Paset I—Magunggonaan iti Teokratiko nga Eskuelaan ti Panagministro iti 1996
1 Binasayo kadin daydiay naipaay nga instruksion a kakuyog ti “Theocratic Ministry School Schedule for 1996”? Nadlawyo kadi dagiti sumagmamano a nagbaliwanna? Manipud Enero aginggat’ Abril, naibasar ti Paset Num. 3 iti libro a Panakirinnason, ken manipud Mayo agingga ti Disiembre, maibatayto iti kair-iruar a libro a Pannakaammo. Palawagto ti Paset Num. 4 maipapan iti nagduduma karakter ti Biblia iti kada lawas.
2 Paset Dagiti Estudiante: Maited ti Paset Num. 3 iti kabsat a babai. No maibatay iti libro a Panakirinnason, ramanen ti parang ti panagbalaybalay wenno impormal a panangasaba. No maibasar iti libro a Pannakaammo, masapul a maiparang a kas panagsarungkar wenno panagadal iti Biblia. Makatulong unay daytoy, tangay mausarto a naimbag ti libro a Pannakaammo a pangikondukta kadagiti panagadal iti Biblia.
3 No ti parang ket maysa a panagadal iti Biblia, agtugaw a dua dagiti kakabsat a babbai. Mairugi a dagus ti panagadal babaen ti ababa nga introduksion, sa isaludsod dagiti naimaldit a saludsod. Kasla agpaypayso koma ti papel ti bumalay. Maluktan ken mabasa dagiti naisitar a kasuratan no ipalubos ti tiempo. Aramaten koma ti kabsat a babai ti arte ti panangisuro babaen ti panangguyugoy iti bumalay nga agsaludsod ken agrason kadagiti kasuratan a nausar.
4 Ania ti rebbeng nga aramiden no ad-adu ti kasuratan a naisitar iti paset ngem ti umanay a pagsaritaan iti lima a minuto? Pilien dagiti panulbek a teksto a mangitampok kadagiti kangrunaan a punto. No adda laeng sumagmamano a kasuratan, paatiddogen a pagsaritaan dagiti kangrunaan a punto iti leksion. Sagpaminsan, mabalin a basaen sa pagsaritaan a kadua ti bumalay ti maysa a parapo wenno palawag manipud iti libro.
5 Ti kahon a napauluan ti “Subokenyo ti Pannakaammoyo,” a masarakan iti ngudo ti kada kapitulo ti libro a Pannakaammo, mabalin a repasuen iti ababa ti agibumbunannag a makimpaset kadagiti maudi a parapo ti kapitulo. Mabalin met a pagsaritaan no ipalubos ti tiempo dagiti kahon ti impormasion a naibatog kadagiti naituding a parapo. No agparang ti kahon ti impormasion iti nagbaetan dagiti dua a paset, ti kabsat a babai a mangisango iti umuna a paset ti mangusig iti dayta. Mabalin a komentuan dagiti ilustrasion iti libro iti sadinoman a pagaplikaran ti material a mausig.
6 Masapul a makapainteres unay ken praktikal ti Paset Num. 4. Linawas a mausigto dagiti pudno-a-biag nga ehemplo—ti maysa a karakter ti Biblia. Siaannad nga adalen no ania ti kunaen ti Insight, Tomo 1, maipapan iti mapagsasaritaan a karakter ti Biblia. Putaren ti palawag a maisentro iti tema, sa pilien dagiti panulbek a teksto ti Biblia a tumulong kadagiti timmallaong a mangipamaysa iti daydiay karakter ti Biblia ken ti kinataona, agraman kababalin, gunggunay, wenno pagannayasanna a kayattayo wenno ditay kayat a tuladen. Mabalin a saklawen dagiti kasuratan a saan a diretso a mainaig iti daydiay karakter ti Biblia no itampokda iti panangmatmat ni Jehova iti aniaman a naimbag wenno dakes a kababalin wenno no naisinggalutda iti tema ti palawag.
7 No gundawayantay a naan-anay ti panagsanay nga ipaay ti eskuelaan, ad-addanto a kabaelantayo nga ‘ikasaba ti sao’ iti wagas a mangidemostra ti naimbag nga “arte ti panangisuro.”—2 Tim. 4:2.