Ipakaammoyo Dagiti Pannakilangen ni Jehova
1 “Ipakaammoyo kadagiti tattao dagiti pannakilangenna. Isaritayo a ti naganna ket maitan-ok . . . , ta nagaramid a naisangsangayan.” No iyanninag iti pannakilangen ni Jehova kadatayo kas tattao ken kas indibidual, saan kadi a ti pusotayo ket tignayennatayo a mangibaga iti dadduma? Iti 73 a tawenen a napalabas, winayaan ni Jehova dagiti tattaona manipud Nababiloniaan a pannakakayaw. Manipud 1919 ti pudno a panagdayaw isut’ sititibker a naipasdek ken isu itan ti nagsaknap iti amin a paset ti daga, iti kalawa a dakdakkel ngem ti ninamnama. Kas indibidual, makaaramidkayo aya ti ad-adu pay a panangiwaragawag iti pannakilangenna ken ti panangitan-ok iti naganna?
2 Ti tiempo iti Memorial iyegna ti kapanunotan iti nadibinuan a tignay nga isut’ agnanayon a pagyamanantayo. Iti bulan ti Abril ken Mayo isudat’ nangruna a maitutop a tiempo nga ipakita ken Jehova ti panangipateg babaen iti panagpalista kas auxiliary payunir.
3 Masansan, nasayaat ti andar iti urnos no ti grupo dagiti agibumbunannag ket agpalistada nga auxiliary payunir. Ti naimbag nga iskediol ti mabalin a maaramid tapno amin ket adda kakuyogna, ket dagiti kakabsat a babbai nga addaan annak ti agbibinnadang iti maysa ken maysa. Babaen ti nasayaat a plano, masarakan dagiti adu a saan unay a narigat a maragpat iti kasapulan a 60-oras. Kaipapananna laeng daytoy ti panangipaay iti promedio a 2 nga oras ti kada aldaw iti ministerio wenno 15 nga oras ti kada lawas. Dadduma kadagiti auxiliary payunir ti mangasaba iti maysa wenno dua nga oras sakbay wenno kalpasan ti sekular a trabahoda ken addaanda iti at-atiddog a tiempo ti ngudo iti lawas.
4 Uray pay saanyo a kabaelan iti auxiliary payunir a trabaho, kaskasdi a mapawadwadyo ti aktibidadyo iti tay-ak ti serbisio. No makatulongkayo met iti transportasion wenno makikuyogkayo kadagiti payunir, maysa a pammaregta dayta kadakuada. Aniaman ti maaramidyo a panangirakurak iti pannakilangen ni Jehova saanto a di madlaw ti manangipateg a Dios.—Mal. 3:16.