‘Bumileg ken Pumigsaka!’

“Bumilegkayo! Pinarmekko ti lubong.”​—JUAN 16:33.

1. Gapu kadagiti nabileg a kabusor nga agur-uray kadagiti Israelita idiay Canaan, ania ti naiparegta kadakuada?

IDI bumallasiw dagiti Israelita iti Karayan Jordan agturong iti Naikari a Daga, kinuna ni Moises kadakuada: “Bumilegkayo ken pumigsakayo. Dika agbuteng wenno mapakigtotan iti sangoda, ta ni Jehova a Diosmo ti makipagmarmartsa kenka.” Kalpasanna, dinutokan ni Moises ni Josue tapno iturongna dagiti Israelita iti Canaan, ket personal nga inulitna a binalakadan a bumileg. (Deuteronomio 31:6, 7) Idi agangay, ni Jehova a mismo pinaregtana ni Josue, a kunkunana: “Bumilegka ken pumigsaka . . . Isuna laeng ta bumilegka ken pumigsaka.” (Josue 1:6, 7, 9) Naintiempuan dagita a sasao. Kasapulan dagiti Israelita ti bileg a sumaranget kadagiti nabileg a kabusor nga agur-uray kadakuada iti ballasiw ti Jordan.

2. Ania a kasasaad ti nakaipasanguantayo ita, ken ania ti kasapulantayo?

² Iti kaaldawantayo, asidegen a bumallasiw dagiti pudno a Kristiano iti naikari a baro a lubong ket, kas ken Josue, masapul a bumilegtayo. (2 Pedro 3:13; Apocalipsis 7:14) Kaskasdi, naiduma ti kasasaadtayo iti kasasaad ni Josue idi. Nakibakal ni Josue babaen dagiti kampilan ken pika. Naespirituan ti pannakibakaltayo ken ditay pulos agusar iti literal nga igam. (Isaias 2:2-4; Efeso 6:11-17) Maysa pay, naipasango ni Josue iti adu a naranggas a panaggugubat uray kalpasan a simrekda iti Naikari a Daga. Ngem mapasarantayo ti karanggasan a pannakidangadangtayo ita​—sakbay a sumrektayo iti baro a lubong. Usigentayo ti dadduma a kasasaad nga agkalikagum iti bileg.

Apay a Nasken a Makidangadangtayo?

3. Ania ti ipalgak kadatayo ti Biblia maipapan iti kangrunaan a kabusortayo?

³ Insurat ni apostol Juan: “Ammotayo a nagtaudtayo iti Dios, ngem ti intero a lubong adda iti pannakabalin daydiay nadangkes.” (1 Juan 5:19) Ipakita dagita a sasao ti maysa a napateg a rason no apay a makidangadang dagiti Kristiano tapno masalimetmetanda ti pammatida. No taginayonen ti maysa a Kristiano ti kinatarnawna, maibilang a pannakaabak dayta ni Satanas a Diablo. Gapuna, kasla “leon a ngumerngernger” ni Satanas a mangikagkagumaan a mangbutbuteng ken mangalun-on kadagiti matalek a Kristiano. (1 Pedro 5:8) Kinapudnona, makigubat kadagiti napulotan a Kristiano ken kadagiti kakaduada. (Apocalipsis 12:17) Iti daytoy a gubat, us-usarenna dagiti tattao a mangibanag kadagiti gakatna, ammoda man wenno saan. Masapul ti bileg tapno sititibker a makapagtakder maibusor ken ni Satanas ken iti amin nga ahentena.

