Agtignaykayo iti Pamay-an a Maikari iti Naimbag a Damag
1 Kas Saksi ni Jehova, tarigagayantay nga idayaw ti nagan ni Jehova. Ammotayo a ti kondukta, panagsao, panaglanglanga, ken panagkawestayo ket maimpluensiaanna ti panangmatmat ti dadduma iti pudno a panagdayaw. Nangruna a pudno daytoy kadagiti gimongtayo. Kayattayo a siguraduen nga amin a banag a maisao ken maaramid kadagiti gimong ket maikari iti naimbag a damag ken mangidayaw ken Jehova.—Fil. 2:4.
2 Saan a masnup ti pagrukodan ti lubong a maipaay iti kawes ken panagaruat iti adu a lugar. Daytoy ti banag a masapul a siaannad a siputan dagiti ministro ti naimbag a damag. Ti Hunio 1, 1989, a Pagwanawanan, kinunana iti panid 20: “Ti kawestayo saan a masapul a nangina, ngem masapul a nadalus, nasayaat ti langana, ken naemma. Ti sapatostayo masapul met a nasayaat ti itsurana ken langana. Kasta met, kadagiti amin a gimgimong, agraman ti Panagadal ti Libro ti Kongregasion, masapul met a nadalus ti bagitayo, ket masapul a nadalus ken maitutop ti kawestayo.”
3 Ti kinamanagsapsapa ket pakakitaan ti naayat a konsiderasion ken kinamanagpanunot. Sagpaminsan, lapdannatayo dagiti di maliklikan a kasasaad a sumangpet iti umiso nga oras iti gimong. Ngem ti pannakairuam a naladaw a sumangpet ipasimudaagna iti kaawan panagraem iti sagrado a nakairantaan dagiti gimong. Kasta met, masansan a singaen dagiti managladladaw ti dadduma ken lapdanna ida a magunggonaan a naan-anay iti programa. Ti kinamanagsapsapa ipakitana ti panagraem iti rikna ken interes dagiti amin a tumabuno.
4 Ti ayat kadagiti kaarruba tulongannatay koma a mangliklik iti pakasingaan bayat dagiti gimong. Ti panagarasaas, pannangan, panagngalngal iti gum, panagkarasakas dagiti papel, panagkaraapan iti kasilias, isturbuenda dagiti sabsabali ken kissayanna ti dignidad a maikari iti lugar a pagdayawan ken Jehova. Saan a maiparbeng iti asinoman ti mangaramid iti bambanag ti kongregasion wenno panagsasarita malaksid no adda nesesita a masapul a panawan dagiti kakabsat ti tugawda. Malaksid kadagita, nakatugaw ken agim-imdeng koma ti amin iti programa tapno magunggonaanda ken ti pamiliada. Dagiti di umiso a kababalin ket saan a maikari iti Kingdom Hall agsipud ta “ti ayat . . . saan a naalas ti panagtigtignayna.”—1 Cor. 13:4, 5; Gal. 6:10.
5 Ti nasayaat a kababalin dagiti ubbingtayo kadagiti gimong idayawna met ti nagan ni Jehova. Nasken ti nainget a panangaywan dagiti nagannak. Maparegta koma dagiti annak a dumngeg ken makipaset. Pilien ti adu a nagannak nga addaan ubbing ti agtugaw iti lugar a nalakada ti rummuar ken mangasikaso iti kasapulan dagiti ubbingda a dida masinga dagiti sabsabali.
6 Imbalakad ni Pablo: “Agtignaykayo iti pamay-an a maikari iti naimbag a damag.” (Fil. 1:27) Ngarud, ikagumaantayo ti agbalin a manakem ken nakonsiderasion iti sabsabali no tumabunotayo kadagiti gimong.