Agaramidka Kadagiti Desision a Mangparagsak ken Jehova

1. Ania a narigat a banag ti masapul nga aramidentayo amin?

INALDAW a masapul nga agaramidtayo kadagiti desision. Dadduma ket medio nalaka nga aramiden, kas koma no ania ti pammigatmo, wenno no ania nga oras a maturogka. Ngem adda dagiti bambanag a narigat a desisionan. Mabalin nga apektaranda ti salun-at, kinaragsaktayo, dagiti ipatpategtayo, wenno ti panagdaydayawtayo. Kayattayo ti makaaramid kadagiti desision a pagsayaatantayo ken ti pamiliatayo. Kangrunaanna, kayattayo a dagiti desisiontayo ket mangparagsak ken Jehova.—Roma 12:​1, 2.

2. Ania dagiti aramidentayo tapno makaaramidtayo kadagiti nainsiriban a desision?

² Dakdakkel ti posibilidadna a makaaramidka iti nainsiriban a desision no (1) ammuem dagiti impormasion, (2) ikabilangam ti panangmatmat ni Jehova iti situasion, ken (3) panunotem a naimbag dagiti opsion. Mailawlawag iti daytoy nga artikulo dagita a tallo a banag a masapul nga aramidentayo. Matulongannatayo met no kasanotayo a sanayen ti abilidadtayo nga agpanunot.—Prov. 2:11.

AMMUEM DAGITI IMPORMASION

3. Iyilustrarmo no apay a masapul nga ammuem nga umuna dagiti impormasion sakbay nga agaramidka iti desision.

³ Ti umuna a banag a masapul nga aramidem tapno makaaramidka iti nasayaat a desision ket ammuem dagiti impormasion. Apay a napateg dayta? Imadyinem ti maysa a pasiente a napan nagpadoktor gapu iti nakaro a sakit. Basta la kadin agdesision ti doktor no ania nga agas ti itedna a dina man la eksamenen wenno pagsaludsodan ti pasiente? Sigurado a saan. Nasaysayaat met dagiti maaramidmo a desision no ikabilangam nga umuna dagiti impormasion nga agaplikar iti situasionmo. Kasanom a maaramid dayta?

4. Maitunos iti Proverbio 18:​13, ania ti aramidem tapno masiguradom nga ammom dagiti impormasion? (Kitaen met ti ladawan.)

⁴ Kaaduanna a maammuam dagiti impormasion no agsaludsodka. Ipapantayo a naawiska iti maysa a gathering. Mapanka kadi? No saanmo nga am-ammo ti nangawis kenka wenno dagiti implanona para iti gathering, masapul nga isaludsodmo dagitoy: “Sadino ken kaano a maangay ti gathering? Kasano kaadu a tattao ti mapan? Siasino ti makinresponsabilidad kadagiti mapasamak sadiay? Siasino dagiti mapan? Ania dagiti naiplano a maaramid? Addanto kadi maidasar nga arak?” Makatulong dagiti sungbat kadagita a saludsod tapno makaaramidka iti nainsiriban a desision.—Basaen ti Proverbio 18:13.

5. Ania ti aramidem no naammuamon dagiti impormasion?

⁵ Kalpasan a naammuam dagiti impormasion, panunotem a naimbag ti amin nga anggulo ti situasion. Kas pagarigan, kasanon no maammuam nga adda dagiti mapan iti gathering a saan a mangsursurot kadagiti prinsipio ti Biblia? Wenno addanto ti maidasar nga arak ngem awan ti naikkan iti responsabilidad a mangsigurado nga awanto ti mabartek? Posible kadi a dayta a gathering ket agtinnagto a nalabes a panagragragsak? (1 Ped. 4:3) Wenno kasano no dayta a gathering ket maangay iti oras ti gimong wenno panangasaba? No nakitamon ti amin nga anggulo ti situasion, nalaklakakan a makaaramid iti nasayaat a desision. Ngem adda pay ti masapul nga aramidem. Ammomon ti maipapan iti situasion; ngem isaludsodmo iti bagim, ‘Ania ti panangmatmat ni Jehova iti dayta?’—Prov. 2:6.

IKABILANGAM TI PANANGMATMAT NI JEHOVA

6. Sigun iti Santiago 1:​5, apay a masapul nga ikararagtayo ti tulong ni Jehova?

⁶ Agpatulongka ken Jehova tapno matarusam ti panangmatmatna iti maysa a banag. Ikarkari ni Jehova nga ikkannatayo iti sirib tapno matarusantayo no pakaragsakanna wenno saan ti maysa a desision. Ti kasta a sirib ket ipaayna a ‘sipaparabur iti amin ken saan a mangumsi.’—Basaen ti Santiago 1:5.

