Agyamanka iti Kinaparabur ni Jehova

NAPARABUR a Dios ni Apo Jehova. (Sant. 1:17) Manipud iti nabituen a langlangit iti rabii agingga iti naraber a karuotan a nangabbong iti daga, ikankanta dagiti parsua ni Jehova ti kinaparaburna.—Sal. 65:12, 13; 147:7, 8; 148:3, 4.

Kasta unay ti panangapresiar ti salmista iti Namarsua isu a natignay a mangputar iti kanta a mangpadayaw kadagiti parsua ni Jehova. Basaem ti Salmo 104 ket kitaem no mariknam ti nariknana. Kinuna ti salmista: “Kantaakto ni Jehova iti intero a panagbiagko; mangipaayakto iti samiweng iti Diosko bayat nga addaak.” (Sal. 104:33) Kasta met kadi ti kayatmo nga aramiden?

KASAYAATAN NGA ULIDAN TI KINAPARABUR

Kayat ni Jehova nga agbalintayo a naparabur a kas kenkuana. Nangipaay met kadagiti rason tapno agbalintayo a naparabur. Usigem ti impaisuratna ken apostol Pablo: “Ibilinmo kadagidiay babaknang itoy agdama a sistema ti bambanag a saanda koma a napalangguad, ken isadagda ti namnamada, saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo; nga agaramidda iti naimbag, nga agbalinda a nabaknang iti nasayaat nga ar-aramid, nga agbalinda a naparabur, sisasagana a mangiranud, a sitatalged nga agurnongda maipaay iti bagbagida iti nasayaat a pamuon maipaay iti masanguanan, tapno mapetpetanda a sititibker ti pudpudno a biag.”—1 Tim. 6:17-19.

Idi insurat ni Pablo ti maikadua a naipaltiing a suratna iti kongregasion ti Corinto, impaganetgetna ti umiso a kababalin iti panangted. Kinunana: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Cor. 9:7) Dinakamat pay ni Pablo dagiti matulongan iti sipaparabur a panangted: dagiti umawat, maipaay ti kasapulanda; ket dagiti nangted, mabendisionanda iti naespirituan.—2 Cor. 9:11-14.

Iti maudi a paset daytoy a suratna, dinakamat ni Pablo ti kangrunaan a mangipakita iti kinaparabur ti Dios. Insuratna: “Pagyamanan iti Dios gapu iti di mailadawan a sagutna nga awanan bayad.” (2 Cor. 9:15) Nalawag a ti sagut ni Jehova ramanenna ti amin a naimbag a banag nga inaramid ti Dios maipaay kadagiti adipenna babaen ken Jesu-Kristo. Saan a pulos mailadawan ti kasta unay a pateg dayta a sagut.

Kasanotayo a maipakita ti apresasiontayo iti amin nga inaramid ken aramidento pay ni Jehova ken ti Anakna para kadatayo? Ti maysa a pamay-an ket babaen ti sipaparabur a panangipaaytayo iti panawen, pigsa, ken sanikuatayo tapno masuportaran ti pudno a panagdayaw ken Jehova, bassit man wenno dakkel dayta.—1 Cron. 22:14; 29:3-5; Luc. 21:1-4.

Dagiti Pamay-an Ti Dadduma A Mangted Iti Kontribusion Iti Sangalubongan A Trabaho

Kas idi kaaldawan ni apostol Pablo, adu ita ti “mangilasin” wenno mangibadyet iti kuarta nga itinnagda kadagiti kahon ti kontribusion a namarkaan iti “Worldwide Work.” (1 Cor. 16:2) Dagiti kongregasion binulan nga ipatulodda dagitoy a kontribusion iti sanga nga opisina dagiti Saksi ni Jehova iti pagilianda. Mabalin met a direkta nga ipatulodmo ti donasionmo iti maysa a korporasion nga us-usaren dagiti Saksi ni Jehova iti pagilianyo. Tapno maammuam ti pangipatulodam iti donasionmo, pangngaasim ta kontakem ti sanga nga opisina iti pagilianyo. Masarakan ti adres iti www.jw.org. Adtoy ti sumagmamano a donasion a mabalinmo a direkta nga ipatulod:

DIREKTA A DONASION

Donasion babaen iti electronic bank transfer, debit card, wenno credit card. Iti dadduma a sangay, mabalin met daytoy babaen iti jw.org wenno sabali pay a napili a Web site.
Donasion a kuarta, alahas, wenno dadduma pay a napapateg a personal a sanikua. Mangaramid iti surat a mangipakaammo a direkta nga idonarmo dayta a kuarta wenno sanikua.

