Bangonem Manen ti Nadadael a Relasionmo ken Jehova

KADA tawen, adu a maipatpateg a karnero ti maisubsubli iti kongregasion Kristiano. Panunotem ti kasta unay a ‘ragsak idiay langit’ no agsubli ti maysa! (Luc. 15:7, 10) No maysaka kadakuada, masiguradom a maragsakan ni Jesus, dagiti anghel, ken ni Jehova a mismo gapu ta itantandudom manen ti kinapudno. Ngem bayat nga ibangbangonmo manen ti nadadael a relasionmo ken Jehova, mabalin a maipasangoka kadagiti karit. Ania ti dadduma kadagita, ken ania ti makatulong kenka?

ANIA DAGITI KARIT?

Adu ti manglablaban kadagiti negatibo a rikna uray nakasublidan iti kongregasion. Mabalin a mariknam ti narikna idi ni Ari David. Uray napakawanen dagiti basolna, imbagana: “Nakaad-adu dagiti biddutko.” (Sal. 40:12; 65:3) Mabalin a makonkonsiensia wenno mababain latta ti maysa a tao uray no nakasublin ken Jehova iti adun a tawen. Ni Isabelle ket nailaksid iti nasurok a 20 a tawen.a Imbagana, “Nakarigrigat idi a patien a napakawannakon ni Jehova.” No maupayka, mabalin a kumapuy manen ti espiritualidadmo. (Prov. 24:10) Saanmo koma nga ipalubos a mapasamak dayta.

Kumapuy ti pakinakem wenno madismaya ti dadduma no panunotenda ti panagregget a kasapulan tapno maisubli ti relasionda ken Jehova. Kinuna ni Antoine idi nakasublin, “Panagriknak, kasla nalipatakon no kasano ti agbiag kas maysa a Kristiano.” Gapu ta kasta ti marikrikna ti dadduma, mabalin nga agpangaduada nga agporsegi a makiraman kadagiti naespirituan nga aktibidad.

Alaentayo a pagarigan ti maysa a tao a nadadael ti ipatpategna a balay gapu iti napigsa a bagyo. Mabalin a madismaya no panunotenna ti tiempo ken bannog a kasapulan tapno maibangonna manen dayta. Kasta met laeng no nadadael ti relasionmo ken Jehova gapu iti nadagsen a basol. Mabalin a mariknam a kasapulam ti dakkel a panagregget tapno maisublim ti dati a relasionmo kenkuana. Ngem adda magun-odam a tulong.

Iyaw-awis ni Jehova: “Umaykayo ket aglilinnawagtayo.” (Isa. 1:18) Inkagumaamon ti ‘nakilinnawag’ kenkuana. Ay-ayatennaka ni Jehova gapu iti dayta a panagreggetmo. Panunotem laengen: Inikkam ni Jehova iti nabileg nga ebidensia nga usarenna a pangsungbat kadagiti akusasion ni Satanas!—Prov. 27:11.

Gapu ta nakasublikan, immasidegkan ken Jehova, ken ikarkarina a kasta met ti aramidenna. (Sant. 4:8) Ngem saan nga umdas a basta makitadaka a nakasublikan iti kongregasion. Adda pay ti masapul nga aramidem. Itultuloymo a paunegen ti ayatmo iti Amam ken Gayyemmo a ni Jehova. Kasanom a maaramidan dayta?

MANGIKEDDENGKA KADAGITI KALAT A KAYAM A RAGPATEN

Padasem ti mangikeddeng kadagiti kalat a kayam a ragpaten. Laglagipem a ti naespirituan a pundasionmo—ti pannakaammom maipapan ken Jehova ken kadagiti karina iti masanguanan—ket posible a nalagda pay laeng. Ngem masapul a maaddaanka manen iti nasayaat a naespirituan a rutina, kas iti panangikasaba iti naimbag a damag ken regular a pannakikadua kadagiti kapammatiam. Dagitoy ti mabalinmo nga ikeddeng a kalat.

Kanayon a makisaritaka ken Jehova. Maawatan ti Amam a mabalin a marigatanka nga agkararag kenkuana ta makonkonsiensiaka pay laeng. (Roma 8:26) Nupay kasta, ‘itultuloymo ti agkararag’ ken Jehova ken ibagam a kayatmo la unay ti agbalin a gayyemna. (Roma 12:12) Malagip ni Andrej: “Napalalo idi ti bainko ken pannakakonsiensiak. Ngem kada agkararagak, sumayaat ti riknak ken nataltalna no kuan ti isipko.” No dimo ammo no ania ti ikararagmo, usigem dagiti kararag ti agbabbabawi a ni Ari David a mabasa iti Salmo 51 ken 65.

Regular nga adalem ti Biblia. Dayta ti mangpasalun-at iti espiritualidadmo ken mangpadakkel iti ayatmo ken Jehova. (Sal. 19:7-11) “Awan idi ti naespirituan a rutinak isu a kimmapuyak ket napaayko ni Jehova,” imbaga ni Felipe. “Diak kayat a maulit manen dayta a kamalik, isu a sigsiguraduek nga adda personal a panagadalko nga agserbi kas proteksionko.” Maaramidmo met dayta. No kasapulam ti tulong tapno makabirokka kadagiti maitutop a topiko para iti personal a panagadalmo, agpatulongka iti gayyem a nataengan iti naespirituan.

