Dayawen ti Namarsua iti Amin a Bambanag
1 Kabayatan ti maika-19 a siglo, pinataud ni Satanas iti maysa a nasikap a gandat a mangbulsek iti sangatauan—ti teoria iti ebolusion. (2 Cor. 4:4) Daytoy a teoria isut’ nabatad a pangilibak iti salaysay ti Biblia maipapan iti panamarsua ken ti pannakatnag iti tao ti basol. Aramidenna ti daton ni Kristo a subbot ken iti sursuro ti Biblia maipapan ti Pagarian ken iti biag nga agnanayon nga awan kaeskanda. Mainayon pay, ti teoria iti ebolusion ket winaknitanna ti dana a maipaay iti ranggas ken gubat, seksual nga imoralidad, ken amin a kita ti kinadakes. Siasino ti mamakdaar iti sangatauan maipapan ti peggad daytoy a makapapatay a sursuro?
2 Bayat iti bulan ti Hulio maaramidtayo daytoy, idinto ta kupadotayo a mangiwaragawag iti kinanamarsuana. Iti panagbalaybalay a ministerio, panagtrabaho iti lansangan, kabayatan ti panagsarimadeng iti sekular a trabaho, ken idiay pagadalan, aramatentayo ti libro a Life—How Did It Get Here? By Evolution or by Creation? Tarigagayantayo a kada tao ket maammuanna no kasano a ti teoria iti ebolusion ket ibabainna iti Namarsua ti sangatauan.
3 Mangtedkayo ti Epektibo a Pammaneknek: No mangasabakayo ti impormal wenno iti balaybalay, mabalinyo nga irugi ti saritaan babaen iti panagreperensiayo iti agdama a damag maipapan ti kapanunotan dagiti dadduma a tattao iti tema nga ebolusion. Nupay ti maysa a tao ket nawadwaden ti nabasa ken nangngegna maipapan iti argumento ken debate iti daytoy a suheto, awan duadua a makapainteres kenkuana iti nabatad a sasao ti Biblia iti daytoy a banag. Kalpasanna maiturong iti nasao idiay Hebreo 3:4. Mabasa ti teksto ken makomentuan iti ababa.
4 No ti tao ket agparang a relihioso, mabalinyo a dakamaten a dagiti relihioso a tattao ket masansan met a mangtedda iti kredito wenno pammadayaw iti maysa nga awan langana a “Nakaparsuaan” imbes nga iti Dios kas namarsua a puersa iti likud dagiti amin a nakaskasdaaw a bambanag a makita iti aglawlawtayo. Ngem nalawag iti panangipabigbig ti Biblia iti Namarsua daytoy nakaskasdaaw nga uniberso. Maiyawis ti asikaso iti Apocalipsis 4:11. Mabalinyo nga isilpo iti maysa wenno dua a masinnunuo a puntos manipud iti Creation a libro, ket no maiparbeng, paregtaen a basaenna dayta.
5 Iti Pagadalan: Bayat nga aglukat iti baro a tawen a panagadal, aminyo nga agtutubo kas adipen ni Jehova ti agmayat a mangrepaso iti libroyo a Creation ken usigenyo dagiti wagas a mangpainteres kadagiti kaadalan ken maestroyo iti dayta. Nasarakan dagiti dadduma a ti basta panangibati iti daytoy a publikasion idiay rabaw ti lamisaanda ket mangawis iti diskusion. Dagiti dadduma ti immasideg kadagiti maestro ken administrador iti pagadalanda a nakisao iti suheto ti panamarsua ket nabaelanda iti nangiwaras ti adu a libro iti kastoy a wagas.
6 Agrag-otayo amin iti namnama nga agbiag iti maysa a lubong a tunggal maysa ket agdaydayawen ken Jehova, kas naiyebkas iti sasao idiay Apocalipsis 4:11. Gapuna nga usarentayo koma ti Creation a libro pangdayaw kenkuana iti ministerio bayat ti Hulio!