Mangasabakayo a Buyogen ti Pannakaawat
1 Tapno adda pannakaawat kasapulan a maawatantayo dagiti bambanag maipapan kadagiti tao a kasabaantayo. Apay? Agsipud ta agpannuray ti balligitayo a mangdanon iti puso dagiti tattao iti abilidadtay a mangidatag iti mensahe ti Pagarian iti pamay-an a makaallukoy kadakuada. Iti bulan ti Enero, itukontayo ti libro a Panangbiruk ti Sangatauan iti Dios, wenno ti libro a True Peace and Security—How Can You Find It? Mabalin a makatulong dagiti sumaruno a singasing.
2 No itukon ti libro a “Panangbiruk ti Sangatauan iti Dios,” mabalinyo a rugian babaen ti panagkuna:
◼ “Makapainteres a maam-ammo dagiti tattao a nagduduma ti relihionda. Ngem dikay kadi madlaw a mapneken ti kaaduan a tattao iti relihion dagiti nagannak kadakuada imbes a birokenda ti Dios a mismo? [Palubosan nga agkomento.] Daytoy a libro, Panangbiruk ti Sangatauan iti Dios, usisaenna ti sursuro dagiti dadakkel a relihion ken idiligna ida iti Biblia. Siputanyo dagiti lima a saludsod ditoy panid 17, parapo 28, a mabalin a tumulong kadatayo a mangsukimat iti pammatitayo a maidilig iti Biblia.” Basaen iti apagbiit dagiti saludsod sa awisen ti bumalay nga alaenna ti libro ken sukimatenna a mismo dagitoy a saludsod. Itukon ti panagsarungkar a maipaay iti kanayonan a panagsarita.
3 Wenno, kalpasan a mayam-ammo ti bagiyo, mabalinyo a kunaen:
◼ “Iti kaadu dagiti relihion ita, pinanunotyo kadin no kasano a masiguradotayo nga anamongan ti Dios ti relihiontayo?” Kalpasan ti komento ti bumalay, iturongyo iti panid 377 ti libro a Panangbiruk iti Dios sa ipakitatay dagiti sangapulo a wagas a pakailasinan ti pudno a relihion. Iyawistay a nangruna iti punto numero 6, ken basaen ti Mikias 2:2-4. Sa saludsoden iti bumalay no mano a relihion ti makaragpat kadagitoy a kasapulan ita. Itukon ti libro kenkuana tapno sukimatenna sa iyurnos ti panagsubli tapno pagsaritaan pay daytoy a banag.
4 Natakuatan ti adu a ti panangipakita laeng iti maysa a kapitulo ti libro a Panangbiruk iti Dios a mangibinsabinsa iti relihion ti bumalay ti tumulong a mangawis iti interesna. Nalabit a kayatyo a padasen daytoy nangruna kadagiti di-Kristiano.
5 No pilienyo nga itukon ti libro a “True Peace and Security—How Can you Find It?” mabalin nga iturongyo iti ilustrasion idiay panid 4 ken kunaenyo:
◼ “Iladawan daytoy nga ilustrasion no ania ti isursuro ti Biblia maipapan iti panggep ti Dios iti daga. Ania ti pagarupyo a kasapulan tapno makapagnaedkayo ken ti pamiliayo iti paraiso a daga? [Palubosan a sumungbat.] Ipakita ti Biblia a dandanin pumayso iti intero a daga ti pudno a talna ken talged ken maisublinton ti Paraiso. [Basaen ti Salmo 37:10, 11.] Daytoy a libro ti mangipakita kadakayo no ania ti kasapulan nga aramidenyo tapno magunggonaankayo iti aramidento ti Dios. Kayatko nga ibati daytoy a kopia kadakayo.”
6 Tulongannatay ti naimbag a pannakaawat a mangammo iti kasapulan ken paginteresan dagiti masabettayo a tattao. Ipanamnama daytoy kadatayo ti Proverbio 16:23, a kunana: “Ti puso ti masirib isurona ti ngiwatna a mangipakita ti pannakaawat, ket ti bibigna nayonanna ti kinamanangallukoy.”