Isaganayo ti Bukodyo a Presentasion iti Magasin
1 Patgentayo dagiti magasin a Pagwanawanan ken Agriingkayo! gapu kadagiti naintiempuan ken makaisuro nga artikuloda, a mangsaklaw kadagiti nailubongan nga isyu agingga “kadagiti nauneg a bambanag ti Dios.” (1 Cor. 2:10) Adu dagiti malagiptayo a baro ken makapabileg a banag a nabasatayo kadagitoy a pagiwarnak, nga us-usaren ni Jehova a mangipalgak a progresibo iti kinapudno. (Prov. 4:18) Kayattayo nga iwaras a sigagagar dagitoy iti nasaknap aginggat’ mabalin.
2 Tingitingenyo ti Teritoriayo: Ania a kita ti tattao ti agnanaed iti lugaryo? No kanayonda nga agap-apura, mabalin a kasapulan a mangisaganakayo iti presentasion nga ababa ken saan nga agpalpalikaw. No addaankayo iti teritoria a saan unay nga okupado dagiti tattao, mabalin nga ad-adu ti maibagayo. No agtartrabaho iti aldaw ti kaaduan kadagiti bumalay, mabalin a nabalballigi no sumarungkarkayo iti pagtaenganda iti rumabii. Wenno mabalin a masarakanyo dagiti dadduma iti aldaw babaen ti panangasaba iti lansangan wenno panagtrabaho kadagiti tiendaan. Nasayaat ti resulta ti iyaasideg dagiti dadduma nga agibumbunannag kadagiti tattao iti paradaan ken parke.
3 Ammuenyo a Mismo ti Linaon Dagiti Magasin: Basaenyo ti tunggal ruar apaman a maawatyo. Pilienyo dagiti artikulo a pagarupenyo a magustuan dagiti tattao iti teritoriayo. Ania dagiti suheto a pakaseknanda? Mangkitakayo iti espesipiko a punto a mabalinyo nga adawen iti artikulo a planoyo nga itampok. Mangpanunotkayo iti saludsod a mangtukay iti interes. Mangpilikayo iti kasuratan nga ibasayo iti bumalay no adda gundaway. Panunotenyo no kasano a maipasdek ti pundasion iti panagsubliyo.
4 Isaganayo Dagiti Panglukat a Sasaoyo: Siaannad a pilienyo dagiti sao nga usarenyo a mangirugi iti saritaan. Naballigi dagiti dadduma a nangikuna iti kastoy: “Nabasak ti maysa a nagpintas nga artikulo iti daytoy a magasin, ket kayatko met nga iranud kadagiti dadduma.” Adu dagiti mangirugi babaen ti saludsod a mangipamaysa kadagiti punto a mapagsaritaan a planoda nga usaren. Kas pagarigan:
5 No itampokyo ti maysa nga artikulo maipapan iti panagsaknap ti krimen, mabalinyo nga isaludsod:
◼ “Ania ti kasapulan tapno makaturogtayo iti rabii a di mabuteng a matakawan wenno maranggasan?” Ilawlawagyo nga addaankayo iti impormasion maipapan iti solusion daytoy a problema. Iti mabiit, ikkatento met ti solusion ti amin a kita ti riribuk iti kagimongan. Ipakitayo ti paset ti magasin a mangipaay iti kasta a namnama. Iti panagsubliyo, mabalinyo nga iturong ti atension ti bumalay iti kapitulo 1 ti libro a Pannakaammo.
6 No itukonyo ti artikulo maipapan iti biag ti pamilia, mabalinyo a kunaen daytoy:
◼ “Talaga a maysa a karit iti kaaduan a nagannak ti agpamilia kadagitoy nga aldaw. Adu a libro ti naisuraten maipapan iti daytoy a banag, ngem agsisimparat ti ibagbaga uray dagiti eksperto. Adda kadi asinoman a makaipaay iti mapagtalkan a bagnos?” Iranudyo ti espesipiko a komento iti magasin a mangipakita iti nainsiriban a balakad a masarakan iti Biblia. Iti panagsubliyo, pagsaritaanyo dagiti Nainkasuratan a punto maipapan iti panangpadakkel iti annak a nasaklaw iti libro a Pannakaammo, panid 145-8.
7 No itampokyo ti maysa nga artikulo maipapan iti parikut ti kagimongan, mabalinyo a kunaen:
◼ “Adu a tattao ti maburibor gapu iti nariribuk a tiempo a pagbibiagantayo. Iti panagkunayo, rinanta kadi ti Dios a kastoy ti biagtayo?” Iparangyo ti maysa nga artikulo a mangipakita no kasano a masaranget dagiti problema kadagitoy nga aldaw wenno ti artikulo a mangted kadagiti rason a mabalintay ti kumita iti masanguanan nga awanton dagiti pakadanagan. Iti sumaruno nga isasarungkaryo, ilawlawagyo ti ilustrasion ken kapsion iti panid 4-5 iti libro a Pannakaammo, kalpasanna direkta nga iturongyo iti panagadal iti Biblia iti pagtaengan.
8 Makibagaykayo iti Bumalay: Makasarakkayo kadagiti tattao a nagduduma ti paginteresan ken kasasaadda. Mangisaganakayo iti simple a presentasion a mabalinyo nga ibagay iti tunggal bumalay. Nakasaganakayo koma a mangibagay iti sawenyo iti maysa a lalaki, babai, lakay, wenno agtutubo. Awan ti nainget a paglintegan iti masapul a sawenyo. Usarenyo ti aniaman a kannawidanyo ken epektibo. Nupay kasta, narayray ken naimpusuan koma ti panagsaoyo, ken dumngegkayo a naimbag. Madlaw dagidiay “siuumiso a maikari” ti kinapasnekyo ket mangipangagda.—Ara. 13:48.
9 Agtitinnulongkayo: Babaen ti panagririnnanud kadagiti kapanunotan, makaadaltayo kadagiti baro a wagas ti pannakisao. Ti panangensayo a sangsangkamaysa kadagiti presentasiontayo ikkannatayo iti kompiansa. (Prov. 27:17) No ensaywenyo ti sawenyo, ad-adda a natanangkayo no addakayo iti ruangan. Nasken nga iwayaan dagiti nagannak a tulongan dagiti annakda nga agsagana, dumngeg bayat nga ensaywenda ti presentasionda, ken mangted kadagiti singasing a pangparang-ay. Magunggonaan dagiti agdadamo iti pannakikuyogda kadagiti aduan kapadasan nga agibumbunannag.
10 Saan a narigat ti mangisagana iti bukodyo a presentasion iti magasin. Kasapulan laeng a tandaanan ti espesipiko a punto sa iyebkas dayta iti makaay-ayo a wagas. Babaen ti nasakbay a panagpanunot, makaisaganakayo iti nasayaat a presentasion a makaallukoy.
11 Ti panagiwaras kadagiti magasin ti maysa kadagiti kangrunaan a wagastayo a mangisaknap iti mensahe ti Pagarian iti sangalubongan. No makapaimakayo iti Pagwanawanan ken Agriingkayo! kadagiti napasnek a tattao, dagiti magasin ti agsaon a mismo. Kanayon a laglagipenyo ti pategda ken no kasano a makasalbar iti biag dagiti mensaheda. Makaay-ayo unay ken Jehova ti kastoy a ‘panagaramid iti naimbag ken panangiranud kadagiti bambanag iti sabsabali.’—Heb. 13:16.