Pannakagunggona Kadagiti Palawag Publikotayo
1 Umiso ti pannakadeskribir ti moderno a pakasaritaan dagiti Saksi ni Jehova iti Proverbio 4:18: “Ti dana ti nalinteg kas iti anaraar ti agsapa, a rumaniag a rumaniag agingga iti napaypayso nga aldaw.”
2 Nalabit makaibagakayo kadagiti pagarigan no kasano a pudno daytoy sipud idi nangrugikayo a makitimpuyog iti ili ni Jehova. Dagiti gimong ti kongregasion, a pakairamanan dagiti palawag publiko, tulongandatayo a di paudi iti rumanraniag a lawag ti kinapudno a maipapaay babaen iti “matalek ken masirib nga adipen.”—Mat. 24:45-47.
3 Napabaro a Material: Naynay a pabaruen ti Sosiedad dagiti balabala ti palawag publiko. Manayonan iti baro a material ken addada napapateg a punto a malawlawagan. Gapuna, rumbeng a dagiti laeng kaudian a balabala ti usaren dagiti kakabsat a mangipaay iti palawag publiko iti kongregasion tapno kanayon a baro ti materialda.
4 Tapno magunggonaan a naan-anay kadagiti palawag publiko, ikagumaanyo a lagipen ti kaudian nga impormasion kadagiti publikasion a mainaig iti tema a maisalaysay iti dayta a lawas. Kalpasanna, bayat a dengdenggenyo ti palawag, seggaanyo ti pannakaiparang daytoy nga impormasion. Imutektekanyo dagiti aniaman a kabbaro a wagas a panangisango kadagidiay a kinapudno a mausarto iti masanguanan. Daytoy ti mangipasiguro a di mapukaw ti interesyo iti palawag ket addanto praktikal a pagimbagan dayta kadakayo a personal.
5 Dagiti Palawag Publiko Tignayenna Koma Dagiti Agdengdengngeg: Idi nagpalawag ni Jesus, dinanonna ti puso dagiti agdengdengngeg kenkuana. Kalpasan ti Sermon ni Jesus idiay Bantay, kuna ti Mateo 7:28: “Ti imbungana ket nagsiddaaw unay dagiti bunggoy iti wagas ti panangisurona.”
6 Tangay sipapanunotda iti ehemplo ni Jesus, agannad koma dagiti panglakayen iti panangaprobarda kadagiti baro a pumapalawag iti publiko, a dagidiay laeng kakabsat a nalaing a mangisuro ti tudinganda, dagidiay mangsurot a naimbag iti balabala ti Sosiedad ken makagutugot iti atension dagiti agdengdengngeg.
7 Kas naipadto iti Isaias 65:13, 14, agtultuloy nga agminar ti naespirituan a kinarang-ay ti ili ti Dios. Ti urnos iti palawag publiko ket maysa kadagiti adu a wagas a ‘panangisuro ni Jehova’ kadatayo.—Isa. 54:13.