Usaren Dagiti Magasintayo iti Kasayaatan
1 No mapankay iti newsstand, ania ti makitayo? Magasin. Iti tiendaan iti kanto, ania ti makaawis iti matayo? Magasin. Iti kasta, ania ti basbasaen dagiti adu a tattao? Magasin. Ipakita dagiti surbey a 9 kadagiti 10 a tattao ti makabasa iti agarup maysa a magasin kada bulan. Ti lubong sipapanunot iti magasin.
2 Mapagbalintay kadi a sipapanunot iti Pagwanawanan ken Agriingkayo! dagiti nasingpet ti panagpuspusona a tattao? Wen, no DATAYO a mismo ket sipapanunottayo iti Pagwanawanan ken Agriingkayo! Ania ti makatulong kadatayo? Usigen dagitoy a singasing:
◼ Basaen Dagiti Magasin: Maysa nga agbambaniaga a manangaywan ti nagreport nga, ag-promedio laeng iti 1 tunggal 3 nga agibumbunannag iti sirkitona ti mangbasbasa iti kada ruar Ti Pagwanawanan ken Agriingkayo! iti akkub aginggat’ akkub. Maar-aramidyo kadi dayta? Bayat a basbasaenyo ti tunggal artikulo, saludsodanyo ti bagiyo, ‘Asino ngatat’ pagpaayan daytoy a salaysay—maysa nga ina, maysa a negosiante, maysa nga agtutubo?’ Kalpasanna panunoten no kasano a matukayyo ti interes iti suheto babaen ti maysa wenno dua a sentensia.
◼ Maaddaan iti Masinunuo a Pedido a Magasin: Itedyo ti pedidoyo iti kabsat a mangas-asikaso kadagiti magasin a maipaay iti masinunuo a bilang ti kopia kada ruar. Iti kasta, maaddaankayo ken ti pamiliayo iti regular nga abasto dagiti magasin.
◼ Mangyeskediul iti Regular nga Aldaw ti Panagmagasin: Masuportaranyo kadi ti Aldaw ti Magasin ti kongregasion? No saan, padasenyo a busbosen ti bassit a tiempo iti personal a panagmagasin, mabalin nga iti panangasaba iti lansangan wenno iti ruruangan ken kadagiti ruta ti magasin.
◼ Sipapanunotkayo iti “Pagwanawanan” ken “Agriingkayo!”: Mangitugotkayo kadagiti magasin no agbiahe wenno mapankay aggatang. Itukonyo ida no makisaokayo kadagiti katrabahuan, kaarruba, kaeskuelaan, wenno kadagiti maestro ken maestra. Adda pagassawaan a masansan nga agbibiahe babaen ti eroplano ti mangus-usar iti maysa a punto kadagiti agdama a magasin a pangirugi iti saritaan iti katugawda a pasahero. Tinagiragsakda dagiti adu a nakaay-ayat a kapadasan. Regular a mangitugot ti dadduma nga agtutubo idiay pagadalan kadagiti artikulo a mariknada a makapainteres kadagiti maestro wenno padada nga estudiante. Mangawitkayo kadagiti magasin no mapankayo makitienda, ket itukonyo ida kadagiti komersiante kalpasan a mairingpas ti panaggatangyo. Adu kadatayo ti regular a gumatang iti gasolina; apay a dikay itukon dagiti magasin kadagiti agserserbi iti gasolinaan? Mangtedkayo kadagitoy no adda bumisita a kabagian, no aglugankayo iti transportasion ti publiko, wenno no agur-uraykayo iti nakitulaganyo. Makapanunotkay pay kadi iti sabali a mayanatup nga okasion?
◼ Mangisaganakayo iti Ababa a Panangipresenta iti Magasin: Iplanoyo a bassit ti sawenyo, ngem isaoyo a nalawag. Nabiag koma. Makaabbukay ti puso. Espesipiko koma. Pumilikay ti maysa nga ideya manipud iti artikulo, iyebkasyo iti sumagmamano a balikas, sa itukonyo dagiti magasin. Ti kasayaatan a wagas isut’ panangpataud iti saludsod a makapainteres sa iturong iti maysa nga artikulo a mangted iti Nainkasuratan a sungbat. Usigen dagiti sumagmamano nga ehemplo no kasano a maaramid daytoy:
3 No itamtampokyo ti artikulo maipapan ti ikakaro ti krimen, mabalin nga isaludsodyo:
◼ “Ania ti kasapulan tapno makaturogtayo iti rabii nga awan panagamak iti krimen?” Mabalin a di umananong ti bumalay a sumayaat pay dagiti bambanag. Mabalinyo ti sumungbat nga adu a tattao ti kasta ti riknada sayo ikuna nga addaankay iti impormasion a patienyo a makapainteres kenkuana. Kalpasanna iturongyo iti maitutop a punto iti artikulo.
