Panangiparang ti Naimbag a Damag—A Sieepektibo Babaen ti Panagimdeng
1 Tapno epektibotayo iti ministerio, masapul a mabigbigtayo nga awan ti dua a tao nga agpareho. Tunggal maysa ket addaan iti personal a pakaseknan ken kapadasan. Ti karit isu ti panangipakita iti daydiay tao a makasaotayo no ania iti kaipapananna kenkuana a personal. Tapno maaramid daytoy nga epektibo, masapul iti atentibo a panagimdengtayo.
2 Adu dagiti agibumbunannag ti mangusar iti salsaludsod kadagiti introduksionda, ket daytoy isut’ tumulong iti bumalay a bumiang iti saritaan. Ngem no agsao ti bumalay, nasken unay iti panagimdengtayo no ania ti sawenna. Ti panagimdeng iparangarangna iti ayat ken panagraem iti kaaruba, ket babaen ti panangaramid iti dayta matingitingtayo ti pampanunoten daydiay tao. No ammotayo ti sasaadenna matulongantayo a maaddaan iti empateya, ti panangisaad iti bagitayo iti lugarna.
MANNAKIBAGAYKAYO KOMA
3 Imbalakad ni Pablo: “Adalenyo no kasano ti kasayaatan a pannakisao iti tao a masabetyo.” (Col. 4:6, New English Bible) Nupay ditay ammo a nasakbay no ania iti mabalin a sawen ti maysa a tao, ammotayon iti gagangay a problema a naipasango kadagiti tattao kadagitoy nga aldaw. Iti kasta, mabalintayo a ‘maadal’ ken maisagana iti maisungbattayo kadagiti nagduduma a situasion.
4 Kas ehemplo, mabalin a nakasaganatayon a makisao maipapan iti suheto a talna, ngem ti bumalay nadakamatna maipapan iti pannakaikkatna ti trabaho. Ditay kadi ikaskaso iti nasaona? Nalawag a maseknan unay iti dayta, gapuna a masapul nga adda empateya, nga ipakita ti napudno a pannakaseknan iti kasasaadna. Kalpasanna siaanus nga iturong iti asikasona kadagiti kasuratan a mangipakita no kasano a ti gobierno iti Dios ket mangtedto iti makapnek a panggedan.—Isa. 65:17, 21, 22, 24.
5 Nalabit a naammuantayo a daytoy a tao ket nabiktima iti maysa a krimen ti saan pay a nabayag wenno nagsagaba iti inhustisia. Ti nasimpateya a pannakaseknan isut’ mabalin a mangpalukneng iti pusona, a dayta ti mamagposible a maipakita kenkuana a ni Jehova ket maseknan unay kadagitoy a nasaem a problema ken iti saan a mabayag agtignayton a mangikisap iti amin a kinadakes.—Kitaenyo ti Panakirinnason a libro, pinanid 10, 12, 270-3.
6 Babaen ti panangkultibar iti naimbag a kababalin a panagimdeng a siraraem, mabalin a mas epektibo ti panangiparangtayo iti naimbag a damag, a maiyanninag iti awan agumna nga interes ni Jehova iti dadduma, ken matulongan dagiti sabsabali a mangpatanor iti naimbag a relasion iti naayat a Namarsuatayo ken kadagiti tattaona.—Sant. 1:19; g74 11/22 p. 21-3.