Dikay Koma Mabannog
1 Ti 1991 Yearbook ibagana kadatayo dagiti nakaragragsak a panangpalawa a maar-aramid iti sangalubongan. Adda dagiti baro a peak dagiti agibumbunannag iti maysa a pagilian kalpasan iti sabali a pagilian.
2 Ngem kasano ti langa iti teritoriayo? Aleng-aleng kadi dagiti tattao iti mensahe ti Pagarian? Bassiten aya dagiti mangipangag? No kasta, mabalin a paregtaennakayo iti balakad ni Pablo iti Galacia 6:9: “Ditay koma maupay nga agaramid no ania daydiay naimbag, ta iti umiso a tiempo agapittayto no ditay mabannog.” Ti panagaramid iti naimbag ket sigurado a saklawenna ti panangikasaba iti naimbag a damag ti Pagarian iti balaybalay. Masapul nga agtultuloytayo a mangasaba agingga a kunaen ni Jehova a nalpasen ti trabaho. (Isa. 6:8) Uray pay kadagiti narigat a teritoria, kaskasdi nga adda pay laeng masarakan a marakarnero a tattao.
3 Ania ti aramidentayo tapno ditay mabannog iti teritoriatayo? Makatulong ti panangbaliw iti iyaasideg ken introduksiontayo. Dagiti ekselente a singasing isudat’ masarakan iti Panakirinnason a libro. Pinadasyo kadin dagitoy? Ti ababa unay ken diretso nga iyaadani isut’ mangallukoy iti asikaso dagiti ad-adu a bumalay. Marikna koma dagiti tattao nga addakayo sadiay agsipud ta interesadokayo iti pagimbaganda.
ITUKON DAGITI DAAN A PUBLIKASION
4 Kabayatan ti Pebrero maipakitatayo iti pannakaseknan kadagiti tattao babaen ti panangitukon kadagiti daan a publikasion a maala kadagiti pagsasaotayo. Sitarenyo idiay Dagiti Pakaammo iti panid 7 kasta met iti kabsat a mangimaton ti literatura iti kongregasionyo tapno ammoyo no ania dagiti maala iti lokal. Amin dagitoy a libro ti addaan iti ekselente a puntos mainaig iti Topiko a Pagsasaritaan maipapan iti talna. Agsaganakayo a nasakbay tapno addaankayo iti sigud a masinnunuo a puntos a madakamat.
5 Sigurado a maparegtatayo a mismo babaen ti pannakipasettayo iti panangikasaba ti Pagarian iti linawas. Mainayon pay, mataginayon iti espiritualidadtayo babaen ti regular a panagadal iti Sao ti Dios ken regular a pannakipaset kadagiti gimong ti kongregasion.—Heb. 10:23-25.
PAREGTAEN DAGITI DADDUMA KEN BUMILEGKAYO
6 Mabalinyo a tulongan iti bagiyo ken paregtaen dagiti sabsabali babaen ti pannakikuyog kadakuada iti tay-ak ti ministerio. (Gal. 6:10) Apay a dikay kiddawen kadagiti payunir wenno panglakayen no mabalinyo ti kumuyog kadakuada? Kasta met, dagiti iregular ken inaktibo ti mabalin a maparegta babaen iti interesyo a tumulong a maipaay iti espiritual a pagimbaganda.
7 Amintayo ti agkasapulan iti panagibtor ken saan koma a mabannog iti serbisio ni Jehova. (Heb. 10:36-39) Kumararagkayo ken Jehova a maipaay iti pigsa. (Isa. 40:29-31) Dawatenyo kenkuana ti tulong tapno makaibtor ken masalimetmetanyo iti positibo a mentalidadyo. Laglagipenyo, ar-aramidentayo iti trabaho ti Dios. Saanna a malipatan no ania iti nagapuanantayo iti serbisiona. (Heb. 6:10) Gapuna a ditay koma mabannog! Imbes, maaddaantayo koma iti “nawadwad nga aramid iti trabaho ti Apo,” a tumaklintayo ken Jehova a mamapigsa kadatayo.—1 Cor. 15:58.