Ipakita ti Panagraem iti Lugar a Pagdaydayawan ken Jehova
1 No sangsangailitayo iti balay ti asinoman, ipakitatay ti panagraem iti sanikua dayta a tao, a ditay agaramid iti aniaman a mangdadael iti dayta, ken ditay riribuken ti naurnos a rutina ti sangakabbalayan. Anian nga ad-adda pay koma a kasta no ni Jehova ti makinsangaili kadatayo! Rumbeng nga ammuentayo no kasano ti panagtignaytayo iti sangakabbalayanna. (Sal. 15:1; 1 Tim. 3:15) Maangay man ti Nakristianuan a gimongtayo idiay Kingdom Hall, iti pribado a pagtaengan, wenno iti pasilidad a para iti publiko, kaaduan kadatayo ti kanayon a mangipakpakita iti panagraem iti lugar a pagdaydayawantayo nga ibilbilangtayo dayta a kasla balay ni Jehova, a ti “dayagna naringringbaw ngem ti daga ken dagiti langlangit.”—Sal. 148:13.
2 Nupay kasta, napaliiw dagiti agdaldaliasat a manangaywan ken ti sabsabali pay nga adda dadduma a kakabsat a kurang ti panagraemda kadagiti gimong babaen ti kinaringgorda wenno kasla ketdin saan a napateg ti maipapaay nga impormasion. Adda sumagmamano a nataengan nga agtutungtong kadagiti awan mamaayna iti pagserkan, pagsangailian, kasilias, wenno iti ruar ti Kingdom Hall kabayatan ti gimong. No ti in-inauna nga anak ti mangaywan iti adingna, no dadduma agay-ayamen dagiti dua ket saanda unay a magunggonaan iti programa. Mapaliiw nga adda dadduma nga agtutubo iti ruar ti Kingdom Hall kalpasan dagiti gimong, nga agaayam, nakaar-ariwawa, nga agkikinnarateda pay. Iti dadduma a kasasaad maisturboda dagiti kaarruba wenno makasingada iti trapiko iti paradaan wenno iti kalsada.
3 No Kasano a Maliklikan ti Di Kinamanagraem: Yantangay apresiarentay ti dignidad ken kinasagrado ti panagdayawtayo, sigurado a ditay kayat a singaen dagiti sabsabali babaen ti panagiinnarasaas, pannangan, panagngalngal iti gum, panangpakarasakas iti papel, di nasken a panagkaraapan iti kasilias, wenno nakayugalian a kinaladaw kadagiti gimong. Dagiti nagannak a managraem ken addaan apresasion dida ipalubos a rugitan dagiti annakda ti alpumbra, kudson, wenno dagiti diding ti Kingdom Hall wenno ti pagtaengan a pakaangayan ti panagadal iti libro. Ket awan duadua nga umanamongtay amin a talaga a saan a rumbeng ti aniaman a kita ti nakababain nga ugali, minamaag a panagsasao, wenno naalas a panagang-angaw kadagiti gimongtayo.—Efe. 5:4.
4 No kanayon a laglagipentay ti panggep dagiti Nakristianuan a gimongtayo, siguraduentay a maipakitatayo ken dagiti annaktayo ti umiso a panagraem iti panagdayaw ken Jehova iti lugar a ‘pinilitayo a pagtakderan.’—Sal. 84:10, NW.