4 No itukonyo ti maysa nga artikulo maipapan iti biag ti pamilia, mabalinyo a kunaen:
◼ “Adu a tattao ti mangpasingked a pudno a maysa a karit kadagitoy nga al-aldaw ti agsapul ti pagbiag ken mangpatanor iti pamilia. Adda kadi sadinoman a pakagun-odantayo iti mapagtalkan a mangidalan?” Kalpasanna ipakita ti mismo a komento ti magasin a mangidemostra ti sirib a masarakan iti Biblia.
5 Mabalin a kastoy ti iyaasidegyo no dakamatenyo ti maysa nga artikulo maipapan iti problema ti kagimongan:
◼ “Kaaduan a tattao ti madandanagan itatta. Saan nga inranta ti Dios a kastoy ti panagbiagtayo.” Kalpasanna ipakita no kasano a ti material iti artikulo ket makatulong kadatayo a mangsaranget kadagiti problema ti biag ita ken mangipaay iti pudpudno a namnama iti masakbayan.
6 Epektibo ti Panangasaba iti Lansangan: Iti daydi Enero 1940 a ruar ti Informant (Ti Ministeriotayo iti Pagarian) damo a naparegta dagiti agibumbunannag a mangyeskediul iti espesial nga aldaw iti kada lawas a maipaay iti panangasaba iti lansangan a mausar dagiti magasin. Makiramramankayo kadi iti panangasaba iti lansangan sagpaminsan? No ar-aramidenyo, pudno kadi nga epektibo ti pamay-anyo? Napaliiw nga addada nakatakder a sumagmamano nga agibumbunannag iti maysa a kanto ti okupado a kalsada, nga agsasarita bayat nga adu a tattao ti aglabas a dida mapupuotan. Imbes nga agtakderda nga agaabay a nakaiggem kadagiti magasin, ad-adda nga epektibo koma no agsinada ken asitganda dagiti tattao. Mabalin nga agsardeng dagiti ganggannaet ket dumngegda iti apagbiit no asitgan ida ti maysa a tao laeng, ngem manmano ti umasideg iti maysa a grupo a kapadesda ti agsasarita. Tangay datay ti kitkitaen dagiti tattao idiay lansangan, naiduma koma ti langa ken natakneng ti panagkawestayo a maikari kadagiti ministro ti Dios.—1 Tim. 2:9, 10.
7 Dagiti Ruta ti Magasin: Adut’ maipaima dagidiay addaan ti ruta ti magasin uray kanayon a mawanas dagiti teritoria. Dagiti ruta ti magasin ket ekselente a pagtaudan dagiti manamnama nga iyadalan iti Biblia.
8 No regular a sumarungkarkayo a mangitulod kadagiti magasin, masarakanyonto a sumayaat ti pannakigayyemyo iti bumalay. Bayat a sumaysayaat ti panagam-ammoyo, nalaklakayo a pakisaritaan dagiti Nainkasuratan a topiko. Mabalin a mangiturong daytoy iti panagadal ti Biblia. Ken laglagipenyo, mabalinyo nga ireport a panagsarungkar ti kada pannakisaoyo iti bumalay.
9 Maysa a kabsat a babai ti regular a mangitulod kadagiti magasin iti maysa a babai a kanayon a mangawat kadakuada ngem kinunana: “Diak patien dagiti ibagbagayo kaniak.” Iti kaudian nga isasarungkar, nadanon ti sister ti lakay [ti babai] iti balayda. Kalpasan ti nainggayyeman a panagsarita, nayurnos ti pannakairugi ti panagadal iti Biblia. Nagayyem ti kabsat a babai dagiti tallo a babbaroda nga immay nakipagadal. Idi agangay, indedikaren ti ina ken dagiti annakna a lallaki ti biagda ken Jehova ket nabautisaranda. Itan, 35 a miembro ti pamilia ti nangawaten iti kinapudno. Amin dagitoy ket gapu laeng ta sinurnadan ti kabsat a babai ti rutana iti magasin!
