“Ni Jehova ti Katulongak”
1 Idi binilin ni Jesus dagiti immuna nga adalanna, kinunana kadakuada: “Adtoy! Ibaonkayo a kas karnero iti nagtetengngaan dagiti lobo.” (Mat. 10:16) Napabutnganda kadi ken nagkitakitda gapu iti dayta? Saan. Ti kababalinda ket kas iti inyebkas ni apostol Pablo idi a kinunana kadagiti padana a Kristiano: “Agtalged ket sawentayo: ‘Ni Jehova ti katulongak; diakto agbuteng. Ania ti maaramidan ti tao kaniak?’” (Heb. 13:6) Nagrag-oanda ti pannakaikarida a maibabain maigapu iti nagan ni Jesus, ket nagtultuloyda nga awan sardayna a nangisursuro ken nangipakpakaammo iti naimbag a damag.—Ara. 5:41, 42.
2 Ita dandanin agpatingga ti sangalubongan a trabaho a panangasaba. Kas iti impadto ni Jesus, gurguraendatayo dagiti amin a nasion. (Mat. 24:9) Busbusoren ken lalaisenda ti trabahotayo a panangasaba, ket iti dadduma a paset ti daga, imparitda pay dayta. No kurang ti pammatitayo, mabalin a mapabutngantayo. Nupay kasta, mabang-arantayo a makaammo a ni Jehova ti Katulongantayo ket dayta ti mangpabileg kadatayo nga agtultuloy.
3 Ti kinatured kaipapananna nabileg, awanan panagamak, maingel. Kasungani dayta ti buteng, kinamanagbabain, kinatakrot. Kanayon a kasapulan dagiti adalan ni Jesus ti tured tapno makapagibturda. Napateg dayta tapno saantay a maupay gapu kadagiti kababalin ken tigtignay ti lubong a bumusbusor iti Dios. Anian a makaparegta no panunotentayo ti nagsayaat nga ulidan ni Jesus, ti nangparmek iti lubong! (Juan 16:33) Laglagipenyo met dagiti apostol a, nupay naipasangoda kadagiti nakaro a pakasuotan, situtured a kinunada: “Masapul nga agtulnogkami iti Dios kas agturay imbes a kadagiti tattao.”—Ara. 5:29.
4 Saantayo a Dagitay Agsanud: Ikagumaantayo koma a taginayonen ti positibo a panangmatmat iti trabahotayo. (Heb. 10:39) Kanayon a laglagipentayo nga imbaonnatay ni Jehova kas ebkas ti ayat ken asina kadagiti amin a tattao. Saanna a pulos nga ipaaramid kadagiti adipenna ti aniaman a di napateg. Amin a maipaaramid kadatayo ket pagimbaganto iti kamaudiananna dagidiay agayat iti Dios.—Roma 8:28.
5 Ti positibo a panangmatmat tulongannatayo nga agtultuloy a mangbirok kadagiti arig karnero a tattao iti teritoriatayo. Mabalin a matmatantayo ti kinaaleng-aleng dagiti tattao kas ebkas ti pannakapaay ken kinaawan namnamada. Sapay koma ta tignayennatay ti ayattayo nga agbalin a mannakaawat ken naanus. Tunggal makaipaimatayo iti literatura wenno no adda makitatayo a medio aginteres, ti kalattayo ket sarungkarantayo koma a madagdagus ken parayrayentayo ti interes. Ditay koma pulos pagduaduaan ti abilidadtayo a mangirugi iti panagadal iti Biblia wenno epektibo a mangidaulo iti dayta. Imbes ketdi, kanayon koma nga ikararagtayo ti tulong ken panangiwanwan ni Jehova, nga agtalektay a tulongannatayo.
6 Natibker ti pammatitayo a siguraduen ni Jehova ti pannakairingpas dayta a trabaho. (Idiligyo ti Filipos 1:6.) Ti naan-anay a panagtalektayo kenkuana kas Katulongantayo isu ti mangpabileg kadatayo tapno “ditay koma sumuko iti panagaramid ti nasayaat.”—Gal. 6:9.