4. Ania ti impakdaar ni Jesus, ngem ania a galad ti imparangarang dagiti pudno a Kristiano?

⁴ Gapu ta ammo ni Jesus a nakaro a busoren da Satanas ken dagiti ahentena ti naimbag a damag, pinakdaaranna dagiti pasurotna: “Dagiti tattao iyawatdakayto iti rigat ken papatayendakayto, ket puntiriakayto ti pananggura ti amin a nasnasion maigapu iti naganko.” (Mateo 24:9) Natungpal dagita a sasao idi umuna a siglo ken uray met ita. Kinapudnona, awan nakaidumaanna kadagiti naglabas a panawen ti nakaro a pannakaidadanes a napasaran ti dadduma a moderno-aldaw a Saksi ni Jehova. Kaskasdi, nabileg dagiti pudno a Kristiano iti laksid dagita a suot. Ammoda a “ti panagpigerger iti tattao isu ti mangipakat iti silo,” ket dida kayat a matnag iti dayta a silo.​—Proverbio 29:25.

5, 6. (a) Iti sidong dagiti ania a kasasaad a masapul a bumilegtayo? (b) Ania ti aramiden dagiti matalek a Kristiano no masubok ti bilegda?

⁵ Masapul a bumilegtayo gapu iti dadduma pay a karit malaksid iti pannakaidadanes. Para iti dadduma, maysa a karit ti panangisarita iti naimbag a damag kadagiti di am-ammo a tattao. Masubok ti bileg ti dadduma nga ages-eskuela no makiddaw nga isapatada ti kinasungdoda iti pagilian wenno iti bandera. Gapu ta maysa a narelihiosuan nga ebkas ti kasta a panagsapata, determinado dagiti Kristiano nga annak nga agtignay iti wagas a makaay-ayo iti Dios, ken makaparagsak ti nasayaat a reputasionda.

⁶ Masapul met a bumilegtayo no dagiti bumusbusor imaniobrada ti media tapno agiwaras kadagiti dakes a damag maipapan kadagiti adipen ti Dios wenno no ikagumaanda a lapdan ti pudno a panagdayaw babaen ti panangaramidda iti “riribuk babaen iti bilin.” (Salmo 94:20) Kas pagarigan, ania koma ti panagriknatayo no dagiti padamag iti diario, radio, wenno telebision maipapan kadagiti Saksi ni Jehova ket naballikug wenno agdadata a kinaulbod? Maklaattayo kadi? Saan. Namnamaentayo dagita a bambanag. (Salmo 109:2) Ken ditay pagsiddaawan no mamati ti dadduma kadagiti ulbod ken naballikug a pablaak, yantangay “ti asinoman nga awanan kapadasan maaddaan pammati iti tunggal sao.” (Proverbio 14:15) Ngem dagiti nasungdo a Kristiano dida patien a dagus ti aniaman a sayangguseng maipapan kadagiti kakabsatda, ken sigurado a dida ipalubos a dagiti dakes a damag ti makagapu a dida tumabuno kadagiti Nakristianuan a gimong, manmano a mangasaba, wenno kumapuy ti pammatida. Iti sabali a bangir, ‘irekomendada ti bagbagida kas ministro ti Dios . . . babaen ti dayag ken pannakaibabain, babaen ti dakes a damag ken nasayaat a damag; kas dagiti manangallilaw [no iti panangmatmat dagiti bumusbusor] ket kaskasdi a napudno [no an-anagen].’​—2 Corinto 6:4, 8.

7. Aniada a mamagpanunot a saludsod ti imtuodentayo iti bagitayo?

⁷ Iti suratna ken ni Timoteo, kinuna ni Pablo: “Ti Dios inikkannatayo saan a ti espiritu ti kinatakrot, no di ket ti pannakabalin . . . Gapuna dika ibain ti pangsaksi maipapan iti Apotayo.” (2 Timoteo 1:7, 8; Marcos 8:38) Kalpasan a mabasatayo dagita a sasao, imtuodentayo iti bagitayo: ‘Ibainko kadi ti pammatik, wenno naturedak? Iti pagtrabahuak (wenno eskuelaak), iyam-ammok kadi ti bagik kas maysa a Saksi ni Jehova, wenno ilimlimedko? Mabainak kadi nga agbalin a naiduma kadagiti sabsabali, wenno naragsakak nga agbalin a naiduma gapu iti relasionko ken ni Jehova?’ No adda asinoman nga alusiisen a mangikasaba iti naimbag a damag wenno agbalin a naiduma, laglagipenna koma ti balakad ni Jehova ken ni Josue: “Bumilegka ken pumigsaka.” Ditay pulos liplipatan a ti napateg isu ti panangmatmat ni Jehova ken ni Jesu-Kristo, saan a ti opinion dagiti katrabahuan wenno dagiti kaeskuelaantayo.​—Galacia 1:10.