10 Adu a wagas ti panangirugi iti ruta ti magasin. Basta idulin laeng ti rekord dagiti naipaima ken iyurnos ti panagsarungkar iti kada dua a lawas nga itugot dagiti kaudian a ruar. Maysa a wagas isu ti panangusar iti pakaammo iti baba ti paulo nga “Iti Sumaganad a Ruarmi.” Iti panagsubliyo, ibagayo iti bumalay nga adda kadakayo ti artikulo a nadakamatyo iti napalabas. Wenno, no sumarungkarkay manen, mabalin a kunaenyo: “Idi binasak daytoy nga artikulo, napanunotko a mabalin a makapainteres kadakayo . . . ” No malpasen ti panagsarungkaryo, inotaryo dagiti lima a simple a punto iti house-to-house recordyo: (1) nagan ti bumalay, (2) direksion, (3) petsa ti panagsarungkar, (4) dagiti ruar a naipaima, ken (5) artikulo a nadakamat. Nakaurnong ti dadduma nga agibumbunannag iti 40 wenno nasursurok pay a katao iti rutada ti magasin!
11 Teritoria a Lugar ti Negosio: Adu a magasin ti maipapaima dagiti agibumbunannag a mangtartrabaho iti teritoria a lugar ti negosio. Pinadasyo kadin ti mangasaba kadagiti tiendaan? Iti damo, agkitakit dagiti dadduma a makisarita kadagiti negosiante, ngem kalpasan a pinadasda iti sumagmamano a daras, nasarakanda nga agpadpada a makapainteres ken makagunggona. Apay a dikay kiddawen iti maysa nga aduan kapadasan nga agibumbunannag wenno payunir a tumulong kadakayo a mangirugi?
12 Nawadwad ti bentaha iti panagtrabaho kadagiti tiendaan. Bassit laeng dagiti saan a madanon, nangruna bayat iti oras ti negosio! Masansan a nadayaw dagiti negosiante, nupay saanda unay nga interesado iti Biblia. Mangrugikay a nasapa; nalabit nasaysayaat ti panangawatda kadakayo. Kalpasan a mayam-ammoyo ti bagiyo, mabalin a kunaenyo a manmano a madanon dagiti negosiante iti pagtaenganda, gapuna a sumarsarungkarkayo kadakuada iti apagbiit laeng iti lugar ti trabahoda tapno itukon dagiti kaudian a ruar Ti Pagwanawanan ken Agriingkayo! Dakamatenyo nga adu a negosiante ti mangipateg iti magasintayo gapu ta kasapulan a maammuanda dagiti kaudian a pasamak ti lubong ngem bassit ti tiempoda nga agbasa. Mabalin a mapatanor ti ruta ti magasin kadagiti interesado a tattao nga adda iti teritoria iti lugar ti negosio.
13 Agsaganakayo kas Maysa a Pamilia: Adda koma tiempo a mailasin bayat iti panagadal ti pamilia tapno pagsaritaan no ania dagiti artikulo kadagiti kaudian a magasin ti maitutop a mausar idiay teritoriayo. Mabalin nga agsusublat dagiti miembro ti pamilia—agraman annak—a manginsayo kadagiti panangiparang ken panangparukma kadagiti gagangay a pangontra a tumaud, a kas iti: “Diak masango dayta,” “Adda bukodmi a relihion,” wenno “Saanak nga interesado.” Daytoy ti mangipalubos iti intero a pamilia a maaddaan iti regular a pannakiraman iti panagiwaras ti magasin.
14 Makatulong Dagiti Konduktor ti Panagadal iti Libro: Agingga ti mabalin, iyeskediul dagiti taripnong sakbay ti panangasaba iti Aldaw ti Magasin iti lugar ti pagadalan iti libro imbes a mapan ti intero a kongregasion idiay Kingdom Hall. Masapul nga agsagana a naimbag dagidiay mangidaulo kadagiti espesipiko a singasing agpaay iti grupo. Masapul nga ababa ti taripnong sakbay ti panangasaba—agraman panangorganisar ti grupo—nga agpaut iti saan a nasursurok ngem 10 aginggat’ 15 a minutos. Masapul a siertuen dagiti konduktor ti panagadal nga adda umdas a teritoria tapno adda trabahuen ti grupo iti intero a periodo ti serbisio iti tay-ak.
