Umadanika iti Dios

Kayatna nga Agballigitayo

Josue 1:6-9

MAGAGARAN dagiti naayat a nagannak a makakita nga agballigi dagiti annakda ken maaddaan iti naragsak ken makapnek a biag. Kasta met, kayat ti nailangitan nga Amatayo a ni Jehova nga agballigi dagiti annakna ditoy daga. Kas panangipakita iti nadungngo nga asina, ibagana kadatayo no kasano nga agballigitayo. Kas pagarigan, usigem dagiti sasaona ken Josue kas nailanad iti Josue 1:6-9.

Panunotem ti eksena a naipakita iti kannawan. Kalpasan ti ipapatay ni Moises, ni Josue ti nagbalin a kabbaro a pangulo dagiti Israelita, nga agdagup iti minilmilion. Agsagsagana idin dagiti Israelita a sumrek iti daga nga inkari ti Dios kadagiti ammada. Adda balakad ti Dios ken Josue a makatulong kenkuana nga agballigi no tungpalenna dayta. Ngem saan laeng a ni Josue ti nakaipaayan ti balakad. No iyaplikartayo dayta, agballigitayo met.​—Roma 15:4.

Saan laeng a naminsan no di ket namitlo nga imbilin ni Jehova ken Josue a bumileg ken agbalin a natured. (Bersikulo 6, 7, 9) Kasapulan la ketdi ni Josue ti tured ken bileg tapno sibaballigi a maidauluanna ti nasion a sumrek iti Naikari a Daga. Ngem kasano a mapatanorna dagita a galad?

Mapatanor ni Josue ti tured ken bileg babaen kadagiti naipaltiing a sursurat. “Annadam nga aramiden ti maitunos iti isuamin a linteg nga imbilin kenka ni Moises nga adipenko,” kinuna ni Jehova. (Bersikulo 7) Addaan laeng idi ni Josue iti sumagmamano a naisurat a libro ti Biblia.a Ngem ti basta panangikut iti Biblia saanna nga ipanamnama ti balligi. Tapno magunggonaan ni Josue iti dayta, masapul nga aramidenna ti dua a banag.

Umuna, masapul a regular a basaen ken ipapuso ni Josue ti sao ti Dios. Kinuna ni Jehova: ‘Masapul nga iti nababa a timek basaem dayta iti aldaw ken rabii.’ (Bersikulo 8) Kuna ti maysa a reperensia: “Bilbilinen ti Dios ni Josue a laglagipenna ti Linteg babaen ti ‘panangitanamitim,’ ‘panangpampanunot,’ wenno ‘panangutob’ iti dayta.” Makatulong ken Josue ti inaldaw a panangbasa ken panangutobna iti Sao ti Dios tapno mapagballigianna dagiti karit a pakaipasanguanna.

Maikadua, masapul nga iyaplikar ni Josue ti maad-adalna iti Sao ti Dios. Kuna ni Jehova kenkuana: ‘Annadam nga aramiden ti maitunos iti isuamin a naisurat iti dayta; ta iti kasta pagballigiemto ti dalanmo ket iti kasta agtignaykanto a sisisirib.’ (Bersikulo 8)Yantangay kanayon nga agballigi ti pagayatan ti Dios, nainaig ngarud ti balligi ni Josue iti panangaramidna iti pagayatan ti Dios. No saanna nga aramiden dayta, kasano koma nga agballigi?​—Isaias 55:10, 11.

Impangag ni Josue ti balakad ni Jehova. Kas resulta, naaddaan ni Josue iti naan-anay ken makapnek a biag kas matalek nga agdaydayaw ken Jehova.​—Josue 23:14; 24:15.

Kayatmo kadi ti maaddaan iti makapnek a biag a kas iti biag ni Josue? Kayat ni Jehova nga agballigika. Ngem saan nga umdas nga addaanka iti Biblia. Insingasing ti maysa a nabayagen a matalek a Kristiano: “Saanyo laeng a basta basaen ti Biblia, ipapusoyo koma dayta.” No regular nga ipapusom ti sao ti Dios ken agbibiagka a maitunos iti maad-adalmo, “pagballigiemto ti dalanmo” a kas ken Josue.

[Footnote]