Agmaingelkayo!
“Agmaingelkayo ket sawenyo: ‘Ni Jehova ti katulongak.’”—HEBREO 13:6.
1. Kasano nga impakita dagidiay nakasursuro iti kinapudno maipapan iti Dios idi umuna a siglo K.P. ti tured?
UMUNA a siglo idi ti Kadawyan a Panawentayo. Dimtengen ti Mesias a nabayagen nga ur-urayen. Sinursuruanna a naimbag dagiti adalanna ken nangisayangkat iti nagpateg a trabaho a panangasaba. Panawenen tapno mangngegan dagiti tattao ti naimbag a damag ti Pagarian ti Dios. Gapuna, situtured nga inwaragawag dagiti lallaki ken babbai a nakasursuro iti kinapudno dayta makaparagsak a mensahe.—Mateo 28:19, 20.
2. Apay a kasapulan dagiti Saksi ni Jehova ti tured ita?
2 Saan a naipasdek ti Pagarian kadagidi a tiempo. Ngem impadto ti Nadutokan nga Ari a ni Jesu-Kristo ti masanguanan a di makita a kaaddana a kas ari ti Pagarian. Mailasin dayta babaen dagiti bambanag kas dagiti awan kapadana a gubat, bisin, angol, ginggined, ken sangalubongan a pannakaikaskasaba ti naimbag a damag. (Mateo 24:3-14; Lucas 21:10, 11) Kas Saksi ni Jehova, kasapulantayo ti tured tapno mapagballigiantayo dagitoy a kasasaad ken ti pannakaidadanes a mapasarantayo. Makagunggona ngarud no usigentayo dagiti salaysay iti Biblia maipapan kadagiti natured a manangiwaragawag ti Pagarian idi umuna a siglo K.P.
Kinatured a Mangtulad ken Kristo
3. Asino ti nangipaay iti kasayaatan nga ulidan ti kinatured, ket ania ti naikuna maipapan kenkuana idiay Hebreo 12:1-3?
3 Impaay ni Jesu-Kristo ti kasayaatan nga ulidan ti kinatured. Kalpasan ti panangdakamatna iti ‘kasta unay nagdakkel a kaadu’ dagiti natured a saksi ni Jehova sakbay ti panawen dagiti Kristiano, inturong ni apostol Pablo ti atension ken ni Jesus, a kunkunana: “Yantangay nalikmuttayo iti kasta unay nagdakkel a kaadu dagiti saksi, iwagsaktayo ti amin a pakadagsenan ken ti basol a silalaka a mangsimbalud kadatayo, ket tarayentayo koma a siaanus ti tarayen a naikabil iti sanguanantayo, bayat a sipapasnek a kitkitaentayo ni Jesus, ti Kangrunaan nga Ahente ken Mangan-anay iti pammatitayo. Gapu iti rag-o a naikabil iti sanguananna, inibturanna ti kayo a pagtutuokan, nga inwaksina ti bain, ket nagtugaw iti makanawan iti trono ti Dios. Panunotenyo ngarud a naimbag daydiay nagsagaba iti kasta a panangsupring dagiti managbasol a bimmusor kenkuana, tapno dikay koma mabannog, nga agkapuykayo kadagiti kararuayo.”—Hebreo 12:1-3.
4. Kasano nga impakita ni Jesus ti tured idi sinulisog ni Satanas?
4 Kalpasan ti bautismona ken ti panangut-utob, panagkarkararag, ken panagayunarna iti 40 nga aldaw, situtured a sinaranget ni Jesus ni Satanas. Idi sinulisog ti Diablo a pagbalinenna a tinapay dagiti bato, nagkitakit ni Jesus gapu ta di umiso ti mangaramid iti milagro a pangpennek iti personal a tarigagay. “Adda a naisurat,” kinuna ni Jesus, “Saan laeng a ti tinapay ti pagbiag ti tao, no di ket ti tunggal sao a rummuar iti ngiwat ni Jehova.” Idi kinarit ni Satanas a tumpuak iti kangatuan a paset ti templo, nagkitakit ni Jesus gapu ta maysa a basol ti panangsulisog iti Dios a mangispal kenkuana iti posible a panag-suicide. “Adda met a naisurat,” kinuna ni Kristo, “Dimo sulisogen ni Jehova a Diosmo.” Indiaya ni Satanas kenkuana amin a pagarian ti lubong a kasukat ti maysa a “tignay ti panagdayaw,” ngem di mabalin ni Jesus ti agapostata ken kumanunong iti karit ti Diablo a tallikudan dagiti tattao ti Dios no masuotda. Isut’ gapuna a kinuna ni Jesus: “Pumanawka, Satanas! Ta adda a naisurat, ‘Agdaydayawka ken ni Jehova a Diosmo, ket isu laeng ti pagserbiam.’” Ket “pimmanaw pay laeng kenkuana [ti Mannulisog] agingga iti dumteng ti sabali a gundaway.”—Mateo 4:1-11; Lucas 4:13.
