Buyogen ti Panagkarkararag
1 Ni apostol Pablo insuratna a buyogen ti pammabileg: “Mabalinak dagiti amin a bambanag gapu iti daydiay mamapigsa kaniak.” (Fil. 4:13) Kasapulantayo met ti agtaklin nga interamente ken ni Jehova tapno iti kasta ket maiparangtayo ti naimbag a damag a situtured. Kasano a maaramidantayo daytoy?
2 Ni Jesus impaganetgetna ti pannakasapultayo a “kanayon nga agkararag ken di mapukawan ti inanama.” (Luc. 18:1) Imbalakad ni Pablo: “Agkararagkayo a di-agressat.” (1 Tes. 5:17) Wen, ti bileg dumteng manipud iti kararag. Mabalin nga agkararagtayo para kadagiti gundaway a mangasaba kadagiti dadduma, maipaay iti kinasirib ken pannakaawat no addatayo idiay tay-ak ti pangasabaan, ken para iti balligi a madanontay ti puso dagiti estudiantetayo ti Biblia. Kasapulan nga ikararagtayo ti irarang-ay ti intereses ti Pagarian iti intero a lubong. (Mat. 24:14) Kasapulan a ‘siririingtayo’ iti panagkararag tapno maliklikantayo ti espiritual a pannakaituglep ket maparang-aytay ti apresasiontayo iti pribilehio a mangisarita kadagiti panggep ni Jehova.—Col. 4:2.
KADAGITI PANANGYADAL TI BIBLIA
3 Apay a ti panagkararag importante la unay iti maysa a panangyadal ti Biblia? Ti panangirugi babaen ti kararag ikabilnatayo iti umiso a panagpanunot ken tumulong iti estudiante a mangawat ti kinapateg ti maiyad-adal. Ti estudiante makaadal met nga agkararag babaen ti ulidantayo.—Luc. 11:1.
4 Ania dagiti sumagmamano a bambanag a mabalin nga iramantayo iti karkararagtayo kadagiti panangyadaltayo ti Biblia? Ti modelo a kararag ni Jesus ken ti kararag ni Pablo para kadagiti taga Filipos ket ekselente nga ulidan. (Mat. 6:9-13; Fil. 1:9-11) Dagiti kararagtayo di kasapulan nga atiddog, ngem masapul a mainaigda kadagiti espesipiko a bambanag. Iramantayo dagiti ekspresion ti dayaw ken ni Jehova. (Sal. 145:3-5) Iti panangdakamat ti nagan ti estudiante ti Biblia, a nalabit iyebkas pay dagiti kasasaadna, ken panangikararag nga isut’ rumang-ay iti espiritual ket makagunggona. Kabayatan nga isut’ rumangrang-ay, mabalin a dumawattayo iti bendision ni Jehova kadagiti reggetna a tumabuno kadagiti miting ken mangiburay ti kinapudno kadagiti dadduma. Iraman met dagiti kiddaw para iti bendision ni Apo Jehova iti sangalubongan a trabaho a panangasaba.
PARA KADAGITI KAKABSAT A LALLAKI KEN BABBAI
5 Amin nga adda iti ili Jehova ket katrabahuantayo ida. (1 Cor. 3:9) No kasta, no dagiti sekular nga agtuturay padasenda a pasardengen ti trabaho a panangasaba, matignaytayo nga agkararag “maipuon kadagiti ar-ari ken amin nga adda iti panagturay.” Iti ania a panggep? “Tapno agbiagtayo a natalna ken naulimek babaen ti kinasingpet ken kinanakman.” (1 Tim. 2:1, 2) Dagiti kakastoy a karkararag aktual a pabor kadagiti kakabsattayo iti intero a lubong.
6 Babaen ti kararag, makadawattayo ti bileg para kadagiti kakabsattayo a mangaskasaba iti sidong dagiti narigat a kasasaad ken para kadagidiay masakit iti espiritual. (2 Tes. 3:1, 2) Nasayaat met nga ikararagantayo dagiti panglakayen, agbibiahe a manangaywan, ken ti Manarawidwid a Bagi—amin “dagiti agbambannog dita tengngayo.”—1 Tess. 5:12.
7 Kasapulan nga itaklintayo dagiti pakadanagantayo ken ni Jehova. (Sal. 55:22; 1 Ped. 5:7) Naipasigurado kadatayo nga aniaman a dawatentayo a maitunos iti pagayatanna, denggennatayo. (1 Juan 5:14) Ngarud, no agkararagtayo para iti tulong ni Jehova iti ministeriotayo, agtalektayo koma a denggennatayo ken pagbalinenna a naballigi dagiti danatayo.—2 Tim. 4:5.