Tiempo a Maipaay iti Napaadu a Trabaho
1 Bayat nga umasideg iti panagngudo daytoy agdama a sistema ken makita iti nabaknang a bendision ni Jehova iti ministeriotayo, kasapulan nga ipangagtayo iti pammagbaga ni Pedro a ‘mabariksan koma ti panunottayo a maipaay iti trabaho.’—1 Ped. 1:13; Isa. 60:22.
2 Idi inted ni Pedro daytoy balakad iti ngato, nagsurat maipapan iti pannakaisalakan a magun-odtayo babaen iti dara ni Kristo Jesus. Ti panangiwaragawag iti naimbag a damag ti Pagarian isut’ maysa a wagas iti panangidemostra ti pammatitayo ken panangiyebkas iti panangipateg kadagiti gunggona nga awatentayo gapu iti inyebkas ni Jehova nga ayatna babaen ti sagot iti Anakna. (Juan 3:16) Iti panawen ti Memorial isut’ tiempo a maipaay iti mas aktibo a pannakipaset iti daytoy ordinado ti Dios a trabaho.
RAMBAK TI MEMORIAL KEN ESPESIAL A PALAWAG
3 Ti rambak iti Memorial bayat daytoy a tawen isut’ maaramid iti kallennek ti init iti Marso 30. Uray pay itan, kas panangpadaan iti dayta nga espesial a petsa, masapul a sukimaten iti relasiontayo ken Jehova ken ti pamay-an iti pananglaglagip iti sakripisio ni Jesus. Idemostratayo kadi ti pammatitayo iti kada aldaw babaen ti panangalagad a siiinget kadagiti nalinteg a pagalagadan ni Jehova iti panagpanunot, panagsao, ken panagtigtignaytayo? Ipakpakitatayo aya iti ayat kadagiti dadduma babaen ti panangikagumaan iti trabaho a panangasaba ken panagaramid iti adalan? Iti nagpaiduma a wagas iti kada tawen a Memorial, malagiptayo no ania iti inaramid ni Jehova ken ni Jesus a maipaay kadatayo. (Luc. 22:19; 1 Cor. 11:23, 24) Ti kasta a pananglaglagip isu koma ti mamaggunay kadatayo iti positibo a tignay a maitunos iti abilidad ken kasasaad iti tunggal maysa kadatayo.
4 Iti Abril 7, kaaduan kadagiti kongregasion iti intero a lubong ti mangiparang iti espesial a palawag iti suheto a “Ti Iyaay iti Mesias ken ti Turayna.” Anian a nagsayaat nga oportunidad a maipaay kadagiti agdadamo a rugiandan ti makitimpuyog iti kongregasion! Dagidiay tumabuno iti Memorial ti masapul a maparegta a tumabuno iti daytoy nga espesial a palawag.
PAADUEN ITI MAIWARAS A MAGASINA
5 Amin dagiti agibumbunannag iti Pagarian ti masapul a mangipateg iti nagpaiduma a pinget a naipaay iti pannakaisagana dagiti ruar ti Pagwanawanan ken Agriingkayo! a maipaay iti Abril ken Mayo. (Kitaenyo ti “Nakasaganakayo Koma iti Kampania ti Suskripsion a Pagwanawanan” iti panid 8.) Siguruenyo ti agpedido iti ekstra a kopia manipud iti kabsat a mangimaton ti magasina iti kongregasionyo tapno adda umdas nga usarenyo. No sumangpet dagitoy a magasina, masapul a kabisaduenyo iti kada ruar. Daytoy ti mangriing iti regtayo a mangipresenta kadagitoy idiay tay-ak.
6 Mailugaryo kadi iti iskediolyo ti agserbi kas auxiliary payunir bayat iti Marso, Abril, wenno iti Mayo? Kadagiti dadduma a kongregasion adda nasurok a kagudua dagiti agibumbunannag ti nakapagserbi kas auxiliary payunir idi napan a tawen nga Abril. No adu dagiti makiraman a sangsangkaminsan, matulongan ken maparegtada iti maysa ken maysa bayat daytoy espesial a periodo ti trabaho. Maragsakanto dagiti panglakayen a tumulong kadakayo babaen ti panangurnosda kadagiti mainayon a serbisio idiay tay-ak iti lugar a kasapulan dayta.
7 No dikay kabaelan ti agpayunir iti daytoy a tiempo, kasano iti kawadwad ti pannakipasetyo iti tay-ak ti ministerio? Sigurado a maragsakan ni Jehova iti nakararuaan a serbisio a mangiyebkas iti ayat ken panangipategtayo kenkuana ken iti Anakna, ni Jesus. Ti espirituna isut’ mangsustento kadatayo a mangidaton kadagiti maawat a sakripisio a maipaay iti dayawna.—Heb. 13:15.