5. Ania ti makatulong kadatayo a mangsaranget iti sulisog?
5 Nagpasakop ni Jesus ken ni Jehova ken sinarangetna ni Satanas. No ‘agpasakoptay [met] iti Dios ken sarangtentayo ti Diablo, isu agtalawto kadatayo.’ (Santiago 4:7) Kas ken Jesus, kabaelantayo a sarangten a situtured ti sulisog no iyaplikartayo dagiti Kasuratan, nalabit adawen pay ketdi ida iti kanito a masulisogtayo nga agaramid iti dakes. Mabalin ngata a masulisogtayo nga agtakaw no iti dayta a kanito dagullitentayo nga ibaga iti bagitayo ti linteg ti Dios a: “Dika agtakaw”? Mabalin ngata a tumulok ti dua a Kristiano iti seksual nga imoralidad uray pay no situtured nga adawen ti maysa kadakuada dagiti sasao a: “Dika makikamalala”?—Roma 13:8-10; Exodo 20:14, 15.
6. Kasano a ni Jesus ket maysa a natured a manangparmek iti lubong?
6 Kas Kristiano a kagura daytoy a lubong, kabaelantayo a liklikan ti espiritu ken dakes a kababalin daytoy. Kinuna ni Jesus kadagiti pasurotna: “Ditoy lubong addanto rigatyo, ngem manginanamakayo! Siak pinarmekko ti lubong.” (Juan 16:33) Pinarmekna ti lubong babaen ti saanna a panangtulad iti dayta. Ti ulidanna kas maysa a manangparmek ken ti nagbanagan ti panangsalimetmetna iti kinatarnawna punnuennatayo iti tured a mangtulad kenkuana babaen ti panagtalinaedtayo a naisina iti daytoy a lubong ken di patulawan iti dayta.—Juan 17:16.
Kinatured nga Agtultuloy a Mangasaba
7, 8. Ania ti makatulong kadatayo nga agtultuloy a mangasaba iti laksid ti pannakaidadanes?
7 Nagpannuray ni Jesus ken dagiti adalanna iti Dios maipaay iti tured nga agtultuloy a mangasaba iti laksid ti pannakaidadanes. Situtured nga inringpas ni Kristo ti ministeriona iti laksid ti pannakaidadanes, ket kalpasan ti Pentecostes 33 K.P., intultuloy dagiti maidaddadanes a pasurotna nga inwaragawag ti naimbag a damag uray pay inkagumaan dagiti Judio a relihiuso a papangulo a pasardengen ida. (Aramid 4:18-20; 5:29) Inkararag dagiti adalan: “Jehova, kitaem dagiti panangam-amesda, ket ipaaymo a dagiti adipenmo sawenda a situtured unay ti saom.” Ket ania ti napasamak? “Idi a nakapagkararagdan, daydi disso a nakaurnonganda nagkintayeg,” kuna ti salaysay, “ket napnoda amin iti nasantuan nga espiritu ket sinaoda a situtured ti sao ti Dios.”—Aramid 4:24-31.
