ANIA TI KUNA TI BIBLIA?
Ania ti mapasamak no mataytayo?
ADDA DAGITI MAMATI a no mataytayo, adda banag a sumina kadatayo nga agtultuloy nga agbiag. Patien met ti dadduma a ti ipapatay ti pagpatinggaan ti amin. Sika ngay, ania met ti patpatiem?
TI KUNA TI BIBLIA
“No maipapan kadagiti natay, saanda a pulos sipapanunot iti aniaman.” (Eclesiastes 9:5) No matay ti maysa a tao, awanen.
TI DADDUMA PAY A MAAMMUANTAYO ITI BIBLIA
Idi natay ti immuna a lalaki a ni Adan, nagsubli iti tapok. (Genesis 2:7; 3:19) Kasta met laeng ti amin a matay, agsublida iti tapok.—Eclesiastes 3:19, 20.
Naabsuelton, wenno napakawanen, dagiti natay kadagiti basolda. (Roma 6:7) No natayen ti maysa a tao, saanen a madusa gapu kadagiti basolna.
Agbiagto kadi manen dagiti natay?
PANAGKUNAM?
Wen
Saan
Siguro
TI KUNA TI BIBLIA
“Addanto panagungar.”—Aramid 24:15.
ANIA PAY TI MAAMMUANTAYO ITI BIBLIA?
Masansan nga ipada ti Biblia ti ipapatay iti pannaturog. (Juan 11:11-14) Kabaelan ti Dios a riingen dagiti natay, no kasano a kabaelantayo met a riingen ti matmaturog a tao.—Job 14:13-15.
Adda dagiti panagungar a nairekord iti Biblia a mangted kadatayo iti natibker a rason a mamati nga agbiagto manen dagiti natay.—1 Ar-ari 17:17-24; Lucas 7:11-17; Juan 11:39-44.