Surnadan ti Amin nga Interes Tapno Magunggonaan ti Sabsabali
1 No adda mangipakita iti uray sangkabassit nga interes iti mensahe ti Pagarian, kayattay nga aramiden ti inggat’ kabaelantayo tapno magunggonaan dayta a tao. Isu a ti panggep ti panagsarungkartayo ket tapno rukiten ti interes ti tao ken irugi ti panagadal iti Biblia iti pagtaengan. Kasano a maaramidan daytoy?
2 No ti napalabas a nagsaritaanyo ket maipapan kadagiti dumegdegdeg a problema ita maipapan ti panagasawa ket naibatiyo ti libro nga “Agbiag nga Agnanayon,” mabalinyo a luktan ti saritaanyo a kastoy:
◼ “Iti napalabas, nagsaritaantayo maipapan ti panagasawa ken ti praktikal a balakad ti Biblia a makatulong kadatayo a maaddaan iti ad-adda a ragsak. Saan kadi nga uray kadagiti kasayaatan a pamilia, ket tumaud dagiti problema iti sagpaminsan? [Palubosan a sumungbat.] Ikkannatay ti Biblia iti ekselente a pammagbaga a makatulong kadatayo a mangsolbar kadagiti problema iti relasion ti pamilia. Mabendisionan ti maysa a pamilia babaen iti panagadal iti Biblia a sangsangkamaysa.” Luktan iti panid 246, parapo 23. Basaen ti Juan 17:3, sa itukonyo a tulongan ti pamilia tapno mairugi ti panagadal iti Biblia.
3 No naisaritayo idi ti maipapan kadagiti ubbing ken ti kasapulan a pannakasanayda, mabalinyo nga ituloy ti agsarita a kastoy:
◼ “Nagsaritaantay idi ti maipapan iti naespirituan a pannakasanay a kasapulan dagiti ubbing ken no kasano a matulongan ida dagiti nagannak. Adu a nagannak ti aglagaw maipapan iti dakes a kababalin dagiti adu nga agtutubo kadagitoy nga aldaw. Ania ti makunayo maipapan iti . . . ? [Dakamaten kas ehemplo ti dakes a kakabalin dagiti agtutubo a masansan a maimatangan iti komunidadyo. Palubosan a sumungbat.] Palubosandak a mangipakita kadakayo iti sumagmamano a praktikal a balakad nga ited ti Biblia.” Luktan ti parapo 22 idiay panid 246 iti libro nga Agbiag nga Agnanayon, sa basaen ti Efeso 6:4. Mayat a padisiplinaan ken paidalan ti kaaduan nga annak. No ipaay dagiti nagannak dayta, naragragsak ken nadaydayaw dagiti annak. Ilawlawag no kasano nga iyadal ti Biblia kadagiti annaktayo.
4 No ti tema a nagsaritaanyo idi ket Paraiso a daga, iti kasta mabalinyo a kunaen daytoy a pangparayray iti interes:
◼ “Nakitatayo idi dagiti dadduma nga ilustrasion a mangipakita no anianto ti langa ti daga no aramiden ti Dios a paraiso. Bassit ti pateg daytoy kadatayo no saantayto a sagrapen dayta a kadua dagiti ay-ayatentayo. Umanamongkay kadi?” [Palubosan a sumungbat.] Luktan ti panid 162 iti libro nga Agbiag nga Agnanayon. Basaen ti Apocalipsis 21:3, 4, sa ilawlawag no kasano a makaduatayto a kanayon dagiti ay-ayatentayo. No dumngeg, basaen ti Juan 5:28, 29 a mangipakita a dagiti natay ket mapagungardanto. Ipakita ti akkub ti libro sa kunaen: “Pudno unay—mabalintay ti agbiag nga agnanayon iti Paraiso a daga!” lyurnos ti sumaganad nga isasarungkar.
5 Ti panggep ti panagsarungkar ket tapno tulongan dagiti interesado a tattao a magunggonaan iti mensahe ti Pagarian. Iturong ti atensionda iti masinunuo a punto a praktikal ti pategna iti literatura, nga ipaganetget no kasano a tumulong dayta kadakuada iti nasaysayaat a panangtarus iti Biblia. Ti panagsarungkar a makaibanag kadagitoy a kalat ket tumulongto iti dadduma a magunggonaan iti kasayaatan a wagas.