Agpayunir

Nasayaat ti pangus-usarantayo iti pigsatayo no mangaramidtayo kadagiti naespirituan a kalat. (1Co 9:26) Ababan ti nabatbati a tiempo daytoy a sistema ket makatulong dagiti kalattayo tapno mausartayo a naimbag ti tiempotayo. (Efe 5:15, 16) Bayat ti panagdaydayaw ti pamiliayo, padasenyo ti mangaramid kadagiti kalat para iti umay a baro a tawen serbisio. Makatulong kadakayo daytoy nga isyu ti workbook iti gimong ta naglaon kadagiti artikulo maipapan iti agduduma a posible a kalat a mabalinyo a pagpanunotan ken ikararag.​—San 1:5.

Kas pagarigan, mabalin kadi nga agtitinnulong ti intero a pamilia tapno adda maysa kadakuada a makapag-regular pioneer? No saankayo a sigurado no kabaelanyo a maala ti makiddaw nga oras, makisaritakayo kadagiti dadduma a payunir a kapadayo iti situasion. (Pr 15:22) Baka mabalinyo nga interbiuen ti maysa a payunir bayat ti panagdaydayaw ti pamiliayo. Kalpasanna, isuratyo dagiti posible nga eskediulyo. No payunirkayo idi, mabalinyo a kitaen no ipalubos ti situasionyo nga agpayunirkayo manen.

Mabalin kadi nga ag-auxiliary pioneer ti dadduma iti pamiliayo iti maysa a bulan wenno nasursurok pay? No nakapuyen ti salun-atmo, mabalinmo latta ti ag-auxiliary pioneer no mangbusboska iti sumagmamano nga oras kada aldaw iti ministerio. No limitado ti orasmo a mangasaba iti tengnga ti lawas gapu ta full-time ti trabahom wenno ages-eskuelaka, baka mabalinmo a pilien ti bulan nga adda holiday-na wenno lima ti ngudo ti lawasna. Markaanyo iti kalendario no kaano ti planoyo nga ag-auxiliary pioneer sa mangaramidkayo iti eskediul.​—Pr 21:5.

BUYAEN TI VIDEO NGA AGBALIN A NATURED . . . PAYUNIR, SA SUNGBATAN DAYTOY:

• Ania ti masursurotayo iti kapadasan ni Sister Aamand maipapan iti naayat a panangaywan ni Jehova kadagidiay agsaksakripisio tapno makapagpayunirda?