Usarenyo a Naimbag Dagiti Daanen a Libro
1 Nakaurnongen ti tao iti minilmilion a daan a libro kadagiti libraria iti intero a daga. Ngem aniat’ manayon a pagimbagan a naited dagita iti sangatauan? (Ecl. 12:12) Napatpateg nga amang dagiti publikasion a mangipamaysa iti atension iti Pagarian ti Dios ken iti aramidennanto nga agpaay iti sangatauan. Kaaduan a kongregasion addaanda iti kakasta a nadumaduma a daanen a libro a naipablaak sakbay ti 1985. Iti Enero itukontayo dagitoy a daan a libro iti publiko, a nangnangruna nga itampoktayo ti libro a Nagkaykaysa iti Panagdayaw ken ti bassit nga edision ti libro nga Agbiag nga Agnanayon.
2 Talaga a Napateg Dagita: Nupay nalabit panunoten ti dadduma kadatayo a saanen a napateg ti linaon dagitoy a libro no idilig kadagiti nabiit pay a publikasiontayo, masapul a laglagipentayo a naglaon dagita iti Nainkasuratan a kinapudno. Napateg pay laeng itatta ti ilawlawagda a mensahe ti Pagarian ken, no ipangag dayta dagiti tattao, mabalin a mangispal iti biag. (Juan 17:3) Gapuna, ikagumaantayo koma nga usaren a naimbag dagitoy a daan a libro.
3 Ti kinapateg dagita ket naipakita iti kapadasan ti maysa a babai a nagtawid iti adu a daan a publikasion ti Watch Tower manipud iti apongna a baket. Dinamag ti maysa a Saksi no ammo ti babai ti pudpudno a pateg dagita a publikasion. Insungbat ti babai: “Diak ammo ti pateg dagita, ngem kasanok a maammuan?” Immanamong ti babai nga agadal iti Biblia, naammuanna ti kinapudno, ket idi agangay impategna ti libraria daydi apongna a baket. Anian a nagpateg a tawid ti nagbalinan dagita a daanen a libro!
4 Itukonyo: Malaksid pay iti panangitukon kadagiti daan a libro iti binalaybalay, siguraduenyo nga itukon dagita no sarungkaranyo dagiti tattao nga ammoyo a maragsakan a mangbasa kadagiti publikasiontayo, agraman dagidiay nagsuskribir iti Pagwanawanan ken Agriingkayo! ken dagidiay rutayo iti magasin. Kadagidiay iyad-adalanyo iti Biblia, makagun-odda iti kanayonan a pannakaammo manipud kadagiti napili a daan a libro a mangpalawa iti pannakatarusda iti kinapudno. Diyo liplipatan ti mangala iti aniaman kadagiti daan a libro nga awan kadakayo, nangnangruna dagiti libro a Nagkaykaysa iti Panagdayaw ken Agbiag nga Agnanayon. Iti kasta, makaurnongkayo iti nagpateg a teokratiko a libraria, a mausar a mangparayray iti tiempo ti personal a panagadalyo.
5 Imbes nga idulin lattan dagiti daan a librotayo, usarentayo a naimbag dagitoy a manggutugot kadagiti makasaritatayo tapno ‘agbutengda iti Dios ket salimetmetanda dagiti bilbilinna.’—Ecl. 12:13.