Epektibo a Panagtrabaho iti Balaybalay
1 Kadagitoy nga aldaw ti “naimbag a damag” ket maikaskasaban iti intero a daga. (Mat. 24:14) Maar-aramid daytoy a nangnangruna babaen iti panagbalaybalay a ministerio.—Ara. 20:20, 21.
2 Ti panangiparangtayo isut’ masapul a maitutop kadagiti tattao a masabettayo. Gapuna a nasayaat ti panagsagana kadagiti nagduduma a Nainkasuratan a suheto a makaallukoy iti tattao idiay teritoriatayo.
3 Usarenyo a Naimbag Dagiti Broshur: Dagiti broshurtayo ket kobrianda dagiti nawadwad a suheto a makaawis kadagiti tattao iti uray sadino. Dagiti ilustrasionda ket epektiboda a makatulong. Dagiti broshur ti tumulong kadagiti tattao a kumita iti kasapulan a panagbaliw ti pammatida, kababalinda, ken wagas iti panagbiagda. Babaen ti naan-anay a panangkabisado iti linaon dagiti broshur isut’ tumulong kadatayo a makisao nga epektibo kadagiti tattao iti nagduduma a topiko.
4 Tapno epektibotayo iti ministerio, kasapulan nga ipakita ti napudno a personal nga interes. (Fil. 2:4) Ikagumaan nga iturong ti saritaan iti tema ti Pagarian a mangiraman iti daydiay tao ken dagiti kasapulanna. Sarakentayo a maawatan iti pampanunot daydiay tao babaen kadagiti maitutop a saludsod. Imdenganyo a naimbag dagiti sungbatna. Dagiti komentona ti nalabit a makatulong kadakayo a mangtinong no ania a suheto iti paginteresanna. Kayattayo a tulongan dagiti tattao a kumita iti pateg ti damag iti Pagarian ken ipakita kadakuada no kasano a makaadal pay ti ad-adu maipapan iti dayta. Maysa a pagasawaan ti nangilawlawag nga inawatda iti panagadal ti Biblia agsipud ta daydiay kabsat a simmarungkar kadakuada ket impariknana iti napasnek nga interesna kadakuada.
5 Kadagiti Masansan a Matrabaho a Teritoria: Ti panagbalin nga epektibo isut’ nangruna a nasken iti teritoria a masansan a matrabaho. Ti mas epektibo a ministerio isut’ tumulong kadatayo a mangpalawa iti teritoriatayo. Imbes nga agtignaytayo a kas dipay napan iti dayta a balay iti napalabas, mabalin a dakamaten ti immuna a sarungkartayo ket nayonan pay iti nasaotayo bayat daydi a tiempo. Dagiti panangiparang a naisingasing kadagiti kallabes a ruar iti Ti Ministeriotayo iti Pagarian ken ti Panakirinnason a libro isudat’ mabalin a maibagay iti kasapulan ti teritoria.
6 Siaanus a pinagtalinaed ni Jehova a silulukat iti ruangan nga agpaay iti ad-adu pay a tattao a magunggonaan iti bendision ti Pagarian. Ti ministerio ni Jesus ket epektibo agsipud ta inayatna dagiti tattao. (Mar. 6:34) Ar-aramidentayo met laeng iti kasayaatantayo a mangsurot ti ulidanna? (1 Ped. 2:21) Ditay koma agkitakit a makiraman a naan-anay iti epektibo a panagbalaybalay a ministerio.—2 Tim. 4:5.