8 Yantangay saan nga ikaskaso ti kaaduan a tattao ita ti naimbag a damag, masansan a kasapulan ti tured iti panangitultuloy a mangasaba kadakuada. Kasapulan dagiti adipen ni Jehova ti inted-Dios a tured nangruna no maidaddadanesda tapno makaipaayda iti naan-anay a pammaneknek. (Aramid 2:40; 20:24) Isut’ gapuna a kinuna ti natured a manangiwaragawag ti Pagarian a ni Pablo iti maysa nga agtutubo, kurang padasna a kaduana: “Saannatay nga inikkan ti Dios iti espiritu ti kinatakrut, no di ket ti kinatibker ken ti ayat ken ti kinasimbeng ti panunot. Dika ngarud agbain a mangpaneknek iti Apotayo, ken kaniak met a baludna, no di ket makipagsagabaka kadagiti rigrigat gapu iti naimbag a damag, kas mayannurot iti pannakabalin ti Dios.” (2 Timoteo 1:7, 8) No ikararagtayo ti tured, mabalinantayo ti agtultuloy a mangasaba, ket uray ti pannakaidadanes dina maikkat ti rag-otayo kas manangiwaragawag ti Pagarian.—Mateo 5:10-12.
Kinatured a Dumasig ken Jehova
9, 10. (a) Ania ti inaramid dagiti Judio ken Gentil idi umuna a siglo tapno makapagbalinda a bautisado a pasurot ni Kristo? (b) Apay a kasapulan ti tured iti panagbalin a Kristiano?
9 Adu kadagiti Judio ken Gentil idi umuna a siglo ti situtured a nangidian kadagiti di nainkasuratan a tradision tapno makapagbalinda a bautisado a pasurot ni Kristo. Di nagbayag kalpasan ti Pentecostes 33 K.P., “immadu unay ti bilang dagiti adalan sadi Jerusalem; ket adu unay dagiti papadi a simmurot iti pammati.” (Aramid 6:7) Addaan dagidiay a Judio iti tured a nangtallikud iti relihionda ken immawat ken Jesus kas Mesias.
10 Nangrugi idi 36 K.P., adu kadagiti Gentil ti namati. Idi nangngeg ni Cornelio, dagiti kameng ti pamiliana, ken dadduma pay a Gentil ti naimbag a damag, dagus nga inakseptarda dayta, immawatda ti nasantuan nga espiritu, ket “nabautisaranda iti nagan ni Jesu-Kristo.” (Aramid 10:1-48) Idiay Filipos, sidadaan nga inawat ti maysa a Gentil nga agbambantay iti pagbaludan ken ti sangakabbalayanna ti Kinakristiano, ket “dagus a nabautisaranda.” (Aramid 16:25-34) Kasapulan ti tured iti panangaramid kadagiti kasta nga addang agsipud ta dagiti Kristiano idi buklenda ti maysa a bassit a kagimongan a maidaddadanes, saan a nalatak. Kasta met laeng ita. Ngem no saankay pay a nagdedikar iti Dios ken nabautisaran kas maysa kadagiti Saksi ni Jehova, saan kadi a panawenen tapno situtured nga aramidenyo dagitoy nga addang?
Kinatured iti Uneg ti Nabingaybingay a Sangakabbalayan
11. Ania a nasayaat nga ulidan ti kinatured ti impaay da Eunice ken Timoteo?
11 Nangituyang da Eunice ken ti anakna a ni Timoteo iti nasayaat nga ulidan ti natured a pammati iti uneg ti sangakabbalayan a nabingaybingay no iti relihion. Nupay pagano ti lakay ni Eunice, insurona iti anakna “dagiti nasantuan a sursurat” manipud iti kinaubingna. (2 Timoteo 3:14-17) Idi nagbalin a Kristiano, impakitana ti ‘pammati a pudno.’ (2 Timoteo 1:5) Addaan met iti tured a nangisuro iti Nakristianuan a pannursuro ken Timoteo bayat nga impakitana ti panagraem iti kinaulo ti di mamati a lakayna. Kinapudnona, nasupapakan ti pammati ken kinaturedna idi a napili ti anakna a nasursuruan a naimbag a kumadua ken Pablo kadagiti panagdaliasatna kas misionero. Anian a makaparegta daytoy kadagiti Kristiano a nagannak a kasta met laeng ti kasasaadda!
