Tultulongandatayo Dagiti Anghel
1 “Adtoy! addaak kadakayo iti amin nga al-aldaw agingga iti panungpalan ti sistema ti bambanag.” Anian a makapabileg dagita a sasao kadagiti amin a mangipangag iti bilin ni Jesus: “Inkayo ngarud ket mangaramidkayo iti ad-adalan”! (Mat. 28:18-20) Ti maysa a napateg a pamay-an nga adda ni Jesus kadagiti pudno a Kristiano ket babaen dagiti anghel. (Mat. 13:36-43) Anian a makaparagsak nga ipakaammo ti “agnanayon a naimbag a damag” a kadua dagiti matalek nga espiritu a parsua!—Apoc. 14:6, 7.
2 Iti Ministeriotayo: Sigun iti Biblia, naibaon dagiti anghel “tapno agserbida kadagidiay agtawid iti pannakaisalakan.” (Heb. 1:14) Idi umuna a siglo, adda paset dagiti anghel iti panangbirok dagiti pasurot ni Jesus kadagiti maikari. (Ara. 8:26) Agingga iti kaaldawantayo, mapaspasaran dagiti adipen ti Dios ti panangiwanwan dagiti anghel. Adu a bumalay ti nagkuna nga ikarkararagda ti tulong idi adda Saksi a nagtuktok iti ridawda. Anian a ragsaktayo, agraman dagiti anghel, no ipangag dagita a tattao ti mensahe ti Pagarian!—Luc. 15:10.
3 No Maipasango iti Ibubusor: Babaen dagiti anghel, “a nabileg iti pannakabalin,” sinalakniban ni Jehova da Daniel, ti kaduana a tallo nga agtutubo a Hebreo, ni apostol Pedro, ken dadduma pay a nakapasar kadagiti nakaro a pannubok. (Sal. 103:20; Dan. 3:28; 6:21, 22; Ara. 12:11) Nupay no dadduma ket kasla awan gawaytayo iti sidong ti ibubusor, makaparegta kadatayo ti kapadasan ti adipen ni Eliseo idi naammuanna nga “ad-adu ti kakaduatayo ngem dagidiay kakaduada.” (2 Ar. 6:15-17) Uray kapilitan a mayadayotayo kadagiti kakabsattayo a Kristiano, ditay koma maupay. Ipanamnama kadatayo ti Sao ti Dios: “Ti anghel ni Jehova agpakpakarso iti intero nga aglikmut dagidiay agbuteng kenkuana.”—Sal. 34:7.
4 Iti din agbayag, agtignayto ti buyot dagiti anghel tapno ikisapda ti amin a bumusbusor iti kinaari ni Kristo. (Apoc. 19:11, 14, 15) Bayat nga ur-urayentayo dayta nga aldaw, sapay koma ta itultuloytayo a situtured nga idayaw ni Jehova, a naan-anay nga agtalektayo iti nabileg a tulong dagiti nailangitan a buyot iti panangidaulo ni Kristo.—1 Ped. 3:22.