“Aramidenyo Daytoy a Panglaglagip Kaniak”
1 Binilin ni Jesus dagiti pasurotna a rambakanda iti anibesario ti ipapatayna. (Luc. 22:19) Iti daytoy a tawen dagiti Saksi ni Jehova ti intero a lubong ket rambakanda iti Memorial ti ipapatay ni Kristo inton Biernes, Abril 17, kallennek iti init.
2 Panagsagana a Personal: Kasanotayo nga agsagana a maipaay iti rumbeng a panangalagad iti daytoy a nagpateg nga okasion? Ti maysa a wagas isu ti panangutob a sikakararag iti naindagaan a biag ken ministerio ni Jesus. (Mat. 20:28) Tapno matulongan ti tunggal maysa a mangipateg iti daytoy a parabor, irekomendatayo nga usigenda dagiti kapitulo 112 aginggat’ 116 idiay libro a Ti Katan-okan a Tao a Nagbiag Pay Laeng.
3 Ti panagbasatayo iti Biblia sakbay ti Memorial iti daytoy a tawen isut’ buklen dagiti napili a bersikulo manipud libro ti Biblia a Marcos. Daytoy nga espesial a panagbasa ti Biblia iti naiyiskediol bayat ti Abril 12-17. Kayattayo amin nga itiempo ti panangutob kadagitoy a makapaldaang a paspasamak.
4 Naan-anay a Panagsagana Dagiti Panglakayen: Adda kadi umdas a pagtugawan dagiti manamnama a tumabuno? Kadagiti nasurok ngem maysa a kongregasion a mangusar iti hall, nasken ti natunos nga urnos tapno kada kongregasion ket addaanda iti supisiente a tiempo a mangrambak ti Memorial. Dagidiay agserbi kas attendant ti masapul a mapakaammuan iti rebbengenda. Maysa a makabael a pumalawag ti masapul a mapili. Madutokan dagiti responsable a panglakayen wenno ministerial nga adipen a mangipasa kadagiti emblema. Awan lebadurana a tinapay ken saan a natibknokan a nalabaga nga arak iti maipaay. Kadagiti kanayonan a palagip, kitaenyo idiay Agosto 15, 1985, a ruar iti Ti Pagwanawanan, panid 19.
5 Babaen iti naan-anay a nasakbay a panagsagana, maidemostratayo ti pudno a panangipateg iti kaipapanan daytoy espesial nga okasion ken kayattayo a selebraran ti Memorial iti ipapatay ni Kristo kas panangtungpal ti bilin ni Jesus.—1 Cor. 11:23-26.
[Kahon iti panid 7]
1. Napakaammuan kadin iti tunggal maysa, agraman ti ispiker, maipapan iti eksakto nga oras ken lugar ti selebrasion? Adda aya pagluganan ti ispiker?
2. Adda kadin masinnunuo nga urnos iti pannakaisagana dagiti emblema.
3. Naaramiden aya ti urnos no siasino daydiay mangitugot iti nadalus a mantel ti lamisaan ken iti kasapulan a bilang dagiti kopa ken plato?
4. Ania nga urnos ti naaramiden a maipaay iti panagdalus ti hall sakbay iti Memorial?
5. Nadutokan kadin dagiti attendant ken dagiti mangipasa? Adda aya naiyiskediol a miting kadakuada sakbay ti Memorial tapno maiwardas iti rebbengenda? Kaano?
6. Kompleto kadi ti urnos a tumulong kadagiti nataengan ken baldado a kakabsat a lallaki ken babbai? Naiyurnosen aya daydiay mapan mangserbi iti siasinoman a napulotan a naidalit a saan a makapan iti Kingdom Hall?