12. Ania a kita ti tao ti nagbalinan ni Timoteo, ket siasino ita ti kas kenkuana?
12 Nupay dimmakkel ni Timoteo iti sangakabbalayan a nabingaybingay no iti relihion, situtured nga inawatna ti Kinakristiano ket nagbalin a naespirituan a tao. Kastoy ti kinuna ni Pablo maipapan kenkuana: “Inanamaek ken Apo Jesus nga ibaonko kadakayo [dagiti taga-Filipos] iti mabiit ni Timoteo, tapno mabang-aran met ti nakemko, no maammuak ti kasasaadyo. Ta awan kaniak ti sabali a kanaknakemna a pudpudno a mangisakit kadakayo. . . . Ammoyo ti pammaneknek nga intedna maipapan iti bagina, a kas iti anak ken amana, kasta ti pannakipagserbina kaniak a maipuon iti naimbag a damag.” (Filipos 2:19-22) Itatta, adu nga ubbing a lallaki ken babbai a nabingaybingay ti sangakabbalayanda no iti relihion ti situtured nga immawat iti pudno a Kinakristiano. Kas ken Timoteo, mangipapaayda iti pammaneknek maipapan iti bagida, ket anian a ragsaktayo ta paset ida ti organisasion ni Jehova!
Kinatured a ‘Mangipeggad Kadagiti Tengngedtayo’
13. Iti ania a wagas nga impakita da Aquila ken Priscila ti tured?
13 Nangituyang da Aquila ken ni baketna a Priscila (Prisca) iti ulidan babaen ti situtured a ‘panangipeggadda kadagiti tengngedda’ gapu iti kapammatianda. Pinasangbayda ni Pablo iti pagtaenganda, nakipagtrabahoda kenkuana iti panagaramid iti tolda, ken tinulonganda a nangbuangay iti baro a kongregasion idiay Corinto. (Aramid 18:1-4) Kabayatan ti 15 a tawen a panaggagayyemda, insebbada pay ketdi ti biagda gapu kenkuana iti di naibaga a pamay-an. Agnanaedda idi idiay Roma idi kinunana kadagiti Kristiano sadiay: “Kablaawanyo ni Prisca ken ni Aquila, dagiti katultulongak ken Kristo Jesus, isuda a nangipeggad kadagiti tengngedda gapu itoy biagko, ket saan laeng a siak ti agyaman kadakuada, no di pay ket ti amin a kongregasion dagiti Gentil.”—Roma 16:3, 4.
14. Iti panangipeggadda kadagiti tengngedda gapu ken Pablo, nagtignay da Aquila ken Prisca maitunos iti ania a bilin?
14 Iti panangipeggadda kadagiti tengngedda gapu ken Pablo, nagtignay da Aquila ken Prisca a maitunos kadagiti sasao ni Jesus: “Maysa a bilin a baro ti itdek kadakayo, tapno agayan-ayatkayo iti maysa ken maysa; kas iti panagayatko kadakayo, kasta met agayan-ayatkay koma iti maysa ken maysa.” (Juan 13:34) Daytoy a bilin ket “baro” agsipud ta linab-awanna ti ipaannurot ti Linteg Mosaiko a rumbeng nga ayaten ti maysa a tao ti kaarrubana a kas iti panagayatna iti bagina. (Levitico 19:18) Sapulen dayta ti managsakripisio nga ayat agingga iti punto nga ited ti maysa ti biagna gapu kadagiti sabsabali, kas iti inaramid ni Jesus. Inadaw ni mannurat a Tertullian a nagbiag idi maikadua ken maikatlo a siglo K.P. ti ibagbaga dagiti tattao ti lubong maipapan kadagiti Kristiano idi insuratna: “‘Adtoy,’ kunada, ‘anian ti panagayatda iti maysa ken maysa . . . ken anian a sisasaganada a matay para iti maysa ken maysa.’” (Apology, kapitulo XXXIX, 7) Rebbeng nga ipakitatayo ti nainkabsatan a panagayat nangruna iti tiempo ti pannakaidadanes babaen ti situtured a panangisebbatayo iti biagtayo tapno mailisi dagiti kapammatiantayo iti kinaranggas wenno ipapatay iti ima dagiti kabusor.—1 Juan 3:16.
Ti Tured Mangyeg iti Rag-o
15, 16. Kas naipakita iti Aramid kapitulo 16, kasano nga agkanaig ti tured ken rag-o?
15 Nangipaay da Pablo ken Silas iti pammaneknek a ti panangipakita iti tured iti sidong dagiti pakasuotan mangyeg iti rag-o. Iti panangibilin dagiti mahistrado sibil iti siudad ti Filipos, nasapsaplitda iti imatang dagiti tao ken naikabilda kadagiti tul-ong iti uneg ti pagbaludan. Kaskasdi, saanda nga immarukot iti buteng. Nupay naparparigatda, addaanda pay laeng iti inted-Dios a tured ken ti rag-o nga itden dayta kadagiti matalek a Kristiano.