No Kasano a Bumileg

8, 9. (a) Iti maysa nga okasion, kasano a nasubok ti kinabileg dagiti nagkauna a Kristiano? (b) Ania ti inaramid da Pedro ken Juan iti laksid dagiti pangta, ket ania ti napasaranda ken dagiti kakabsatda?

⁸ Kasanotayo a sukayen ti bileg a tumulong kadatayo a mangtaginayon iti kinasungdotayo bayat dagitoy napeggad a tiempo? Bueno, kasano a bimmileg dagiti nagkauna a Kristiano? Usigenyo no ania ti napasamak idi a dagiti panguluen a papadi ken lallakay idiay Jerusalem binilinda da Pedro ken Juan nga isardengda ti mangasaba iti nagan ni Jesus. Saan a timmulok dagiti adalan, ket napangtaan sa nawayawayaanda. Kalpasanna, nakikaduada manen kadagiti kakabsat, ket nagkararagda a sangsangkamaysa, a kunkunada: “Jehova, asikasuem dagiti pamutbutengda, ket ipaaymo kadagiti adipenmo nga itultuloyda a sawen ti saom buyogen ti isuamin a kinatured.” (Aramid 4:13-29) Kas sungbat, pinabileg ida ni Jehova babaen ti nasantuan nga espiritu, ket kas pinaneknekan dagiti Judio a panguluen idi agangay, ‘pinunnoda ti Jerusalem’ kadagiti sursuroda.​—Aramid 5:28.

⁹ Usigentayo ti napasamak iti dayta nga okasion. Idi a dagiti adalan ket pinangtaan dagiti Judio a panguluen, dida man la pinanunot ti agsardeng. Imbes ketdi, inkararag dagiti adalan ti bileg tapno makapagtultuloyda a mangasaba. Kalpasanna, nagtignayda maitunos iti kararagda, ket pinabileg ida ni Jehova babaen ti espirituna. Ipakita ti kapadasanda a ti insurat ni Pablo maipapan iti sabali a pasamak sumagmamano a tawen kalpasanna ket agaplikar kadagiti Kristiano no maidadanesda. Kinuna ni Pablo: “Iti amin a bambanag addaanak iti bileg gapu iti daydiay mangmangted kaniak iti pannakabalin.”​—Filipos 4:13.

10. Kasano a makatulong kadagidiay managbabain ti kapadasan ni Jeremias?

¹⁰ Ngem kasano no managbabain ti maysa a tao? Makapagserbi latta kadi ken ni Jehova a situtured iti laksid ti ibubusor? Wen! Lagipenyo ti inaramid ni Jeremias idi dinutokan ni Jehova kas propeta. Kinuna ti agtutubo: “Maysaak laeng nga ubing.” Nalawag a nariknana a dina kabaelan dayta. Kaskasdi, pinaregta ni Jehova babaen kadagitoy a sasao: “Dika sawen, ‘Maysaak laeng nga ubing.’ No di ket kadagidiay amin a pangibaonakto kenka, rebbeng a mapanka; ket ti isuamin nga ibilinkonto kenka, rebbeng a sawem. Dika agbuteng gapu kadagiti langada, ta ‘addaak kenka tapno ispalenka.’” (Jeremias 1:6-10) Nagtalek ni Jeremias ken ni Jehova. Kas resultana, nadaeranna ti panagduaduana babaen ti bileg ni Jehova ket nagbalin a nakaturtured a saksi iti Israel.