7. Kasanom a matarusan ti panangmatmat ni Jehova iti maysa a banag? Iyilustrar.

⁷ No inkararagmon ken Jehova ti panangiwanwanna, siputam a naimbag ti sungbatna. Kas panangyilustrar, ipapanmo a nayaw-awanka bayat nga agbibiaheka. Ania ti aramidem? Mabalinmo ti agdamag iti maysa a residente iti dayta a lugar. Ngem pumanawka kadi sakbay pay a sungbatannaka? Siempre, saan. Denggem a naimbag dagiti instruksionna. Kasta met, kalpasan nga inkararagmon ken Jehova ti sirib, ikagumaam a tarusan ti sungbatna babaen ti panangadalmo kadagiti bilin ken prinsipio ti Biblia nga agaplikar iti situasionmo. Kas pagarigan, iti panagdesisionmo no mapanka maki-gathering kas nadakamaten, mabalinmo nga ikabilangan ti ibagbaga ti Biblia maipapan iti nalabes a panagragragsak, dakes a kakadua, ken iti panangyun-una iti interes ti Pagarian, imbes a kadagiti kayatmo.—Mat. 6:33; Roma 13:13; 1 Cor. 15:33.

8. Ania dagiti mabalinmo nga aramiden no kasapulam ti tulong tapno maammuam ti panangmatmat ni Jehova iti maysa a banag? (Kitaen met ti ladawan.)

⁸ Ngem adda dagiti tiempo a kasapulam ti tulong ti dadduma tapno maammuam ti panangmatmat ni Jehova iti maysa a banag. Baka makatulong no agpabalakadka iti eksperiensiado a brother wenno sister. Ngem magunggonaanka met no sika a mismo ti ag-research. Nagadu ti mabirokam nga impormasion kadagiti katulongan iti panagadal kas iti Giya iti Panagsukimat Para Kadagiti Saksi ni Jehova ken Dagiti Teksto Para iti Panagbiag kas Kristiano. Laglagipem ti kalatmo: ti makaaramid iti desision a mangparagsak ken Jehova.

9. Kasanotayo a masigurado a ti desisiontayo ket mangparagsak ken Jehova? (Efeso 5:17)

⁹ Kasanotayo a masigurado a ti desisiontayo ket mangparagsak ken Jehova? Masapul nga am-ammuentayo a naimbag isuna. “Ti pannakaammo maipapan iti Daydiay Kasasantuan ket pannakaawat,” kuna ti Biblia. (Prov. 9:10) Wen, maaddaantayo iti pudpudno a pannakaawat no ammotayo dagiti kualidad ni Jehova, ti panggepna, ken dagiti kayat ken kagurana. Isaludsodmo iti bagim, ‘Base iti pannakaammok ken Jehova, ania a desision ti mabalinko nga aramiden tapno maparagsakko isuna?’—Basaen ti Efeso 5:17.

10. Apay a napatpateg dagiti prinsipio ti Biblia ngem iti tradision ti pamilia wenno kultura?

¹⁰ No dadduma, masapul a ditay patgan ti kayat dagiti ipatpategtayo tapno maparagsaktayo ni Jehova. Kas pagarigan, gapu iti pannakaseknan ti dadduma a nagannak, baka ipilitda iti adulton a balasangda a makiasawa iti nabaknang wenno adda kayana—wenno iti makaited kadakuada iti dakkel a sab-ong—uray no saan met a nabileg ti espiritualidadna. Agpayso a kayatda a maipaayan ti balasangda iti nanam-ay a biag. Ngem asinonto ngay ti tumulong kenkuana a rumang-ay iti naespirituan? Ania ti panangmatmat ni Jehova iti dayta a banag? Makitatayo ti sungbat iti Mateo 6:33. Parparegtaenna dagiti Kristiano nga itultuloyda a “sapulen nga umuna ti Pagarian.” Kayattayo a padayawan dagiti nagannaktayo ken raemen dagiti tattao iti komunidadtayo. Ngem ti koma kangrunaan kadatayo ket ti panangparagsak ken Jehova.

PANUNOTEM A NAIMBAG DAGITI OPSION

11. Ania a kualidad a nadakamat iti Filipos 1:​9, 10 ti makatulong kenka bayat a pampanunotem dagiti opsionmo?

¹¹ No nakitamon dagiti prinsipio ti Biblia a makatulong kenka nga agdesision, panunotem met a naimbag dagiti opsionmo. (Basaen ti Filipos 1:​9, 10; kitaen ti study note a “full discernment” iti nwtsty.) Makatulong ti naan-anay a pannakatarus tapno makitam ti posible a resulta ti tunggal opsionmo. No dadduma, nalaka la a desisionan ti maysa a banag. Ngem saan a kanayon a kasta. Makatulong kenka ti pannakatarus tapno makaaramidka kadagiti nainsiriban a desision uray kadagiti komplikado a situasion.

12-13. Kasano a makatulong kenka ti pannakatarus no maipapan iti panagpili iti trabaho?

