“Daytoy Kaipapananna ti Agnanayon a Biag”
1 Kuna dagiti sasao ni Jesus iti Juan 17:3 a ti pananggun-od iti pannakaammo maipapan iti Dios ken ni Kristo kaipapananna ti biag nga agnanayon! Ngem magun-odtay kadi ti biag nga awan inggana babaen laeng ti panangikut iti pannakaammo maipapan ken Jehova ken ni Jesus? Saan. Ammo idi dagiti Israelita a ni Jehova ti Diosda, ngem saan a naanninaw dayta a pammati iti panagbiagda. Nagangayanna, napukawda ti paborna. (Os. 4:1, 2, 6) Minilion a tattao kadagitoy nga aldaw ti “adda regtada iti Dios; ngem saan a maitunos iti umiso a pannakaammo.” (Roma 10:2) Masapul nga ammuenda ni Jehova, “ti maymaysa a pudno a Dios,” ken agserbida kenkuana iti umiso a wagas. Iti dayta a panggep, bayat ti Nobiembre itukontayo ti libro a Pannakaammo a Mangiturong iti Biag nga Agnanayon. Adtoy ti sumagmamano a singasing a makatulong kadakayo.
2 Yantangay karkarna iti kaaduan a tattao ti kapanunotan a panagbiag nga agnanayon ditoy daga, mabalin a mangtukay iti interesda daytoy nga introduksion:
◼ “Isalsaludsodmi kadagiti kaarrubami ti maysa a saludsod. No maawiskayo nga agbiag nga agnanayon iti maysa a lubong a kas iti daytoy, awatenyo kadi ti awis? [Ipakita ti ladawan iti panid 4-5 iti libro a Pannakaammo. Palubosan a sumungbat.] Ngem ania ti pagarupyo a masapul nga aramidenyo tapno masagrapyo ti kasta a namnama? [Palubosan a sumungbat.] Siputanyo no ania ti kasapulan sigun iti Juan 17:3. [Basaenyo.] Daytoy a libro ti tumultulong kadagiti adu a gumun-od iti daytoy a kita ti pannakaammo. Kayatyo kadi ti maaddaan iti personal a kopia a basaenyo? [Palubosan a sumungbat.] Iti sumaruno nga isasarungkarko, pagsaritaantayto no apay a nainkalintegan a patien a magun-odtayo ti biag nga agnanayon ditoy daga a mismo.”
3 No sarungkaranyo dagidiay nakasaritayo maipapan iti Juan 17:3, mabalinyo nga ituloy iti kastoy a wagas:
◼ “Iti napalabas nga isasarungkarko, napagsaritaantayo ti Juan 17:3, nga agkuna a ti pananggun-od iti pannakaammo maipapan iti Dios ken ni Kristo kaipapananna ti biag nga agnanayon. Ngem adu a tattao ti mamati a ti nasaysayaat a biag ket maragpat laeng idiay langit. Ania ti makunayo? [Palubosan a sumungbat.] No adda kadakayo daydiay libro a naibatik kadakayo, kayatko nga ipakita ti sumagmamano a bersikulo iti Biblia a mangpaneknek a maisublinto ditoy daga ti Paraiso. [Pagsaritaan ti parapo 11-16 iti panid 9-10 iti libro a Pannakaammo.] Iti sumaruno nga isasarungkarko, kayatko nga ipakita kadakayo no apay a makapagtalekkayo kadagitoy a kari iti Biblia. Kabayatanna, nalabit a mabalinyo a basaen ti kapitulo 2 iti kopiayo a libro.”
