MAPASARDENGTAYO TI PANAGWARAS TI GURA

1 | Saanka a Mangidumduma

Pannursuro ti Biblia:

“Saan a mangidumduma ti Dios, no di ket awatenna ti [amin] iti tunggal nasion nga agbuteng kenkuana ken agaramid iti umiso.”—ARAMID 10:34, 35.

Ti Kaipapananna:

Saannatayo a hushusgaran ni Jehovaa a Dios base iti naggapuantayo a nasion, puli, kolor ti kudil, wenno kultura. Imbes ketdi, ti kitkitaenna ket no ania a talaga ti mas importante—ti kinataotayo. Ibagbaga met ti Biblia a “dagiti laeng makita ti mata ti kitkitaen ti tao, ngem ti puso ti kitkitaen ni Jehova.”—1 Samuel 16:7.

Ti Maaramidam:

Uray saantayo a mabasa ti puso, kayatayo a tuladen ti saan a panangidumduma ti Dios. Kitaentayo dagiti tattao kas indibidual saan a kas grupo. No madlawmo a negatibon ti panagriknam iti dadduma a tattao—mabalin a gapu ta sabali ti pulida wenno naggapuda iti sabali a nasion—ikararagmo iti Dios ken agpatulongka a mangparut iti dayta a rikna. (Salmo 139:23, 24) Tapno saanka nga agbalin a manangidumduma, amin-puso nga agpatulongka ken Jehova, ket makasiguradoka a denggenna ti kararagmo ken tulongannaka.—1 Pedro 3:12.

a Jehova ti nagan ti Dios.—Salmo 83:18.

“Idik la a napadasan ti nakikadua ken nakipangan pay ketdi iti maysa a puraw a kabsat . . . Ita, pasetakon iti pudpudno a sangalubongan a panagkakabsat.”—TITUS

Kapadasan—TITUS

Nalabananna ti Gura

Nakimiembro ni Titus iti maysa a gang a lumablaban kadagiti linteg a mangitantandudo iti panangidumduma iti puli. Imbagana: “Igagarami ti mapan kadagiti lugar a maiparit dagiti nangisit, kas kadagiti hotel ken bar, tapno laeng makiririkami.” Inamin ni Titus a nakaron ti gurana, isu nga imbagana: “No adda makaengkuentrok, lalaki man wenno babai, siguraduek a siak ti umuna a dumanog.”

Nagbalbaliw ni Titus idi nangrugin a makipagadal iti Biblia kadagiti Saksi ni Jehova. Dakkel ti epekto kenkuana idi nabasana ti Biblia. Nadanon ti pusona gapu iti daytoy a nabasana a kari maipapan iti masanguanan: “Awanton ni patay. Awanto metten ti panagladingit wenno panagsangit wenno ut-ot.”—Apocalipsis 21:3, 4.

Idi damo, marigatan ni Titus a mangikkat iti gura iti pusona. “Nagrigat a balbaliwan ti pampanunot ken ar-aramidko,” imbagana. Ngem dakkel ti naitulong kenkuana ti nasursurona iti Aramid 10:34, 35, a mangibagbaga a saan a mangidumduma ti Dios.

Ania ti resultana? Imbaga ni Titus: “Nakombinsirak a dagiti Saksi ni Jehova ti pudno a relihion idi nakitak nga ay-ayatenda ti maysa ken maysa, aniaman ti puli wenno kolorda. Idi sakbayak nga agpabautisar kas Saksi, inawisnak ti maysa a puraw a kabsat iti kongregasion a makipangan iti balayda. Kasla saan a nakappapati dayta. Idik la a napadasan ti nakikadua ken nakipangan pay ketdi iti maysa a puraw a kabsat iti mismo a balayna. Ita, pasetakon iti pudpudno a sangalubongan a panagkakabsat.”