¹² Panunotem daytoy a situasion: Agbirbirokka iti trabaho a pangsuportam iti pamiliam. Ita, adda dua a trabaho a pagpilpiliam. Inammomon dagiti impormasion a kasapulam, kas iti no ania a klase dayta a trabaho, ti eskediul ti trabahom, kasano kaadayo dayta iti balayyo, ken dadduma pay. Agpada met ketdi a maitutop dagita a trabaho para iti maysa a Kristiano. Ngem baka mas piliem daydiay maysa, ta kaykayatmo dayta a trabaho, wenno dakdakkel ti sueldo. Ngem adda pay ti masapul a panunotem sakbay nga agdesisionka.

¹³ Kas pagarigan, maapektaranto kadi ti pannakigimongmo gapu iti eskediul ti trabahom? Maagawnanto ngata ti oras a para koma iti emosional ken naespirituan a kasapulan ti pamiliam? Makatulong dagita a saludsod tapno mayun-unam ti “napatpateg a bambanag”—ti panagdaydayawmo iti Dios ken dagiti kasapulan ti pamiliam—saan a dagiti material a bambanag. No aramidem dagita, makaaramidka iti desision a bendisionan ni Jehova.

14. Kasano a makatulong ti pannakatarus ken ayat tapno saantayo a maitibkol ti dadduma?

¹⁴ Makatulong met ti pannakatarus tapno mapanunottayo ti epekto dagiti desisiontayo iti dadduma. Iti kasta, saantayo a “maitibkol ti sabsabali.” (Fil. 1:10) Napateg dayta no agar-aramidtayo kadagiti personal a desision a kas iti panagbadbado wenno panaglanglanga. Kas pagarigan, mabalin a magusgustuantayo ti maysa nga estilo ti panagbadbado wenno panaglanglanga. Ngem kasano ngay no makaitibkol dayta kadagiti kakabsat wenno kadagiti saan a Saksi? Makatulong ti pannakatarus tapno maikabilangantayo ti rikriknada. Tignayennatayo ti ayat tapno sapulentayo ti pagimbagan “ti sabali” ken agbalintayo a naemma. (1 Cor. 10:​23, 24, 32; 1 Tim. 2:​9, 10) Iti kasta, makaaramidtayo iti desision a mangipakita nga ay-ayaten ken raraementayo ti sabsabali.

15. Ania ti masapul a panunotem sakbay a mangaramidka iti napateg a desision?

¹⁵ No mangaramidka iti napateg a desision, panunotem dagiti masapul nga aramidem tapno maitungpalmo ti desisionmo. Insuro kadatayo ni Jesus a ‘kuentaentayo ti magastos.’ (Luc. 14:28) Isu a panunotem no kasano kaadu a tiempo, pigsa, ken dadduma pay a banag ti kasapulan tapno maitungpalmo ti desisionmo. Iti dadduma a situasion, mabalin nga agpatulongka kadagiti kapamiliam no ania ti masapul nga aramiden ti tunggal miembro tapno masuportaranda ti desisionmo. Apay a napateg ti kasta a panagplano? Mabalin a makitamto nga adda ti masapul a balbaliwam iti desisionmo. Wenno baka nasaysayaat ti sabali nga opsion. Isu a no agpatulongka kadagiti kapamiliam ken denggem dagiti suhestionda, mas nakasaganadanto a makitinnulong kenka tapno agballigi ti desisionmo.—Prov. 15:22.

AGARAMIDKA ITI DESISION NGA AGBALLIGINTO

16. Ania dagiti makatulong kenka tapno makaaramidka iti naballigi a desision? (Kitaen met ti kahon a “No Kasano ti Agaramid Kadagiti Nainsiriban a Desision.”)

¹⁶ No naaramidmon ti amin a nadakamat iti daytoy nga artikulo, nakasaganakan a mangaramid iti nainsiriban a desision. Naammuamon dagiti kasapulam nga impormasion ken inadalmon dagiti prinsipio a makatulong kenka nga agaramid iti desision a mangparagsak ken Jehova. Ita, mabalinmon a kiddawen ken Jehova a pagballigienna ti desisionmo.

17. Ania ti tulbek tapno makaaramidka kadagiti nasayaat a desision?

¹⁷ Uray no adun dagiti desisionmo a nagballigi iti napalabas, laglagipem a ti tulbek tapno makaaramidka kadagiti nasayaat a desision ket ti panagpannuraymo ken Jehova, saan nga iti bukodmo a paglaingan wenno kapadasan. Isu laeng ti makaipaay kenka iti pudno a pannakaammo, pannakaawat, ken pannakatarus—a nagpapateg nga aspeto ti sirib. (Prov. 2:​1-5) Matulongannaka ni Jehova tapno makaaramidka kadagiti desision a mangparagsak kenkuana.—Sal. 23:​2, 3.