Situtured a Mangidanon iti Imbitasion nga “Umayka!”
1 Dagiti napardas a paspasamak iti sangalubongan isudat’ mangipabigbig kadagitoy a tiempo a kas “maudi nga al-aldaw.” (2 Tim. 3:1-5) Ti nasaknap a krimen, saan a natalged nga ekonomia, ken makadangran iti biag a saksakit isudat’ mangnayon iti pakarigatan. Ngem iti sidong dagitoy a kinaay-ay, maidandanon iti imbitasion a mangapektar kadakuada iti agnanayon. Ti espiritu ken iti nobia ti agtultuloy nga agkuna: “Umayka!” Ket itan ti “maysa a dakkel nga umariwekwek” isut’ nakitimpuyog kadakuada a mangawis kadagiti tattao iti uray sadino nga umay ken mangala iti danum ti biag nga awan iti bayadna.—Apoc. 7:9; 22:17.
2 Kadagitoy nga aldaw, dagiti mawawan iti kinalinteg isudat’ mangipangpangag iti daytoy nga imbitasion iti nawadwad a bilang. Idi napan a tawen minilion dagiti timmabuno iti kombension ti distrito iti sangalubongan, ken gistay sangapulo a milion ti dimmar-ay iti Memorial. Minilion a sabsabali iti mangipakpakita ti panangipategda iti parabor ni Jehova babaen ti panagimdengda iti mensahe ti Pagarian. Anian ti kapategna, ngarud, nga usarentayo iti tiempo a nainsiriban a mangidanon ti imbitasion iti publiko ken balaybalay!—Ara. 5:42; Efe. 5:15, 16.
MAKIPASETKAYO A SITUTURED
3 Dagiti immuna a Kristiano ti naidadanes gapu iti pingetda a nangasaba. (Ara. 16:19-21; 17:2-8) Nupay kasta, saanda a nauma iti situtured a panangiwaragawagda iti naimbag a damag. Masapul a kasta met koma ti kinatured ken kinadeterminadotayo a mangikasaba iti naimbag a damag.
4 Uray pay kadagiti pagilian a naparitan iti trabaho, naimpusuan ti pannakiraman dagiti kakabsat iti panangasaba a trabaho uray iti sidong ti nakana a pannakaidadanes, agraman pannakaawan iti panggedan, pagtaengan, ken iti wayawayada. Ti naimbag nga ehemploda ti agserbi a pammaregta kadatayo nga agtultuloy a mangawis kadagiti dadduma nga “Umayka!”—2 Tes. 3:9.
5 Iti nasuroken a 35 a tawtawen, maysa a kabsat a babai ti nangtaginayon iti pusona ti tarigagay nga agpayunir. Ti sirkumstansiana isut’ nagbaliw idi agtawenen iti 70, ket nabalinanna ti nagregular payunir. Nupay mabilbilang iti tattao nga agedad iti kasta ti mangala iti baro a karera, dayta ti inaramidna. Bayat a nagrag-oanna ti regular payunir a serbisio iti adun a tawtawen, nakunana, “Sumaysayaat iti kada aldaw.”
6 Kas idi immuna a siglo, dagiti tattao ita ket ipangpangagda daytoy nga awis, nga nagbalbaliw iti panunot ken insardengda dagiti makaumsi iti Dios nga ar-aramidda. Nagbalinda a kameng iti dedikado a sangalubongan a panagkakabsat dagiti Saksi ken nakiramanda iti espiritu ken daydiay nobia nga agkuna “Umayka!” kadagiti natda pay a nasingpet ti panagpuspusoda a tattao.
7 Ti nawadwad a panagrang-ay iti trabaho ti Pagarian ken ti ilalawa dagiti opisina iti nagduduma a pagilian isut’ ebidensia iti bendision ni Jehova. Ngem ti tiempo ket maibusen iti daytoy daan a sistema. Itan ti nagundawayan a tiempo nga ipakita ti kinatured ken kinaregta nga agkuna “Umayka!” tapno dagiti dadduma ket ipangagda a sidadaras ken agtignaydan a maitunos iti daydiay mangngegda. Aramidentayo daytoy bayat iti Hulio ken Agosto babaen iti kampania ti broshur.—Ara. 20:26, 27; Roma 12:11.