No Kasano nga Ad-adda a Magun-odtayo ti Rag-o Kadagiti Gimong
1 Napateg dagiti gimong iti naespirituan a pagimbagantayo. Ti rag-o a magun-odtayo kadagita ket adda direkta a pakainaiganna iti aramidentayo sakbay, kabayatan, ken kalpasan dagiti gimong. Kasanotay a matulongan ti bagbagitayo ken dagiti sabsabali a mangtaginayon iti napalaus a rag-o iti pannakigimong?
2 Sakbay Dagiti Gimong: Adda direkta a pakainaigan ti panagsagana tapno matagiragsaktayo dagiti gimong. No nakasaganatayo a naimbag, ad-adda a magagarantayo nga agimdeng ken makipaset. Kasta met, rumbeng a maisagana a naimbag ti aniaman a maited a pasettayo iti gimong, a ti kalattayo ket maipaawat a siuumiso ti impormasion sigun kadagiti instruksion ken matukay ti interes dagiti agdengdengngeg. Agensayotayo koma a naimbag. No makatulongtayo iti narayray ken makapabileg a gimong a pakagunggonaan ti tunggal maysa, maiparangarang ti personal a panagrang-aytayo ket dakdakkel ti rag-otayo.—1 Tim. 4:15, 16.
3 Kabayatan Dagiti Gimong: Ti panagkomento kabayatan dagiti gimong ket matulongannatayo nga ad-adda a mangtagiragsak kadagita. Dagiti paset a kasapulan a pakiramanan ti tallaong ket mamatmatan koma a kas paset ti tunggal maysa iti kongregasion. Masansan nga ad-adda nga epektibo dagiti komento nga ababa ken direkta iti punto. Makaparegta ken makapakired unay ti ababa a panangisalaysay kadagiti makapabileg a kapadasan, isu nga alertotayo koma a mangiraman kadagitoy no maitutop iti programa. (Prov. 15:23; Ara. 15:3) No adda pasettayo iti gimong, agsaotay koma a buyogen ti kinagagar ken kombiksion, a pagbalinentayo dayta a makapainteres, realistiko, ken praktikal.
4 Kalpasan Dagiti Gimong: Ti naayat a pannakisarita kadagiti sabsabali, nainggayyeman a kablaaw, ken panangiburay iti sumagmamano a kangrunaan a punto a napagadalan kadagiti gimong ket pakagunggonaantayo amin. Ti panangyebkas iti rag-otayo a makakita iti pannakipaset dagiti ubbing, nataengan, ken kabbaro paunegenna ti ayattayo nga agkakabsat. Imbes a babalawentayo dagiti dadduma a di makatabuno kadagiti gimong, iburaytay koma kadakuada ti rag-otayo iti pannakigimong, iti kasta maparegtatay ida a tumabuno.—Heb. 10:24, 25.
5 Ditay koma paidaman ti bagbagitayo iti daytoy nagpateg a probision ti panagpipinnaregta. (Roma 1:11, 12) Babaen ti panangaramidtay iti amin a kabaelantayo, mataginayontay amin ti rag-otayo a tumabuno kadagiti Nakristianuan a gimong.