11. Ania ti makatulong kadagiti Kristiano ita nga agbalin a kas ken Jeremias?

¹¹ Adda annongen dagiti napulotan a Kristiano ita nga umasping ken Jeremias, ken babaen ti suporta ti “dakkel a bunggoy” ti “sabsabali a karnero,” itultuloyda nga iwaragawag dagiti panggep ni Jehova, uray iti laksid ti panangyaleng-aleng, pannakalalais, ken pannakaidadanes. (Apocalipsis 7:9; Juan 10:16) Makapabileg kadakuada ti kinuna ni Jehova ken ni Jeremias: “Dika agbuteng.” Dida pulos malipatan a ti Dios ti nangdutok kadakuada ken ti mensahena ti ikaskasabada.​—2 Corinto 2:17.

Dagiti Ulidan ti Kinabileg a Maikari a Tuladen

12. Ania a nagsayaat nga ulidan ti kinabileg ti impakita ni Jesus, ken kasanona a pinaregta dagiti pasurotna?

¹² Makatulong iti panagreggettayo a bumileg no mennamennaentayo dagiti ulidan ti dadduma a nagtignay a sibibileg, kas ken Jeremias. (Salmo 77:12) Kas pagarigan, no usigentayo ti ministerio ni Jesus, pagamangaennatayo ti kinabilegna idi sinulisog ni Satanas ken idi naipasango iti nakaro nga ibubusor dagiti Judio a panguluen. (Lucas 4:1-13; 20:19-47) Iti bileg ni Jehova, saan a kimmapuy ti pammati ni Jesus, ken sakbay unay ti ipapatayna, kinunana kadagiti adalanna: “Iti lubong addaankayo iti rigat, ngem bumilegkayo! Pinarmekko ti lubong.” (Juan 16:33; 17:16) No tinulad dagiti adalan ni Jesus ti ulidanna, naparmekda met ti lubong. (1 Juan 2:6; Apocalipsis 2:7, 11, 17, 26) Ngem masapul a ‘bumilegda’ idi.

13. Ania ti inted ni Pablo a pammaregta kadagiti taga Filipos?

¹³ Sumagmamano a tawen kalpasan ti ipapatay ni Jesus, naibalud idiay Filipos da Pablo ken Silas. Idi agangay, pinaregta ni Pablo ti kongregasion idiay Filipos nga agtalinaedda a ‘sitatakder iti maymaysa nga espiritu, agraman iti maymaysa a kararua nga umag-agawa nga agdadanggay a maipaay iti pammati iti naimbag a damag, ket iti aniaman a pamay-an saan a mabutbuteng kadagiti kabusorda.’ Tapno mapabilegna ida a mangaramid iti dayta, kinuna ni Pablo: “Daytoy met laeng a banag [ti pannakaidadanes dagiti Kristiano] ket pammaneknek ti pannakadadael [kadagiti manangidadanes], ngem pannakaisalakan kadakayo; ket daytoy a pasimudaag naggapu iti Dios, agsipud ta naited kadakayo ti pribilehio maigapu ken Kristo, saan laeng a tapno maaddaankayo iti pammati kenkuana, no di ket tapno agsagaba met maigapu kenkuana.”​—Filipos 1:27-29.

14. Ania ti epektona idiay Roma ti kinatured ni Pablo?

¹⁴ Nakabalud ni Pablo idiay Roma idi nagsurat iti kongregasion idiay Filipos. Kaskasdi, nagtultuloy a situtured a nangasaba iti sabsabali. Ania ti resultana? Insuratna: “Dagiti parautko nagbalinda a publiko a pannakaammo a mainaig ken Kristo iti nagtetengngaan dagiti amin a Guardia a Pretorio ken iti amin a sabsabali; ket kaaduan kadagiti kakabsat iti Apo, yantangay nariknada ti panagtalek maigapu kadagiti parautko iti pagbaludan, mangipakpakitada iti ad-adda pay a tured tapno awanan buteng a sawenda ti sao ti Dios.”​—Filipos 1:13, 14.