Makigayyemka manen kadagiti kapammatiam. Madanagan ti dadduma a nakasubli iti kongregasion a negatibo ti panangmatmat kadakuada ti sabsabali. Inamin ni Larissa: “Mababainak unay idi. Panagriknak, trinaidorko ti kongregasion. Nabayag a kasta ti nariknak.” Masiguradom a magagaran dagiti panglakayen ken ti dadduma a nataengan iti naespirituan a tumulong kenka bayat a pabpabilgem ti espiritualidadmo. (Kitaen ti kahon nga “Ania ti Mabalin nga Aramiden Dagiti Panglakayen?”) Maragsakanda ta nakasublikan, ken kayatda nga agbalinka a naragsak!—Prov. 17:17.

Ania ti aramidem tapno agbalinka a nasingsinged iti kongregasion? Regular a makigimongka ken makiramanka iti ministerio tapno kanayon a makaduam dagiti kakabsat. Kasano a makatulong dayta? Imbaga ni Felix: “Inur-uray ti kongregasion ti panagsublik. Nariknak nga ipatpategdak. Nakatulongda amin tapno mariknak a pasetak manen ti maysa a pamilia, a napakawanakon, ken mabalinko manen ti rumang-ay.”—Kitaen ti kahon nga “Ania ti Mabalinmo nga Aramiden?”

DIKA SUMUKSUKO!

Agtultuloy a mangpataud ni Satanas iti ad-adu pay a “napigsa a bagyo” a mangpakapuy kenka bayat nga ibangbangonmo manen ti nadadael a relasionmo ken Jehova. (Luc. 4:13) Agsaganaka babaen ti panangpatibkermo itan iti espiritualidadmo.

No maipapan kadagiti karnero ni Jehova, kastoy ti inkarina: “Birokekto ti napukaw, isublikto ti nayaw-awan, bedbedakto ti nasugatan, ken papigsaekto ti masakit.” (Ezek. 34:16) Din mabilang ti natulongan ni Jehova a mangisubli iti relasionda kenkuana. Masiguradom a kayatnaka a tulongan tapno ad-adda pay a mapatibkermo ti relasionmo kenkuana.

Ania ti Mabalin nga Aramiden Dagiti Panglakayen?

Napateg ti papel dagiti panglakayen tapno matulongan dagiti naisubli a kakabsat a mangibangon manen iti nadadael a relasionda ken Jehova. Dagitoy ti mabalinda nga aramiden para kadagiti naisubli.

Ikkan ida iti pammasiguro. Ammo ni apostol Pablo a ti maysa nga agbabbabawi a nakabasol ket mabalin a “lapunosen ti nakaro a ladingit.” (2 Cor. 2:7) Baka masansan a mabain ken maupay. Imbalakad ni Pablo iti kongregasion: “Siaasi a pakawanen ken liwliwaenyo.” Kasapulan dagiti naisubli ti pammasiguro nga ay-ayaten unay ida ni Jehova ken dagiti kapammatianda. Mabalin a makatulong no kanayon a makomendaranda ken maipaayanda iti tulong tapno saanda a maupay.

Makipagkararag kadakuada. “Ti panagpakaasi ti nalinteg a tao ket nabileg ti epektona.” (Sant. 5:16) Imbaga ni Larissa, a nadakamat itay: “Imbagak kadagiti panglakayen dagiti pagduaduaak ken pagam-amkak. Inkararagandak ken nakipagkararagda kaniak. Nariknak a saan gayam a makaunget kaniak dagiti panglakayen. Kayatdak a tulongan a mangisubli iti relasionko ken Jehova.” Kinuna ni Theo: “Ti karkararag dagiti panglakayen ti nangipasigurado kaniak a talaga nga ay-ayatennak ni Jehova ken makitkitana dagiti nasayaat kaniak, saan laeng a dagiti pagkamkamaliak.”

Gayyemen ida. Dagiti naisubli ket agkasapulan kadagiti gagayyem iti kongregasion. “Kanayon nga awisentayo ida a makikadua kadatayo iti ministerio, ken kapatgan iti amin, bisitaentayo ida iti balayda. Nakapatpateg a magayyemtayo ida!” imbaga ti maysa a panglakayen nga agnagan Justin. Imbaga ti sabali pay a panglakayen a ni Henry, “No makita ti kongregasion a makigaygayyem dagiti panglakayen iti naisubli, kastanto met ti aramidenda.”

Tulongan ida nga agadal. Ti gayyem a nataengan iti naespirituan ket makatulong iti naisubli tapno maaddaan manen iti nasayaat a rutina iti panagadal. Kinuna ti panglakayen nga agnagan Darko: “Magusgustuak nga iranud dagiti naespirituan a gameng a nakalik iti personal a panagadalko ken ibagbagak no kasanoak karagsak iti panagadalko iti Biblia. Awisek met no kua ida nga adalenmi ti maysa a makaparegta nga artikulo.” Imbaga ti sabali pay a panglakayen a ni Clayton: “Paregtaek ida a mangbirok kadagiti salaysay iti Biblia a kas iti situasion a napasaranda.”

Ipastoran ida. Nakitan dagiti naisubli ti akem dagiti panglakayen kas ukom. Ita, ad-adda a masapul a makitada ida kas pastor. (Jer. 23:4) Alistokayo koma a dumngeg ken sisasagana a mangkomendar. Kanayonyo ida a komustaen. Kastoy ti imbaga ti panglakayen a ni Marcus nga ar-aramidenda no mangipastorda: “Mangibasakami iti teksto, komendaranmi ida, ken ipasiguradomi kadakuada nga ipagpannakkelmi ida ken uray ni Jehova gapu iti panangikagumaanda nga agsubli. Sakbay nga agpakadakami, iyeskediulmi no kaanomi manen ida nga i-shepherding.”

a Nabaliwan dagiti nagan iti daytoy nga artikulo.