Makaserbikayo Kadi nga Auxiliary Payunir?
1 Indagadag ni Jesus kadagiti pasurotna ti panagregtada iti ministerio, ket impanamnamana kadakuada a ti panangsurotda iti daytoy a kurso isut’ mangyeg kadakuada ti ragsak. (Mat. 10:8b; Ara. 20:35) Idi napalabas nga Abril adda 15,730 a nagserbi kas auxiliary payunir. Mabalinanyo kadi ti makiraman kadagitoy a bendision iti daytoy a tawen babaen ti panagpalistayo kas maysa nga auxiliary payunir bayat iti Abril ken Mayo?—Sal. 34:8.
2 Panangusig iti Kasasaadyo: Bayat nga usigenyo dagiti kapadasan ditoy baba, saludsodanyo ti bagiyo: ‘Mabalinko ngata a tuladen iti maysa kadagitoy nga ehemplo? Kasanok a maaramid dagiti panangihusto tapno malukatan iti dalan ti panagserbik nga auxiliary payunir?’
3 Maysa a kabsat a babai ti nakapagserbi nga auxiliary payunir uray no isu ket addaan iti lima nga annak ken adda panggedanna. Kasano a nagunggonaan? Impaay ti asawa ken dagiti annakna iti ekselente a suportar, ket kas resulta ti naimbag nga ehemplo daytoy a kabsat a babai, natignay daytoy asawana a nagbalin a saan pay a bautisado nga agibumbunannag iti sumaruno a bulan.
4 Iti maysa a kongregasion amin dagiti panglakayen ken ministerial nga adipen ket nagserbida nga auxiliary payunir bayat iti maysa a bulan. Kaaduan kadakuada ti addaan iti sekular a pagsapulan, ngem inusarda ti intero a ngudo iti lawas a maipaay ti espiritual nga aktibidad. Daytoy a nagsayaat a panangidaulo ti nagimbagan iti intero a kongregasion. Ta kadagiti 77 nga agibumbunannag, 73 ti nakiraman iti auxiliary payunir a serbisio las-ud dayta a bulan.
5 Maysa nga ag-15 iti edadna a babai nga ageskuela ti nangusar iti dua a lawas a bakasionna a kas auxiliary payunir ti nagkuna: “Makitak a pudno ti panagrang-ay iti pannakisaok. Ad-adu ti pannakisaok kadagiti tattao iti ruangan.”
6 Dagidiay nagretiro iti sekular a panggedanda ti masansan nga addaan iti nagpaiduma a gundaway a mangtaming ti intereses iti Pagarian. Kalpasan ti ipupusay iti asawana, maysa nga 84 ti edadna a kabsat a babai ti nagsurat: “Amin dagiti annakko ti dadakkel ken nagasawa ken addaandan iti pamilia. Saandak a binaybay-an, ngem ti isasar-ongda ket saanna a pinarukma iti rikna a panagleddaang. Iti dayta maysa kadagiti panglakayen ti kongregasionmi insingasingna a padasek iti agserbi nga auxiliary payunir. Nagkedkedak idi damo ngem kamaudiananna inkeddengko a padasek. Anian a rag-o! Manipud idin nagtultuloyak a kas auxiliary payunir iti kada bulan.”
7 Agplanokayo Itan: Apay a dikay agpositibo nga agplano itan tapno makaserbikayo nga auxiliary payunir inton Abril ken Mayo? Tapno agballigikayo, masapul ti naannad a plano. Nabatad daytoy iti kapadasan dagidiay a nagballigi a nagserbi nga auxiliary payunir nupay adda responsabilidadda iti pamilia ken adda amin a tiempo a panggedanda. Makisaokayo kadagiti dadduma a nagballigi a nagpayunir tapno magunggonaankayo iti kapadasanda. Kasta met nga umasidegkayo ken Jehova iti kararag, a kiddawenyo ti badangna.—Isa. 40:29-31; Sant. 1:5.
8 Awan duadua, adu a rag-o ti magun-odan dagidiay a mangurnos ti kasasaadda tapno makaserbida nga auxiliary payunir. Maysakayo aya a mangsagrap iti daytoy a pribilehio? No ikagumaanyo a palawaen iti ministerioyo, sigurado nga iparukpok ni Jehova ti nabaknang a bendisionna kadakayo.—Mal. 3:10.