15. Pakasarakantayo kadagiti nasayaat nga ulidan ti pammati a mangpatibker iti determinasiontayo a bumileg?

¹⁵ Makapabileg kadatayo ti ulidan ni Pablo. Kasta met dagiti nasayaat nga ulidan dagiti moderno-aldaw a Kristiano a nagibtur iti pannakaidadanes kadagiti pagilian nga iturayan dagiti diktador wenno klero. Adu kadagitoy a pakasaritaan ti nailanad iti Pagwanawanan ken Agriingkayo! a magasin ken kadagiti Tinawen a Libro Dagiti Saksi ni Jehova. Bayat a basbasaenyo dagita a salaysay, laglagipenyo a dagiti makinkapadasan kadagita ket ordinario a tattao a kas kadatayo; ngem idi addada iti sidong ti narigat unay a kasasaad, impaayan ida ni Jehova iti pannakabalin a nalablabes ngem iti gagangay ket nakapagibturda. Masiguradotayo a kasta ti aramidenna kadatayo no kiddawen ti kasasaad.

Pakaay-aywan ken Pakaidayawan ni Jehova ti Kinabilegtayo

16, 17. Kasanotayo nga agbalin a nabileg ita?

¹⁶ Nabileg ti Kristiano nga agtalinaed a natibker agpaay iti kinapudno ken kinalinteg. Nabilbileg pay no kasta ti aramidenna uray mabutbuteng. Kinapudnona, maibilang a nabileg ti asinoman a Kristiano no pudpudno a kayatna nga aramiden ti pagayatan ni Jehova, no determinado nga agtalinaed a matalek, no kanayon nga agpannuray iti Dios, ken no silalagip a pinabileg idi ni Jehova ti di mabilang a tattao a kas kenkuana. Maysa pay, no mabigbigtayo a makaay-ayo ken pakaidayawan ni Jehova ti kinabilegtayo, ad-adda a determinadotayo a di agkapuy. Nakasaganatayo a mangibtur iti pananglais wenno iti nakarkaro pay a pannakatrato gapu ta kasta unay ti panagayattayo kenkuana.​—1 Juan 2:5; 4:18.

¹⁷ Ditay pulos liplipatan a no agsagabatayo gapu iti pammatitayo, dina kayat a sawen nga adda di umiso a naaramidtayo. (1 Pedro 3:17) Agsagabatayo gapu iti panangitandudotayo iti kinasoberano ni Jehova, gapu iti panagaramidtayo iti naimbag, ken gapu ta ditay paset iti lubong. No maipapan iti daytoy, kinuna ni apostol Pedro: “Inton agar-aramidkayo iti naimbag ket agsagabakayo, ibturanyo dayta, makaay-ayo a banag daytoy iti Dios.” Kinuna pay ni Pedro: “Dagidiay agsagsagaba maitunos iti pagayatan ti Dios itultuloyda met koma nga ikumit dagiti kararuada iti matalek a Namarsua bayat nga agar-aramidda iti naimbag.” (1 Pedro 2:20; 4:19) Wen, ti pammatitayo ket pakaay-aywan ken pakaidayawan ti naayat a Diostayo, ni Jehova. Anian a nagdakkel a rasontayo a bumileg!

Pannakisarita Kadagiti Autoridad

18, 19. No naturedtayo iti saklang ti hues, ania a mensahe ti ipakpakaammotayo no an-anagen?

