnagan Rie tapno iranudda ti naimbag a damag ti Pagarian. Naammuanda a naminduan a nabalo, natay ti maysa a barona, ken nakaro pay ti reumana. Medio nagkalma bayat ti panagsasaritada, ngem kaskasdi a nakayakay latta.
Nupay kasta, ni George insingasingna ken ni Manon nga ikkandanto ti baket iti sangareppet a sabsabong gapu ta kasla nakalidliday ken nasaem ti riknana. Nasorpresa ti baket iti inaramidda. Ngem iti daydi a gundaway, saanna a masango ida isu nga imbagana nga agsublidanto laengen iti sabali nga aldaw. Awan ti tao idi simmarungkar da George ken Manon. Pinadasda a sarungkaran iti nagduduma nga oras ngem saanda latta a madandanon. Impagarupda pay ketdin a likliklikanna ida.
Iti maysa nga aldaw, nadanon met laeng ni George ni Rie iti pagtaenganna. Nagpadispensar ni Rie ket imbagana a nayospital. “Ngem ammom kadi ti inaramidko idi nakapanawkayon?” kinunana. “Inrugik a basaen ti Biblia!” Nagresulta dayta iti nasayaat a saritaan ken nairugi ti panagadal iti Biblia.
Gapu iti panagadalna iti Biblia, nagbalin a naragsak ken nasingpet ti dati a nasaem ti rikriknana a baket. Nupay saanen a makaruruar iti pagtaenganna, iranranudna ti baro a pammatina iti asinoman a bumisita kenkuana. Nakapuyen ti salun-atna isu a saanen a regular a makatabuno kadagiti gimong ti kongregasion. Kaskasdi, maragragsakan ta bisbisitaen dagiti kakabsat. Iti mismo aldaw nga agtawenen iti 82, timmabuno iti asamblea sirkito ket nabautisaran kas simbolo ti dedikasionna iti Dios.
Sumagmamano a bulan kalpasanna, natay ni Rie ket adda nasarakan a daniw a pinutarna. Inladawanna iti dayta a daniw ti nakaay-ay-ay a kinamaymaysana bayat ti kinabaketna ken impaganetgetna ti kinapateg ti kinamanangngaasi. Kinuna ni Manon: “Natukay ti riknak idi nabasak dayta a daniw ken maragsakanak ta tinulongannakami ni Jehova a mangipakita iti kinamanangngaasi iti daytoy a baket.”
Wen, matignaytayo a mangipakita iti ayat ken kinamanangngaasi gapu iti mismo nga ulidan ni Jehova. (Efe. 5:1, 2) Agbalin a nabunga ti ministeriotayo bayat nga ‘irekrekomendatayo ti bagbagitayo kas ministro ti Dios babaen ti kinamanangngaasi.’—2 Cor. 6:4, 6.