Ti Kangrunaan a Pasamak iti Natauan a Historia
1 Immay ni Jesus ditoy daga babaen ti panangiwanwan ni Amana tapno saksianna ti kinapudno a mangiturong kadatayo iti agnanayon a biag. (Juan 18:37) Ti kinamatalekna agingga ken patay ti nangyeg iti dayaw ken Jehova, nasantipikar ti nagan ti Dios, ken impaayna ti subbot. (Juan 17:4, 6) Daytoy ti nangaramid iti ipapatay ni Jesus kas kapatgan a pasamak iti amin a natauan a historia.
2 Manipud pannakaparsua ni Adan, adda laeng dua a perpekto a tao a nagbiag ditoy rabaw ti daga. Adda ni Adan iti lugar a mangyeg iti nakaskasdaaw a bendision kadagiti saan pay a naipasngay a kaputotanna. Imbes ketdi, sisusukir a nagrebelde, a kinondenarna ida iti nakaay-ay-ay a panagbiag nga agtungpal iti ipapatay. Idi immay ni Jesus, imparangarangna ti perpekto a kinasungdo ken kinatulnog, a nanglukat iti gundaway maipaay iti agnanayon a biag kadagiti amin a mangalagad ti pammati.—Juan 3:16; Roma 5:12.
3 Awan ti sabali a pasamak a maipada iti ipapatay a daton a sakripisio ni Jesus. Daytat’ nangbaliw iti turong ti natauan a historia. Nangted ti basaran iti panagungar dagiti binilion a tattao manipud ken patay. Impasdekna ti pundasion maipaay iti agnanayon a Pagarian a mangyeg iti panagngudo ti kinadakes ken pagbalinenna ti daga a paraiso. Wayawayaannanto a naan-anay ti intero a sangatauan manipud iti amin a porma ti panangirurumen ken panangadipen.—Sal. 37:11; Ara. 24:15; Roma 8:21, 22.
4 Amin dagitoy ti tumulong kadatayo a mangipateg no apay nga inwardas ni Jesus dagiti disipulona a lagipenda ti ipapatayna babaen ti tinawen a panangrambak iti Memorial. (Luc. 22:19) Kas panangipateg iti kaipapananna, kumitatayo iti masanguanan a pannakitaripnong kadagiti kongregasion dagiti Saksi ni Jehova iti sangalubongan kalpasan ti ilelennek ti init iti Biernes, Abril 4. Sakbay dayta a tiempo, nasayaat no basaen ti pamilia a sangsangkamaysa ti pakasarsaritaan ti maudi nga al-aldaw ni Jesus ditoy daga iti Biblia ken ti natured a panangitakderna iti kinapudno. (Dagiti nairekomenda a paset ti nainotar iti 1995 Calendar, Abril 9-14.) Intuyangna kadatayo ti padron iti debosion iti Namarsuatayo. (1 Ped. 2:21) Aramidentayo ti amin a kabaelantayo a mangawis kadagiti gagayyem ken pamiliatayo, agraman dagiti estudiante ti Biblia ken interesado a tattao iti daytoy a napateg a taripnong. Ilawlawagyo a nasaksakbay no ania dagiti maaramid ken ti kaipapanan dagiti emblema.—1 Cor. 11:23-26.
5 Masapul nga agplano a nasaksakbay dagiti panglakayen tapno masiguro a nadalimanek ken nadalus ti Kingdom Hall. Kasapulan a mayurnos no siasino ti agsagana kadagiti emblema. Ti pannakaipasa dagiti emblema masapul nga organisado. Dagiti makatulong a singasing no kasano a maipakita ti panagraem iti Pangrabii ti Apo ti naited idiay The Watchtower iti Pebrero 15, 1985, panid 19 (Agosto 15, 1985 iti Iloko). Maitutop unay iti kongregasion no mayurnos iti napalawa a trabaho iti serbisio ti tay-ak adu nga aldaw sakbay ti rambak agraman sumagmamano nga aldaw kalpasanna.
6 Idi napan a tawen, agdagup ti 12,288,917 dagiti timmabuno iti sangalubongan kas pananglagip iti daytoy nasken a pasamak. Tangay isut’ kapatgan nga aldaw iti kalendariotayo, amintayo ti masapul a tumabuno.