Am-ammuenyo Dagiti Kakabsatyo
1 Deskribiren ti Biblia ti pudno a gayyem a kas tao a nadekdekket ngem iti kabsat, a di agbalbaliw ti ayat ken kinasungdona, ken tulonganna ti kaduana iti panawen ti rigat. (Prov. 17:17; 18:24) Nakaad-adu ti mabirokantayo a kasta a gagayyem iti kongregasion no ikagumaantayo ti agiinnammo ken agiinnayat.—Juan 13:35.
2 Addaantayo iti nagsayaat a gundaway a mangam-ammo kadagiti kakabsattayo sakbay ken kalpasan dagiti gimong. Apay a diyo sapaen ti sumangpet ken agtalinaedkay pay kalpasanna tapno matagiragsakyo ti nabara ken naganaygay a panaglalangen? Ikagumaanyo ti makisarita iti nadumaduma a kakabsat, a pakairamanan dagiti nataengan nga aduan kapadasan ken ub-ubbing wenno kadagiti managbabain.
3 Dakayo ti Mangirugi iti Saritaan: Saan nga umdas ti basta panangkablaaw kadagiti kakabsatyo. Mairugiyo ti saritaan babaen ti panangiburay iti kapadasan idiay tay-ak ti ministerio, maysa a makapainteres a punto iti kabarbaro a magasin, wenno komento maipapan iti kalkalpas a gimong. Adu ti maammuanyo maipapan kadagiti kakabsatyo babaen ti panagimdengyo a naimbag, a paregtaenyo ida a mangestoria kadagiti kapadasanda ken kadagiti maad-adalda. Mabalin nga adun ti maammuanyo babaen laeng ti panangisaludsodyo iti maysa a kabsat no kasanona a naam-ammo ni Jehova. Dadduma addaanda iti makapabileg-pammati a kapkapadasan, idinto ta dagiti dadduma agib-ibturda itan kadagiti kasasaad a mabalin a di ipagpagarup dagiti adu. Kas pudno a gagayyem, ti pannakatarus iti daytoy tulongannatayo nga agbalin a mannakipagrikna ken alisto a tumulong kadagiti pakasapulan ti sabsabali.
4 Gayyemenyo ti Maysa ken Maysa: Kalpasan ti ipapatay ti anak ti maysa a sister, marigatan a mangkanta kadagiti kanta ti Pagarian a pakadakamatan ti panagungar. Malaglagipna: “Iti naminsan, nakita ti maysa a sister nga adda iti bangir a tugaw nga agluluaak. Immasideg, inarakupnak, ken dinanggayannak a nangkanta iti natda a paset ti kanta. Nariknak ti napalalo nga ayat kadagiti kakabsat ken anian a ragsakmi a makigimong, ta ammomi nga adda sadiay ti tulong a kasapulanmi, sadiay Kingdom Hall.” Gayyementay koma dagiti kakabsattayo babaen ti panangliwliwa kadakuada no kasapulan ken kanayon a paregtaentay ida.—Heb. 10:24, 25.
5 Bayat a kumarkaro ti kinadamsak daytoy daan a lubong, determinadotayo koma a mangam-ammo a naimbag kadagiti kakabsattayo. Daytoy napaypayso a panagpipinnaregta ket bendision kadagiti amin.—Roma 1:11, 12.