Tulongan Dagiti Sabsabali Tapno Magunggonaanda
1 Isuro ni Jehova ti masapul a maammuantayo. Kunaen ti Salmo 32:8: “Iwardas ken isurokanto iti dalan a pagnaemto. Balakadankanto a sisisiput toy matak kenka.” Kayattayo nga ipakita iti sabsabali no kasano a magunggonaanda babaen ti inda panangipangag iti masirib a balakad manipud iti Biblia. (Isa. 48:17) Maaramidtayo daytoy bayat ti Setiembre babaen iti panangitukon iti libro nga Agbiag nga Agnanayon. Maipakita babaen iti nagduduma a panangiparang ti praktikal a pateg ti Biblia.
2 Gapu kadagiti dumegdegdeg a problema ti panagasawa itatta, mabalin a pilienyo a dakamaten daytoy a kapanunotan manipud iti libro nga “Agbiag nga Agnanayon”:
◼“Adu itatta ti maseknan unay maipapan iti kumarkaro a sennaay ti panagasawa. Ania ti makunayo maipapan iti daytoy a problema? [Palubosan a sumungbat.] Adu ti saan a makatarus kadagiti makagapu. No napasnek ti panangikagumaanda, saan laeng a masalbar dagiti agassawa ti panagasawada no di ket masarakanda pay ti pudpudno a kinaragsak. Masarakan ti tulbek idiay Biblia.” Basaen ti Efeso 5:28, 29, 33. Luktan ti panid 243, salaysayen dagiti parapo 16 ken 17.
3 Kasapulan dagiti ubbing ti napateg a tiempo ken pannakasanay manipud kadagiti nagannakda. No dakamatenyo ti libro nga “Agbiag nga Agnanayon,” mabalinyo a kunaen:
◼“Maseknantay amin maipapan iti naimbag a masanguanan dagiti agtutubotayo. Iti opinionyo, ania ti kasayaatan a wagas a pangtulongan dagiti nagannak kadagiti annakda a mangsarak iti natalged a masanguanan? [Palubosan a sumungbat.] Denggenyo daytoy a proverbio ti Biblia. [Basaen ti Proverbio 22:6.] Kinapudnona, maipaay ti kapatgan a pannakasanay iti pagtaengan babaen kadagiti nagannakda. Kasapulanna ti panawen, asikaso, ken ayat, ngem saan a sayang ti panagregget.” Luktan ti panid 245, pagsaritaan dagiti parapo 20 ken 21, sa ilawlawag no kasano nga usaren ti pamilia ti libro kas basaran iti panagadal iti Biblia.
4 Nalabit a kayatyo nga itukon ti libro nga “Agbiag nga Agnanayon” babaen ti panangipakita no kasano nga agbalin ti daga a paraiso:
◼“Namnamaek a maseknankayo maipapan ti kabibiagyonto iti masanguanan. Iti Kararag ti Apo, insuronatay ni Jesus a mangikararag a maaramid koma ti pagayatan ti Dios ditoy daga a kas sadi langit. Anianto ngata ti langa ti daga inton maaramid dayta? [Palubosan a sumungbat.] [Usaren ti ilustrasion iti pinanid 12 ken 13. Basaen ti Isaias 11:6-9.] Saan kadi a nakaskasdaaw ti agbiag iti kasta a lubong? Ipakita daytoy a libro kadakayo ken iti pamiliayo no kasano a mabalinyonto ti agbiag iti kastoy a paraiso.”
5 Ti nasakbay a panangisagana iti parangyo ket isut’ tulbek ti balligiyo iti ruangan. Siguraduenyo nga adda masinunuo a sawenyo maipapan iti Nainkasuratan a kapanunotan. Kasta met, adda koma nakasagana nga ababa a komento maipapan iti makapainteres a paset ti magasin wenno tract a planoyo nga itukon no saanna nga awaten ti libro. Gundawayanyo ti kada oportunidad a mangimula iti bin-i ti kinapudno ti Pagarian bayat ti Setiembre. (Ecl. 11:6) Matulonganyo dagiti sabsabali nga agani kadagiti gunggona nga agpaut ti agnanayon.