4 Adtoy ti presentasion a mabalin a kayatyo nga usaren kadagiti relihioso a tattao:
◼ “Makisarsaritakami kadagiti kaarrubatayo maipapan iti no apay a nagadu ti nagduduma a relihion ditoy lubong. Adda nasurok a 10,000 a relihioso a denominasion iti sangalubongan. Ngem, adda laeng maymaysa a Biblia. Ania ti makunayo iti daytoy a panagduduma dagiti relihion? [Palubosan a sumungbat. Luktan ti libro a Pannakaammo iti kapitulo 5, ken basaen ti parapo 1.] Masarakanyo dagiti makapnek a sungbat dagitoy a saludsod babaen ti panangbasayo iti daytoy a kapitulo. Maragsakanak a mangibati kadakayo iti daytoy a libro babaen ti bassit a kontribusion.” No maawat, iyurnos ti panagsubliyo, ken kunaenyo: “Inton agsubliak, mabalintayto a pagsaritaan no amin a relihion ket nagduduma laeng a dalan nga agturong iti maymaysa a disso.”
5 No agsarungkarkayo tapno ituloyyo a pagsaritaan no apay a nagadu ti relihion, mabalinyo a kunaen daytoy:
◼ “Iti napalabas a panagsaritatayo, insaludsodko no amin a relihion ket nagduduma laeng a dalan nga agturong iti maymaysa a disso. Ania ti makunayo? [Palubosan a sumungbat.] Kayatko nga ipakita iti libro a naibatik kadakayo no ania ti kinuna ni Jesus maipapan iti dayta a banag. [Iturong iti kapitulo 5 ti libro a Pannakaammo, ken basaen ti parapo 6-7, agraman Mateo 7:21-23.] Nalabit a maisaludsodyo no apay a napateg nga ammuen no ania a talaga ti pagayatan ti Dios. Pangngaasiyo ta basaenyo ti natda iti daytoy a kapitulo. Iti sumaruno nga iyaayko, maragsakanakto a mangipakita kadakayo iti pateg ti pananggun-od iti umiso a pannakaammo iti Biblia.”
6 Masansan nga epektibo ti direkta a wagas ti panangirugi iti panagadal iti Biblia. Adtoy ti maysa a maisingasing nga introduksion nga agparang iti panid 12 ti libro a “Panakirinnason”:
◼ “Simmarungkarak ta kayatko ti mangitukon kadakayo iti libre a kurso iti Biblia ditoy balayyo. No palubosandak, kayatko koma nga ipakita kadakayo iti sumagmamano la a minuto no kasano a pagsasaritaan dagiti tattao ti Biblia kadagiti balbalay kas grupo dagiti pamilia kadagiti nasurok a 200 a dagdaga. Mabalintay nga usaren ti aniaman kadagitoy a topiko kas pangibasaran iti pagsasaritaantayo. [Ipakita ti benneg dagiti linaon ti libro a Pannakaammo.] Ania a topiko ti makapainteres kadakayo?” Iturongyo iti kapitulo a napili, ket irugiyo ti panagadal iti umuna a parapo.
7 Adtoy ti sabali pay a naballigi a direkta a wagas a mabalinyo nga ipadas a pangirugi iti panagadal:
◼ “Mangyad-adalak iti Biblia nga awan bayadna ket adda pay lugar iti eskediulko dagiti kanayonan nga estudiante. Daytoy a katulongan iti panagadal iti Biblia ti usarentayo. [Ipakita ti libro a Pannakaammo.] Agpaut ti kurso iti sumagmamano laeng a bulan ken sungbatanna dagiti saludsod a kas kadagitoy: Apay nga ipalubos ti Dios ti panagsagaba? Apay a lumakay ken mataytayo? Ania ti mapasamak kadagiti dungdungnguen a minataytayo? Ken kasanokayo a makaadani iti Dios? Mabalin kadi nga idemostrak kadakayo ti panagadal?” No mapagkedkedan ti tukon a panagadal, saludsodenyo iti tao no kayatna a basaen ti libro a Pannakaammo a bukodna. No kayatna, itukonyo kenkuana.
8 Anian a gameng ti umiso a pannakaammo maipapan iti Dios ken ni Kristo iti tunggal maysa a mangikut iti dayta! Usarentayo ti tunggal gundaway bayat ti Nobiembre a mangiranud kadagiti sabsabali iti pannakaammo a mangiturong iti biag nga agnanayon.