Panangiparang ti Naimbag a Damag—Babaen ti Magasina iti Masansan a Mawanas a Teritoria
1 Iti Aramid 8:25 mabasa a da Pedro ken Juan ket nangtedda iti naan-anay a pammaneknek idiay Samaria ken kalpasanna inwaragawagda “ti naimbag a damag kadagiti adu a purpurok.” Kadagitoy nga aldaw, masapul met nga itedtayo ti naan-anay a panangpaneknek iti teritoriatayo.
2 Adu dagiti kongregasion a masansan a mawanasda dagiti teritoriada. Ngem ditay koma agnegatibo iti daytoy. Babaen ti kada ruar iti Ti Pagwanawanan ken Agriingkayo!, kanayon nga adda baro a topiko a mairanudtayo kadagiti tattao.
MAKISAOKAYO KADAGITI TATTAO
3 Kaaduan nga usarentayo iti ababa unay a panangiparang ti magasina tapno maited iti nalawa a pannakaiwaras dagitoy. Nupay kasta, no agtrabahokayo kadagiti masansan a makobrian a teritoria, adda pagimbaganna no mapaatiddog ti makisao kadagiti bumalay. Uray kadagiti ubbing mabalin a mapaatiddog ti makisao maipapan kadagiti paginteresanda nga artikulo. Kasanotayo a maaramid daytoy? Nasken unay a kabisadotayo dagiti artikulo ti magasina. No basaen dagiti magasina, siputanyo no ania iti makaallukoy kadagiti tattao iti teritoriayo. Kalpasanna, sakbay a rummuarkayo iti serbisio, pilienyo dagidiay topiko a dakamatenyo. Usarenyo dagiti kasayaatan a suheto iti magasina a kas pinakasentro iti introduksionyo. Awisenyo ti panangmatmat iti bumalay babaen ti nainggayyeman a pannakisao.
4 Ti panangitiempo a makisao kadagiti tattao isut’ tumulong kadatayo a mangeddeng no ti tao ket pudno nga interesado. Iti kastoy a wagas makaibatitayo iti magasina kadagidiay a mangitiempo a mangbasa kadakuada.
LAGLAGIPEN ITI PANGGEPTAYO
5 Ti panggeptayo a mapan iti balaybalay isut’ saan a tapno adu laeng ti maiwarastayo a magasina ken libro. Ti tarigagaytayo isut’ tumulong kadagiti dadduma a dumteng iti umiso a pannakaammo iti kinapudno. Da Pedro ken Juan ket insawangda iti Sao ni Jehova kadagiti Samaritano iti naan-anay a wagas, ket kayattayo met nga usaren iti kasapulan a tiempo a makita dagiti tattao idiay teritoriatayo a maikkanda iti gundaway a mangipangag iti kinapudno. Mangidulinkayo iti rekord dagidiay a nangipakita ti napudno nga interes ket ipasdekyo iti basaran ti panagadal iti Biblia kadagidiay pakabalinanna.
6 Babaen ti siiepektibo a panangusar kadagiti magasina a kas batayan iti pannakisaotayo, maitungpaltayo daytoy a panggep. Ikararagtayo a maipaay iti bagbagitayo a mismo ken dagiti dadduma a maited koma kadatayo iti “abilidad nga agsao . . . tapno maipakaammo iti sagrado a palimed ti naimbag a damag . . . a buyogen iti kinatured.”—Efe. 6:18-20.