KONDISIONAL A DONASION

Donasion a kuarta a maisubli iti nagdonar no kasapulanna.
Mangaramid iti surat a mangibagbaga a kondisional dayta a donasion.

NAIPLANO A PANANGTED

Malaksid kadagiti direkta a sagut a kuarta ken napapateg a personal a sanikua, adda pay sabali a pamay-an ti panagidonar tapno masuportaran ti sangalubongan a trabaho ti Pagarian. Nailista dagitoy iti baba. Aniaman ti kayatmo a pamay-an ti panagidonar, pangngaasim ta kontakem nga umuna ti sanga nga opisina iti pagilianyo. Nasayaat met no makisaritaka nga umuna iti abogado wenno tax adviser ta nagduduma dagiti kalikaguman ti linteg ken dagiti pagannurotan iti panagbuis.

Insurance: Mapagbalin kas benepisiario iti life insurance policy wenno retirement/pension plan ti maysa a korporasion nga us-usaren dagiti Saksi ni Jehova.

Deposito iti Banko: Deposito iti banko, sertipiko ti deposito, wenno indibidual a deposito iti panagretiro a maitalek wenno maited iti maysa a korporasion nga us-usaren dagiti Saksi ni Jehova inton matay ti nagidonar. Suroten dagiti paglintegan ti banko iti lugaryo.

Stock ken Bond: Dagiti stock ken bond a naidonar iti maysa a korporasion nga us-usaren dagiti Saksi ni Jehova kas direkta a sagut wenno babaen iti naisurat a katulagan a mayakar dagitoy no matay ti nagdonar.

Lote ken Pasdek: Malako a lote wenno pasdek a naidonar iti maysa a korporasion nga us-usaren dagiti Saksi ni Jehova kas direkta a sagut. No balay ti naidonar, mabalin nga agnaed sadiay ti nagdonar bayat a sibibiag.

Gift Annuity: Stock, bond, wenno kuarta a naidonar iti maysa a korporasion nga us-usaren dagiti Saksi ni Jehova. Umawat ti nagidonar iti espesipiko a kantidad iti kada tawen bayat a sibibiag. Mabalin nga adda diskuento ti income tax-na iti tawen a nangipaay iti gift annuity.

Testamento ken Trust: Sanikua wenno kuarta a maipatawid iti maysa a korporasion nga us-usaren dagiti Saksi ni Jehova babaen ti legal a testamento, wenno espesipiko a mainagan dayta a korporasion kas benepisiario ti trust agreement. Mabalin a makissayan ti dadduma a buis iti daytoy nga urnos.

Kas ipasimudaag ti termino a “naiplano a panangted,” dagitoy a kita ti donasion ket agkasapulan iti panagplano. Tapno matulongan dagidiay mayat a mangsuporta iti sangalubongan a trabaho dagiti Saksi ni Jehova babaen ti naiplano a panangted, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naglaon dayta a broshur iti impormasion maipapan iti nadumaduma a pamay-an ti panagdonar, a maited ita wenno inton matay ti agidonar. Mabalin a saan nga agaplikar iti kasasaadmo ti amin a linaon dayta a broshur gapu ta naiduma ti pagannurotan ti panagbuis wenno ti dadduma pay a paglintegan iti pagilianyo. No mabasamon ti broshur, agkonsultaka iti maysa nga abogado wenno tax adviser. Babaen kadagitoy a pamay-an ti panangted, adu ti nakatulong iti sangalubongan a narelihiosuan a trabahotayo ken iti panangsaranay iti sabsabali, ken dakkel pay ti naksay iti bayadanda a buis. No adda kasta a broshur iti pagilianyo, mabalinmo ti agkiddaw iti sekretario ti kongregasionyo.

Para iti kanayonan nga impormasion, mabalinmo a kontaken ti sanga nga opisina iti pagilianyo.