Gimong ti Serbisio iti Pebrero
Lawas ti Pebrero 10-16
5 min: Lokal nga anunsio ken Dagiti Pakaammo manipud Ti Ministeriotayo iti Pagarian. Siguruenyo nga ipalagip kadagiti amin ti miting nga agpaay kadagidiay agplano iti auxiliary payunir inton Marso, Abril, ken Mayo iti Domingo, Pebrero 16.
10 min: “Praktikal nga Iyaasideg iti Panagsagana a Maipaay iti Tay-ak ti Serbisio.” Malawagan ti artikulo a kadua dagiti dumdumngeg, ken maawagan dagiti tallo wenno uppat nga agibumbunannag a natudingan a nasakbay a mangted iti masinnunuo a komento iti wagas a daytoy nga iyaasideg ket makagunggona kadakuada. Kas ehemplo, mabalinda ti agkomento iti nagduduma a presentasion, wagas a ti material ket maibagay iti lokal a teritoria, panangitutop, wenno daytoy nga iyaasideg ket palubosanna ti agibumbunannag a mangpili iti material a kaannawidanna nga iparang. Paregtaen dagiti agibumbunannag nga itugotda dagiti kopia iti Ti Ministeriotayo iti Pagarian kadagiti taripnong sakbay ti panangasaba.
20 min: “Pakaammuan Dagiti Amin nga Asidegen iti Sangalubongan a Talged.” Kalpasan ti ababa a panglukat a komento, mausig iti kada transision wenno panagallatiw ken maidemostra ti usarda babaen iti nakasagana a naimbag nga agibumbunannag kas ipalubos ti tiempo. No praktikal, nasayaat no maysa nga agtutubo ti mangidemostra iti Transision Num. 2. Ti Transision Num. 3 palubosanna ti agibumbunannag a mangibati iti uray maysa laeng a makapainteres a Nainkasuratan a kapanunotan iti panunot ti bumalay. Sibabara a paregtaen dagiti kakabsat a mangusar ti maysa kadagiti naisingasing nga introduksion idiay panid 4 ken maysa kadagitoy a transision wenno panagallatiw.
10 min: Diskusion iti “Aborsion” manipud Panakirinnason a libro, pinanid 25-6. Kalpasan ti ababa nga introduksion, a maipakita no kasano a ti aborsion ket adda iti damag ita ken pakaseknan dagiti minilion a tattao, mairubbuat ti pabuya ti maysa a kabsat a babai a mangikondukta iti panagadal ti Biblia. Ti baro nga estudiante iti Biblia ket ibagana iti kabsat a babai a maseknan unay maipapan ti panagsikogna. Ilawlawagna a madanagan unay, nangruna ta saan a natalged iti pinansial a kasasaad ti pamiliana. Paregtaen dagiti kabagianna a taga lubong nga agaborsion wenno agparegreg a dagus. Insingasing ti kabsat a babai a luktanda iti libro a Panakirinnason ken sukimatenda dagiti Kasuratan tapno kitaenda no kasano ti panangmatmat ni Jehova iti biag ti maysa a dipay a naiyanak nga ubing ken no maiparbeng ti panagaborsion. Umuna nga usigenda ti depinasion iti aborsion. Kalpasanna lawaganda dagiti saludsod, kasuratan, ken dadduma pay a komento iti pinanid 25-6. Tulongan daytoy kabsat ti estudiante nga agrason ken mangipateg iti kinasagrado ti biag.
Kanta 30 ken pangserra a kararag.
Lawas ti Pebrero 17-23
10 min: Lokal nga anunsio ken Teokratiko a Damdamag. Mairaman ti report iti kuenta ken subalit ti donasion.
15 min: “Introduksion a Mangawis iti Bumalay a Dumngeg.” Ababa a panangusig iti langa ti lokal a teritoria. Ania nga isyu ti nasken kadagiti bumalay? Maiturong iti introduksion ken presentasion nga isut’ kasayaatan nga agballigi iti lokal. Maaddaan iti naimbag ti panagsaganana nga agibumbunannag a mangidemostra iti daytoy a presentasion ken itukonna ti Worldwide Security a libro, wenno ti libro a maitukon iti lokal a pagsasao. Isango ti agibumbunannag iti presentasion kas naiwayat idiay artikulo. Kalpasanna maysa nga agtutubo iti pagadalan ti mangidemostra iti isu met laeng a presentasion ken ingudona babaen ti maitukon a magasina iti interesado a tao. Maparegta dagiti amin a mangpadas iti daytoy a metodo idiay tay-ak ti serbisio.