¹⁸ Idi kinuna ni Jesus kadagiti pasurotna a maidadanesda, innayonna: “[Dagiti tattao] iyawatdakayto kadagiti lokal a pangukoman, ket saplitendakayto kadagiti sinagogada. Ay ket, maisaklangkayto iti sanguanan dagiti gobernador ken ar-ari maigapu kaniak, maipaay a pangsaksi kadakuada ken kadagiti nasion.” (Mateo 10:17, 18) Kasapulan ti tured no dumatagtayo iti hues wenno agtuturay gapu iti ulbod a pammabasol. Kaskasdi, no situtured a gundawayantayo dagita nga oportunidad a mangasaba kadagita a tattao, ap-aprobetsarentayo ti maysa a nainget a situasion tapno itungpal ti maysa a napateg a banag. No an-anagen, ipakpakaammotayo ti sasao ni Jehova kadagidiay manguk-ukom kadatayo, a nairekord iti maikadua a kapitulo ti Salmo: “Ita, O ar-ari, watwatenyo ti pannakatarus; mailintegkayo koma, O uk-ukom ti daga. Agserbikayo ken Jehova buyogen ti panagbuteng.” (Salmo 2:10, 11) No siuulbod a maakusar dagiti Saksi ni Jehova iti korte, masansan nga itandudo dagiti hues ti wayawaya ti panagdayaw, ket apresiarentayo dayta. Ngem dadduma a hues ti nagpaimpluensia kadagiti bumusbusor. Kuna ti Kasuratan kadagita a tattao: “Mailintegkayo koma.”

¹⁹ Nasken a bigbigen dagiti hues a ti kangatuan a linteg isu ti linteg ni Jehova a Dios. Nasken a laglagipenda nga amin a tattao, agraman dagiti hues, manungsungbatda ken Jehova a Dios ken ni Jesu-Kristo. (Roma 14:10) No kadatayo, magun-odtayo man ti hustisia kadagiti natauan a hues wenno saan, adda rasontayo a bumileg gapu ta tultulongannatayo ni Jehova. Kuna ti Biblia: “Naragsak dagidiay amin nga agkamang kenkuana.”​—Salmo 2:12.

20. Apay a naragsaktayo no maibturantayo ti pannakaidadanes ken pammardaya?

²⁰ Iti Sermon iti Bantay, kinuna ni Jesus: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit; ta iti kasta a pamay-an indadanesda dagiti mammadto nga immun-una ngem dakayo.” (Mateo 5:11, 12) Siempre, saan a makaay-ayo ti maidadanes, ngem makaparagsak no agtalinaedtayo a natibker iti laksid ti pannakaidadanes, agraman dagiti pammardaya ti media. Kayatna a sawen a parparagsakentayo ni Jehova ket umawattayto iti gunggona. Ipakita ti kinabilegtayo a pudno ti pammatitayo ken ipanamnamana ti anamong ti Dios. Kinapudnona, ipakitana a naan-anay nga agtalektayo ken ni Jehova. Napateg iti maysa a Kristiano ti kasta a panagtalek, kas ipakita ti sumaganad nga artikulo.

Ania ti Naadalyo?

• Kadagiti ania a kasasaad ita a masapul a bumilegtayo?

• Kasanotayo a masukay ti galad a kinabileg?

• Siasino dagiti sumagmamano a nasayaat nga ulidan ti kinabileg?

• Apay a kayattayo ti agtignay buyogen ti kinabileg?

[Dagiti Ladawan iti panid 9]

Ni Simone Arnold (Liebster ita) idiay Alemania, ni Widdas Madona idiay Malawi, ken da Lydia ken Oleksii Kurdas idiay Ukraine imparangarangda ti bileg ken sinarangetda daydiay nadangkes

[Dagiti Ladawan iti panid 10]

Ditay ibain ti naimbag a damag

[Ladawan iti panid 11]

Ti kinatured ni Pablo iti pagbaludan dakkel ti naaramidanna iti naimbag a damag

[Ladawan iti panid 12]

No situtured nga ilawlawagtayo ti Nainkasuratan a takdertayo iti maysa a hues, ipakpakaammotayo ti napateg a mensahe