Dagiti Pakaammo
◼ Literatura a tukon iti Abril ken Mayo: Indibidual a kopia ti Pagwanawanan ken Agriingkayo! Mangitugotkayo iti broshur a Kalikaguman para kadagiti interesado, ken ikagumaan ti mangirugi kadagiti panangyadal iti Biblia iti pagtaengan. Hunio: Itukon ti broshur a Kalikaguman, a sipapanunot a mangirugi kadagiti panangyadal iti Biblia iti pagtaengan. Hulio ken Agosto: Mabalin nga itukon ti aniaman kadagiti broshur. Ngem yantangay adu ti abastotayo a broshur a Libro Para iti Amin a Tao, paregtaenmi dagiti kongregasion a dagitoy ti pediduenda a mausar iti daytoy dua a bulan a kampania. Dagiti kongregasion a saan pay a nagpedido kadagiti maikampania a publikasion a nadakamat masapul nga agpedidodan iti sumaruno a binulan a Literature Request Form (S-AB-14).
◼ Dandanin maala dagiti 1999 a tomo ti Watchtower ken Awake! ket mabalinen ti agpedido. Nupay kasta, laglagipenyo nga special-request items dagitoy ket pediduen koma laeng no adda espesipiko nga agibumbunannag nga agkiddaw. No saan pay a makasangpet dagiti tomo inton maawat dagiti pedido, agparangto dagita a kas “back-ordered” ken maipatulodto kadakayo dagiti tomo inton maawat dagita manipud Brooklyn.
◼ No trabahuenyo dagiti naiputputong a teritoriayo iti bulbulan ti kalgaw, kasayaatan nga itukon ti libro a Pannakaammo wenno ti broshur a Kalikaguman. Agitugottayo koma amin iti nagduduma a tract para kadagidiay di madanon iti pagtaengan wenno kadagidiay di mangala iti literatura. Maikagumaan koma a surnadan dagidiay masarakan nga interesado.
◼ Impakaammo kadakami ti sanga iti Britania nga addada kakabsat a nagtrabaho idi idiay Saudi Arabia ken dadduma pay nga estado ti Arabia a mangibagbaga iti nagnagan ken numero ti telepono dagiti responsable a kakabsat kadagitoy a pagilian kadagiti kakabsat wenno interesado a tattao iti Pilipinas a mapan sadiay. Nupay saan a dakes ti motiboda, nangituggod dayta iti sumagmamano a narikut a kasasaad ken mamagpeggad kadagiti kakabsat sadiay. Gapuna, rumbeng a laglagipen dagiti amin a nagtrabaho idi kadagita a pagilian a ditay koma pulos ited ti nagnagan wenno numero ti telepono dagiti siasinoman a kakabsat nga agnanaed kadagiti maparparitan a pagilian. No addada kakabsat a mapan agtrabaho kadagita a pagilian, masapul nga ipatulodda iti sanga nga opisina iti Pilipinas wenno direkta nga idiay sanga iti Britania ti direksionda (no mabalbalin ti direksion ti kalsada) ken ti numero ti teleponoda iti dayta a pagilian, kalpasanna addanto mayurnos a mangbirok kadakuada.