15 Ipakita ti Panangipateg Kadagiti Magasin: Ti artikulo a “Panangusar a Naimbag iti Pagwanawanan ken Agriingkayo!” a naipablaak iti Agosto 1993 a ruar Ti Ministeriotayo iti Pagarian inruarna daytoy napateg a punto: “Ti Pagwanawanan ken Agriingkayo! ket saan nga agbaaw ti pategda, nupay saanda a maipaima iti las-ud ti maysa wenno dua a bulan iti petsa ti ruarda. Ti damag a linaonda ket saan a maksayan ti pategna babaen ti panaglabas iti tiempo . . . No ipalubos a maurnong dagiti magasina ken saan nga usaren ida maipakita a kurang ti panangipateg kadagitoy a nabalor nga instrumento. . . . Imbes ngarud nga ipuera dagiti daan a magasina ken lipatenen ida, saan ngata a nasaysayaat no ikagumaan nga ipaima kadagiti interesado a tattao?”
16 Itatta adu a nasingpet panagpuspusona a tattao ti agsapsapul iti kinapudno. Ti impormasion a linaon ti maysa a magasin ket nalabit isut’ kasapulan a mangiturong kadakuada iti kinapudno! Mabalin kadi nga ad-adda a silalagipkayo nga agiwaras ti magasin manipud ita? Iyaplikaryo kadi ti dadduma kadagitoy a singasing iti daytoy umay a ngudo ti lawas? Mabendisionankayto a sibabaknang no aramidenyo dayta.
Dagiti Praktikal a Singasing:
◼ Basaen a nasakbay dagiti magasin, ken kabisaduen dagiti artikulo.
◼ Pilien ti maysa nga artikulo a maikalammiat iti banag a paginteresan ti adu iti komunidadyo.
◼ Mangisagana iti panangiparang a maitutop iti nagduduma a kita dagiti tao, kas dagiti lallaki, babbai, wenno agtutubo. Ipakita no kasano a mainaig ti magasin iti bumalay ken no kasano a pagragsakan ti intero a pamilia dayta.
◼ Iplano ti pannakiramanyo iti aktibidad iti tay-ak ti serbisio bayat nga adda iti taengda ti kaaduan a tattao. Iyur-urnos ti dadduma a kongregasion ti iruruar nga agmagasin iti sardam.
◼ Paababaen ti presentasionyo ken diretso iti punto.
◼ Dikay partakan ti agsao. No ti dumdumngeg kadakayo ket saan nga interesado, ti napartak a panagsao saan a makatulong. Padasenyo nga an-anaten, ket ikkanyo ti bumalay iti gundaway a sumungbat.
◼ Panangitukon Kadagiti Magasin iti Balaybalay:
◼ Maaddaan iti nainggayyeman nga isem ken naanus a tono ti timek.
◼ Narayraykayo koma maipapan kadagiti magasin.
◼ Agsaokayo a nabannayat ken nabatad.
◼ Maysa laeng a tema ti saklawenyo; tukayen bassit ti interes, ken ipakita ti pategna iti bumalay.
◼ Mangitampok iti maysa laeng nga artikulo.
◼ Maysa laeng a magasin ti iparang, nga itukon ti sabali a kas kaduana.
◼ Ipaiggem dagiti magasin iti bumalay.
◼ Ipakaammo iti bumalay a planoyo ti agsubli.
◼ Mangaramid iti nainggayyeman, positibo a konklusion no saanda nga awaten ti magasin.
◼ Inotar iti house-to-house record ti amin nga interes ken naipaima.
◼ Dagiti Oportunidad a Mangipaima Kadagiti Magasin:
◼ Panangasaba iti balaybalay
◼ Panangasaba iti lansangan
◼ Panangasaba kadagiti tiendaan
◼ Kadagiti panagsarungkar iti ruta ti magasin
◼ Panangasaba iti sardam
◼ No agsarungkarkayo
◼ No sarungkaran dagiti dati nga estudiante ti Biblia
◼ No agbiahe, ken aggatangkayo
◼ No makisaokayo kadagiti kabagian, katrabahuan, kaarruba, kaeskuelaan, maestro ken maestra
◼ Iti pagluganan ti publiko, kadagiti pagurayan ti lugan