Panangusar iti Libro a Pannakaammo a Mangiturong iti Biag nga Agnanayon
1 Naragsakantayo idi nairuar ti baro a libro a Pannakaammo a Mangiturong iti Biag nga Agnanayon! Nadisenio daytoy a tumulong kadagiti tattao nga al-alisto a dumteng iti umiso a pannakaammo iti kinapudno. Iti Marso, damo nga oportunidadtay nga itukon daytoy a libro iti teritoriatayo. Ania ti mabalin a sawentayo a mangtukay ti interes?
2 Mabalinyo nga usaren ti panangiparang a mangdakamat iti Biblia a kas praktikal a gubuayan ti giya, babaen ti panagkuna:
◼ “Makisasaokami kadagiti kaarrubatayo no sadino ti pakasarakan iti praktikal a gubuayan ti giya tapno madaeran dagiti problema ti biag. Pagarupenyo kadi a praktikal a giya ti Biblia ita? [Palubosan a sumungbat, sa basaen ti 2 Timoteo 3:16, 17.] Agaplikar dagiti prinsipio ti Biblia ita a kas met idi impaltiing ti Dios ti pannakaisuratda.” Luktan iti panid 16 iti libro a Pannakaammo, sa ababa a komentuan ti praktikal a giya a masarakan iti Sermon ni Jesus idiay Bantay. Basaen ti nakotar a masarakan iti parapo 11 wenno ti masarakan idiay parapo 13, sa itukon ti libro ken iyurnos ti isusubli tapno sungbatan ti saludsod a, Kasanotayo a magunggonaan a personal manipud iti pannakaammo a linaon ti Biblia?
3 No makasabetkayo ti naganak, mabalinyo nga iturong iti pamilia:
◼ “Umanamong ti kaaduan a nagannak nga adu a problema ti mapasaran iti panangikagumaan a salimetmetan a naragsak ti biag ti pamilia. Ania dagiti mapaliiwyo a serioso a lapped? [Palubosan a sumungbat.] Ited ti Biblia ti ekselente a balakad a tumulong kadatayo. [Basaen ti paset ti Colosas 3:12, 18-21.] Naited ti nasayaat a balakad iti kapitulo 15 daytoy a libro, a napauluan ‘Panangbangon iti Pamilia a Pakaidayawan ti Dios.’ Ipakitana no kasano a mapalag-an ti parikut ti agassawa ken madaeran dagiti problema a maipasango kadagiti annak. Masiguradok a maay-ayokayo a mangbasa iti daytoy.”
4 Kayatyo kadi nga ipadas ti direkta nga iyaasideg a mangirugi iti panagadal? Adtoy ti maysa a mabalin nga agkurri para kadakayo:
◼ “Ituktukonmi ti libre a kurso ti panagadal ti Biblia iti pagtaengan. Nakapagadalkay kadin iti Biblia iti napalabas?” [Palubosan a sumungbat.] Palubosandak a mangipakita kadakayo iti katulongan ti panagadal nga us-usarenmi.” Ipakita ti libro a Pannakaammo, ilukat ti panid 3 tapno makita ti bumalay dagiti benneg ti linaonna, sa isaludsod, “Pinanunotyo kadin no ania ti kunaen ti Biblia maipapan kadagitoy a suheto?” Iturong iti kapitulo a mabalin a paginteresan ti bumalay, sa basaen dagiti subtema. Ilawlawag a kayatyo nga idemostra iti ababa no kasano a mausig daytoy nga impormasion iti panagadaltayo. Maipasdek man ti panagadal wenno saan, itukon ti libro iti tao.
5 Umariwekwek a tattao ita ti mangipangpangag iti umiso a pannakaammo iti pudno a Dios. (Isa. 2:2-4) Pribilehiotayo a tulongan dagiti ad-adu pay agingga ti mabalin a mangadal maipapan ken Jehova ket maiturongda iti biag.—1 Tim. 2:4.