20 min: No Kasano a Dagiti Agwaywayas a Nagannak ket Matulonganda iti Annakda. Ababa nga introduksion a sarunuen iti demostrasion ti maysa nga ina kadagiti dua nga annakna nga agsagana a maipaay iti tay-ak ti serbisio. Umad-adu dagiti agwaywayas ti nagannakda a pamilia iti organisasion ita ngem iti napalabas. Ti wagas da nanang ken apong a baket ni Timoteo a nangimula iti kinapudno kenkuana isut’ maysa a nasayaat nga ehemplo a suroten dagiti amin a nagannak. (2 Tim. 1:5; 3:14, 15) Demostrasion: Maysa nga ina, agtutubo nga anak a balasang, ken balasitang a nakatugaw iti lamisaan idiay kusina, a lepleppas ti pangrabiida. Kunaen ti ina a sakbayda nga aginnaw iti pinggan sanayenda pay dagiti presentasionda a maipaay iti serbisio ket isu ti agparang a bumalay. Pilien ti anak nga inaudi daydiay introduksion iti panid 4 idiay Ti Ministeriotayo iti Pagarian ket iparangna ken nanangna. Sibabara a komendaran ti ina iti nasayaat a panangiparangna ket kiddawenna a basaenna iti kasuratan nga insingasing ti Sosiedad. Nasarakanna a dagus ti Isaias 9:6, 7 ket basaenna. Kalpasanna kiddawen ti ina iti inauna a balasangna no kasanona nga itukon ti libro. Pilien ti anakna daydiay transision wenno panagallatiw manipud panid 1 iti Ti Ministeriotayo iti Pagarian ket iparangna ken nanangna. Padayawan ni nanangna ken paregtaenna ida a dua a sanayenda iti introduksion ken transision tapno maitukonda ti libro iti tay-ak ti serbisio. Nabalakadanda nga itultuloyda pay laeng ti agsanay sadanto aginnaw. Ingudo ti panglakayen daytoy a paset babaen ti pammaregta iti amin a pamilia ti kongregasion tapno maipaay iti naayat a tulong kadagiti annakda.
Kanta 183 ken pangserra a kararag.
Lawas ti Peb. 24–Mar. 1
15 min: Imatonan ti maysa a panglakayen iti lokal nga anunsio ken mausig dagiti lokal a kasapulan. Kas ipalubos ti tiempo, malawagan dagiti nagduduma a mapagsaritaan a puntos manipud kaudian a ruar dagiti magasina. Pilien ti maysa a maisilpo a sisasayaat iti maysa a naisingasing nga introduksion ken transision wenno panagallatiw iti daytoy a ruar Ti Ministeriotayo iti Pagarian. Kalpasanna paidemostra iti nakasagana a naimbag nga agibumbunannag ti naan-anay a panangiparang a mausar iti introduksion ken transision, a maitukon dagiti magasina iti interesado a tao. Maitudo a babaen ti pannakisao kadagiti tattao ken mausar dagiti naisingasing a panangiparang, saan a narigat a mailasin dagiti interesado a tattao.
15 min: “Panangawat iti Responsabilidad nga Agsarungkar.” Saludsod ken sungbat. Paregtaen a sibabara dagiti amin a makibiang a naan-anay iti panagsarungkar. Maparegta dagiti amin a tumabunoda iti sumaruno a lawas tapno mapagsaritaan iti Gimong ti Serbisio no ania ti sawenda inton agsarungkarda.
15 min: Agpaay Kadi Kaniak iti Payunir a Serbisio? Iti daytoy a pagilian agarup a 14 porsiento iti amin nga agibumbunannag ti regular payunir. Maited ti lokal a bilang kas panangidilig. Ad-adu pay kadi kadatayo, agraman agtutubo nga agraduaren iti haiskol, ti makailugar iti amin a tiempo a serbisio? Mainterbio dagiti tallo a regular payunir, maysa nga agtutubo, maysa nga asawa a babai, ken maysa a retirado a tao. (No awan ti regular payunir, mabalin a mausar dagiti auxiliary payunir ken agibumbunannag a nagpayunir idi.) Mausig maipapan ti magastos. Ania a tipo iti paset ti tiempo a panggedan iti adda dita lugaryo? Kasano a tunggal maysa ket mapagsiglotna dagiti bambanag? Ania a panagbalbaliw iti maaramid maipapan ti kababalin iti panaggasto? Matinong iti iskediol tapno maragpat ti kalat nga oras. Adda aya problema iti salun-at? Kasano a nasarangetda? Ania dagiti dadduma a karit a napagballigianda? Masapul a positibo ken makaparegta dagiti interbio. Maaramid ti nabara nga apelo kadagiti timmabuno nga usigenda ti kasasaad tapno maikeddengda no ad-adu pay dagiti tumapug iti amin a tiempo a serbisio.
Kanta 164 ken pangserra a kararag.
Lawas ti Marso 2-8
10 min: Lokal nga anunsio. Paregtaen dagiti agibumbunannag iti auxiliary payunir bayat ti Marso ken Abril. Maparegta dagiti pamilia, agraman agtutubo nga agibumbunannag isuda nga agbakasion bayat iti Marso wenno Abril, a kitaenda no ania nga urnos ti maaramidda tapno ad-adu ti pannakiramanda iti tay-ak ti serbisio.
20 min: “Ania ti Sawenyo no Agsublikayo?” Malawagan a kadua dagiti timmabuno ken paidemostra kadagiti nakasagana nga agibumbunannag dagiti singasing iti parapo bayat a mausigda. Dagitoy nga ababa a demostrasion ti masapul a mainsayo iti nasakbay a tiempo.
15 min: “Panagpautang Kadagiti Pada a Kristiano.” Palawag babaen iti panglakayen iti artikulo manipud Oktubre 15, 1991, a Pagwanawanan, pinanid 25-8.
Kanta 147 ken pangserra a kararag.