Ammuenyo a Naimbag Dagiti Kakabsatyo
1 Ti relasiontayo iti kapada a managdaydayaw ket ramanenna iti nasursurok ngem ti makitabuno laeng kadakuada iti gimgimong idiay Kingdom Hall. Managaramidtayo iti pagayatan ti Dios, ket dayta ti mangyeg kadatayo iti espiritual a relasion ken Jesus. (Mar. 3:34, 35) Dayta, iti kalpasanna, iyegnatayo met iti espiritual a relasion ti pamilia kadagiti kakabsattayo iti Kristiano a kongregasion, isu a nakabilinantayo nga ayaten. (Juan 13:34) Iti kasta, kas “kamkameng ti sangakabbalayan ti Dios,” ikagumaan ti agi-innammo a naimbag iti maysa ken maysa.—Efe. 2:19.
2 Ammuenyo Dagiti Kakabsatyo iti Nagan: Ammoyo kadi iti nagnagan dagiti amin idiay Panagadal ti Libro iti Kongregasionyo? Masansan a bassit ti grupo, a mamaglaka a makabisado iti nagnagan dagidiay a tumabtabuno. No dikay ammo dagiti naganda, makunayo kadi nga am-ammoyo ida a naimbag?
3 Kasano met ngay ti panangammo iti dadduma, agraman ubbing, a tumabuno iti gimong idiay Kingdom Hall? Nalabit a nairuamtayo a makikadua iti bassit a sirkulo dagiti gagayyem. Bayat a saan a biddut ti makikadua iti sumagmamano a tattao, ditay kayat a makedngan ti nabara a panangablaaw ken pannakisao iti sumagmamano laeng. Kayattayo ti ‘lumawa,’ nga ikagumaan nga ammuen a naimbag dagiti kakabsat a lallaki agraman babbai.—2 Cor. 6:11-12.
4 Dagiti kakabsat a mangidaulo kadagiti gimong ti mangikagumaan a mangammo iti nagnagan dagiti amin a tumabtabuno. Ti panangawag iti tunggal maysa babaen ti nagan manipud plataporma ti mangipakita a maipateg dagiti komentoda, ken tumulong met iti dadduma a mangammo ti nagnaganda. Siempre, adda sumagmamano nga agdadamo wenno bisita a timmabuno,a mamagrigat nga ammo amin iti kada nagan. Nupay kasta, ti agtultuloy a kinapinget iti daytoy ti mamaregta iti dadduma.—Roma 1:11, 12.
5 Umunakayo a Makiam-ammo a Naimbag: Dagiti managdaliasat a manangaywan ti masansan a makabael a makiam-ammo a naimbag iti adu a bilang dagiti kakabsat. Kasanoda a maaramid dayta? Iti tallo a wagas: (1) Regularda a makipagtrabaho kadakuada iti tay-ak ti serbisio; (2) awatenda dagiti imbitasion a bumisita iti pagtaenganda; (3) kablaawanda nga agpadpada dagiti nataengan ken agtutubo kadagiti gimong.
6 Makitayo kadi dagiti wagas a pangpalawaan ken pakiam-ammuan iti kakabsatyo a nasaysayaat? Awisentayo dagiti dadduma a makikuyog kadatayo iti tay-ak ti serbisio. Ti panagbalaybalay, panagsarungkar, panagadal ti Biblia, wenno panangasaba iti lansangan ket ekselenteda a wagas a pakiam-ammuan. Nasayaat met no awisen dagiti dadduma iti pagtaenganyo. Ti iyaasideg kadagiti agdadamo wenno dagidiay managbabain ket pudno a makapabileg.—Ara. 20:35; 1 Tes. 5:11.
7 Am-ammo ni Pablo a naimbag dagiti kakabsatna. Ti personal a panangawagna kadagiti adu iti mismo a naganda kadagiti suratna ti pammatalged iti interesna ken ti nadungngo a panagayatna kadakuada. (1 Tes. 2:17; 2 Tim. 4:19, 20) Ti pingettayo a mangammo kadagiti kakabsattayo a naimbag kaipapananna ti bendision kadatayo amin.