16 Iti agarup ngalay ti rabii, agkarkararag da Pablo ken Silas ken agkankantada kadagiti himno a pagdaydayaw iti Dios. Pagammuan, nagginggined ket nagunggon ti pagbaludan, nawarwar dagiti galutda, ken naglukat dagiti ridaw. Naipaayan ti mabutbuteng nga agbambantay iti pagbaludan ken ti sangakabbalayanna iti nabileg a pammaneknek a nangiturong iti pannakabautisarda kas ad-adipen ni Jehova. “Nagrag-o [ti agbambantay] agraman ti amin a sangakabbalayanna agsipud ta namatidan iti Dios.” (Aramid 16:6-34) Anian a rag-o ti inyeg daytoy kada Pablo ken Silas! Iti panangusigtayo iti daytoy ken kadagiti dadduma pay a Nainkasuratan nga ulidan ti kinatured, kasanotay a makapagtalinaed a natured kas ad-adipen ni Jehova?
Agtalinaedkayo a Natured
17. Kas naipakita iti Salmo 27, kasano a nainaig iti tured ti panangnamnama ken Jehova?
17 Ti panangnamnama ken Jehova tulongannatayo nga agtalinaed a natured. Inkanta ni David: “Mangnamnamaka ken Jehova; bumilegka, ket tumured koma ta pusom. Wen, mangnamnamaka ken Jehova.” (Salmo 27:14) Ipakita ti Salmo 27 a nagtalek ni David ken Jehova kas “sarikedked” ti biagna. (Bersikulo 1) Ti pannakaimatangna iti panangduprak ti Dios kadagiti kabusor ni David iti napalabas ti nangted kenkuana iti tured. (Bersikulo 2, 3) Nakatulong met ti panangapresiar iti sentro ti panagdaydayaw ken Jehova. (Bersikulo 4) Ti panagtalek iti tulong, pannalaknib, ken panangisalakan ni Jehova pinakiredna met ti nakem ni David. (Bersikulo 5-10) Nakatulong met ti agtultuloy a panangsursuro kadagiti prinsipio ti nalinteg a dalan ni Jehova. (Bersikulo 11) Nakatulong ken David nga agbalin a natured ti sitatalek a panangikararag iti pannakaispal manipud kadagiti kabusorna, a napakuyogan iti pammati ken namnama. (Bersikulo 12-14) Mapatibkertayo ti nakemtayo iti isu met laeng a wagas, iti kasta ipakpakitatayo a pudno a “mangnamnama[tayo] ken Jehova.”
18. (a) Ania ti mangipakita a ti regular a pannakitimpuyog kadagiti padatayo nga agdaydayaw ken Jehova makatulong kadatayo nga agtalinaed a natured? (b) Ania ti paset dagiti Nakristianuan a panaggigimong iti panagbalintayo a natured?
18 Ti regular a pannakitimpuyog kadagiti padatayo nga agdaydayaw ken Jehova makatulong kadatayo nga agtalinaed a natured. Idi nagapelar ni Pablo ken Cesar ken agdaldaliasat nga agturong idiay Roma, isut’ sinabat dagiti kapammatianna iti Plasa ni Appio ken idiay Tallo a Taberna. “Idi makita[na] ida,” kuna ti salaysay, “nagyaman ni Pablo iti Dios ket napabileg ti nakemna.” (Aramid 28:15) No regular a tumabtabunotayo kadagiti Nakristianuan a panaggigimong, ipangpangagtayo ti balakad ni Pablo: “Agpipinnanunottayo a maipaay iti pannakaparegtatayo iti ayat ken kadagiti naimbag nga aramid, a ditay baybay-an dagiti panaggigimongtayo, kas iti kadawyan dagiti dadduma, no di ket agpipinnabilegtayo, ket nangnangruna gapu ta makitayo nga umas-asideg ti aldaw.” (Hebreo 10:24, 25) Ania ti kayat a sawen ti agpipinnaregta? Ti panangparegta kaipapananna ti “panangpatured, panangpatibker iti nakem, wenno panangparayray iti namnama.” (Webster’s Ninth New Collegiate Dictionary) Adu ti maaramidantayo iti panangpakired ti nakem dagiti dadduma a Kristiano, ket ti pammaregtada mabalin a parayrayenna met daytoy a galad kadatayo.
