Pagbalinem ti Panagadalmo iti Biblia a Mas Epektibo ken Makaparagsak

Basbasaen ni Josue ti Linteg; narba dagiti pader ti Jerico ngem saan a nadadael ti balay ni Rahab; inngato ni Josue dagiti imana nga agkarkararag

NAGRIGAT idi ti responsabilidad ni Josue. Idauluanna ti nasion ti Israel a sumrek iti Naikari a Daga ket narigat dagiti situasion a sanguenda. Ngem impasigurado ni Jehova nga agballigi ni Josue, ket kinunana: ‘Bumilegka ken pumigsaka. Aramidem ti lintegko. Basaem iti aldaw ken rabii tapno maaramidmo ti naisurat iti dayta. Iti kasta agballigika ken agtignayka a sisisirib.’—Jos. 1:7, 8.

Nagrigat met ti situasiontayo kadagitoy “napeggad a tiempo a narigat a pakilangenan.” (2 Tim. 3:1) Kas ken Josue, agballigitayo no surotentayo ti balakad ni Jehova. Regular a basaentayo ti Biblia ken iyaplikartayo dagiti prinsipiona no maipasangotayo iti pakasubokan.

Ngem admitiren ti adu kadatayo a marigatantayo nga agadal. Gapu ta nagpateg nga adalen ti Biblia, usigem ti dadduma a nagsayaat a singasing iti kahon a “Padasem Dagitoy a Suhestion” tapno agbalin a mas epektibo ken makaparagsak ti panagadalmo.

“Pabaddekennak iti dasdas dagiti bilinmo,” inkanta ti salmista, “ta iti dayta naragsakanak.” (Sal. 119:35) Agbalinka a naragragsak no adalem ti Sao ti Dios. Sigurado a bayat ti panagkalim, adu ti madiskobrem a naespirituan a gameng.

Nupay awan ti nasion nga idauluam kas ken Josue, adda dagiti bukodmo a pakarigatan. Isu a kas kenkuana, adalem ken surotem ti naisurat iti Biblia a pagsayaatam. No aramidem dayta, agballigikanto ken makapagtignayka a nainsiriban.

PADASEM DAGITOY A SUHESTION

Agkararagka sakbay nga agadalka. Naglaon ti Biblia iti pampanunot ti Mannakabalin-amin a Dios nga impaisuratna a pagsayaatam. Isu a no basaem ti Biblia, agpatulongka kenkuana tapno maawatam, dimo malipatan, ken mayaplikarmo dayta.—Esd. 7:10.
Isaludsodmo iti bagim bayat a basbasaem ti Biblia wenno ti publikasion a naibatay iti dayta: ‘Ania ti ibaga kaniak daytoy a teksto maipapan ken Jehova? Ania ti koneksionna iti intero a mensahe ti Saona? Kasanok a mausar daytoy nga impormasion a tumulong iti sabsabali?’
Utobem ti ad-adalem. Agsardengka nga agbasa sa panunotem: ‘Ania ti epekto daytoy iti riknak? Apay a kastoy ti mariknak? Adda kadi koneksionna iti napalabas a kapadasak, iti agdama a situasionko, wenno iti posible a mapasamak iti masanguanan? Kasanok a mayaplikar dagitoy a prinsipio ti Biblia wenno daytoy a balakad?’ (Job 23:5; Sal. 49:3) Padasem nga ilawlawag no apay nga imbaga ni Jehova iti ilina a liklikanda ti maysa nga aramid wenno no ania dagiti posible a resultana no saanda a liklikan dayta.—Deut. 32:28, 29.
Usarem ti imahinasionmo no basbasaem dagiti salaysay. Kas pagarigan, mailadawam kadi ti eksena bayat a ni Jose ket ilaklako dagiti kakabsatna kadagiti Ismaelita? (Gen. 37:18-28) Ania ti makita, mangngeg, ken maangotmo? Ikabilmo ti bagim iti situasion ti tunggal karakter. Ania ti pampanunoten ken marikrikna ti tunggal maysa? Makatulong dagita tapno mas nabiag ken makagunggona ti panagadalmo.
Usarem dagiti katulongan iti panagadal a mangpaalisto iti panagsukimatmo. Sursuruem nga usaren dagiti online ken nayimprenta a katulongan a naipatarus iti lengguahem. Agpatulongka iti dadduma tapno masursurom ti epektibo a panangusar kadagita. Kas pagarigan, makatulong ti Watch Tower Publications Index wenno ti Giya iti Panagsukimat Para Kadagiti Saksi ni Jehova tapno mabirokam ti maipapan iti adu a topiko ken ti pannakailawlawag ti adu a bersikulo ti Biblia. Usarem ti apendise ti Baro a Lubong a Patarus ti Nasantuan a Kasuratan, a naglaon iti makatulong nga impormasion maipapan iti geograpia, dagsen, sukat, ken dadduma pay.
Sumarioem dagiti napateg a punto tapno malagipmo ti kaad-adalmo. Nasaysayaat no ibagam dayta iti dadduma. Adda kadi punto a mausarmo iti ministerio? No aramidem dagita, saanmo laeng nga imulmula iti panunotmo dagiti kangrunaan a punto no di ket us-usarem pay dagita a tumulong iti sabsabali.