19. Kasano a nainaig dagiti Kasuratan ken Nakristianuan a publikasion iti panagtalinaedtayo a natured?
19 Tapno makapagtalinaed a natured, masapul a regular nga adalentayo ti Sao ti Dios ken iyaplikartayo ti balakadna iti biagtayo. (Deuteronomio 31:9-21; Josue 1:8) Ti regular a panagadaltayo rebbeng a ramanenna dagiti Nakristianuan a publikasion a naibatay iti Kasuratan, ta ti natimbeng a balakad a maawattayo tulongannatayo a mangsaranget kadagiti pakasuotan ti pammati a buyogen ti inted-Dios a tured. Manipud kadagiti salaysay iti Biblia, nakitatayo no kasano nga imparangarang dagiti adipen ni Jehova ti tured kadagiti nadumaduma a kasasaad. Kadagitoy a kanito, mabalin a ditay ammo no kasano a matulongannatayo ti kasta nga impormasion, ngem addaan bileg ti Sao ti Dios, ket ti masursurotayo iti dayta kanayon a makagunggona kadatayo. (Hebreo 4:12) Kas pangarigan, no apektaran ti panagbuteng iti tao ti ministeriotayo, mabalin a malagiptayo no kasano nga impakita ni Enoc ti kinaturedna a nangipakaammo iti mensahe ti Dios kadagiti managdakdakes.—Judas 14, 15.
20. Apay a maikuna a nagpateg ti kararag iti panagtalinaedtayo a natured kas ad-adipen ni Jehova?
20 Tapno makapagtalinaedtayo a natured kas ad-adipen ni Jehova, masapul nga agkararagtayo a kanayon. (Roma 12:12) Situtured a naibturan ni Jesus dagiti suot gapu ta ‘nangidaton kadagiti ar-araraw ken dawdawat iti Daydiay makabalin idi a mangispal kenkuana iti ipapatay, a nabuyogan iti nasged a sangsangit ken lulua, ket naipangag gapu iti nadiosan nga amakna.’ (Hebreo 5:7) No agtalinaedtayo a nadekket iti Dios babaen ti panagkararag, saantayto a maitulad kadagiti takrut a tattao ti lubong a naikeddeng nga aglak-am iti “maikadua nga ipapatay,” nga awan namnamada nga agungar. (Apocalipsis 21:8) Dagiti laeng natured nga adipenna ti isalakan ken paraburan ti Dios iti biag iti baro a lubongna.
21. Apay a makapagtalinaed a natured dagiti nasungdo a Saksi ni Jehova?
21 Kas nasungdo a Saksi ni Jehova, di rumbeng a kabutengtayo dagiti demonio ken tattao a bumusbusor kadatayo, ta addaantayo iti pannaranay ti Dios ken ti ulidan ni Jesus kas natured a manangparmek iti lubong. Ti makapabileg iti naespirituan a pannakitimpuyog iti ili ni Jehova tulongannatayo met nga agbalin a natured. Ti panangiwanwan ken pammalakad dagiti Kasuratan ken Nakristianuan a publikasion pakirdenna met ti nakemtayo. Ket dagiti salaysalay iti Biblia maipapan kadagiti adipen ti Dios idi un-unana a panawen makatulong kadatayo a magna a situtured kadagiti daldalanna. Gapuna, kadagitoy napeggad a maudi nga al-aldaw, situtured a rumang-aytayo iti sagrado a serbisio. Wen, agmaingel koma amin a tattao ni Jehova!
Kasanoyo a Sungbatan?
◻ Kasano a punnuennatay iti tured ti ulidan ni Jesus?
◻ Ania ti nangted ken Jesus ken kadagiti adalanna iti tured nga agtultuloy a mangasaba?
◻ Apay a kasapulan dagiti Judio ken Gentil ti tured iti pannakidasig ken Jehova?
◻ Ania nga ulidan ti kinatured ti impaay da Eunice ken Timoteo?
◻ Ania ti mangpaneknek a ti tured mangyeg iti rag-o uray iti sidong ti pannakaidadanes?
[Ladawan iti panid 18]
Kas ken Jesus, kabaelantayo a sarangten ti sulisog no iyaplikar ken adawentayo dagiti Kasuratan